Read Biblija - Pe Baltitko Romani čib (Romanes) 2019 Baltic Romani Bible Marko 16 Bible Online

Marko 16 - Biblija - Pe Baltitko Romani čib (Romanes) 2019 Baltic Romani Bible bible

Marko 16

¹A kiéli progijá sávato (subóta), Maríia Magdalina, Maríia daj Jakovoskiri i Salomija, kindle aromatytka čarjá, sob (kaj) te džán te makhen Isusóskiro trúpo.

²Pe zlóko, dro pérvo kurkeskiro dyvés, syr uštyjá kham, jone giné ke maĥila.

³Pir drom jone rakirdé maškír péste: “Kon da aménge otriskirela krig bar pašýl zagiibén dre koplíca?

⁴A kiéli jone pridykhnepe, dykhéna, so bar otriskirdo krig, a bar sys drieván baró.

⁵Jone giné andré i dykhné terné manušés, savó sys uridó dro saró parnypen; jov sys beštó pir čačí rig vudarendyr, i jone strahádyne.

⁶“Na andyršan”, — rakiréla jov lénge. “Tumé rodéna Isusós Nazarietostyr, Saves primarde pe trušúl. Jov otdžidyjá! Les adáj nane, davá isyn štéto, kaj Les čhudé.

⁷Kakaná džán i phenén Léskire sykliaibnytkonénge i Petriske: “Jov džála angíl tuménde dre Galiliéia, odój tumé Les i dykhéna, syr Jov i phendiá tuménge.”

⁸Jone vyginé i dynepe te prastan maĥilatyr, syr pyjá pe lénde bari dar i izdrany; jone nikonéske nisó na phendlé, pal-dová so jone darándyne.

⁹Otdžidyi dro pérvo kurkeskiro dyvés, Isúso sykadyjá angíl Marijake Magdalinake, savjátyr Jov vytradyjá eftá nalačhé dúhi (fany).

¹⁰Joj gijá i rosphendiá davá odolénge, kon sys Lésa i savé rovenas pal Léste i piridživenas;

¹¹kiéli jone šundlé pal dová, so Isúso isyn džidó i, so joj dykhciá Les, jone na patiandyné.

¹²Tén'ci Isúso sykadyjá dro javír dykhibén dujenge léndyr pir drom, kiéli jone giné pal fóro.

¹³Kadalé duj manušá risiné i rosphendlé javirénge, ne jone i lénge na patiandyné.

¹⁴Tén'ci Isúso sykadyjá dešujekhe sykliaibnytkonénge, savé xanas pal skamínd. Jov vyrakirdia lénge, so na uhtýlla (nádosi) lénde patiaibén i léngiro iló isyn pharó dro dová, so lénge sys na pir iló te patián odolénge, savé dykhné Les korigedýr (pozžedýr), syr Jov otdžidyjá.

¹⁵Isúso phendiá lénge: “Džán pir saró svéto (lot) i phenén lav Jevangielijatyr kažnoné džidé sozdyibnaske.

¹⁶Odolé, savé patiána i javéna te bolenpe, javéna zrakhné. Ne odolé, savé na javéna te patián-javéna sendindle.

¹⁷Patiaibnaskire javéna te sykavén dasavé dívy: jone javéna Miré lavésa te tradén nalačhé dúhi, jone javéna te rakirén pe neve čibá (čibjá);

¹⁸jone javéna te len sapen vasténca ci te p'jen truta (otrava) i ni savó čoripén na javéla lénge, jone javéna te čhuvén vastá péskire pe nasvalende, i kodolé javéna te sastjon.”

¹⁹I kiéli Raj Devél Isúso phendiá lénge saró, tedy Jov sys ĥazdynó pe bolybén i besciá pe čačó vast Devléste Dadéste.

²⁰I jone vyginé i rosphendlé lav usiendie (viezdie), Raj Devél sys pašýl léngire réndy i Jov dophenelas léngire lavengiro čačipén znamienijénca (ĥiertykénca), savé džánas adáj že pal léngire lavá.