Read Biblija - Pe Baltitko Romani čib (Romanes) 2019 Baltic Romani Bible Marko 2 Bible Online

Marko 2 - Biblija - Pe Baltitko Romani čib (Romanes) 2019 Baltic Romani Bible bible

Marko 2

¹I pir vari-kicý dyvesá Isúso nevéstyr javdiá dro Kapiernaumo, i progijá šunybén, so Jov sys kheré.

²I skedynépe but manušá, so butýr na sys štéto, až pašýl vudár i Jov rakirdiá lav lénge.

³I jone javné ke Jov; štar manušá jandlé nasvales, savéste sys praličo.

⁴I pal-dová, so pal manušénde jone na mogindlé te janén les ke Jov, jone roskedyne kheréskiri stréha (čhakín) dro štéto, kaj Isúso sys terdó telál, i kerdé bu'glo progiiben, i odój jone zmekne matraco, pe savó sys paštó praličytko.

⁵Isúso, dykhí léngiro patiaibén, rakiréla nasvaleske: “Čháva, otmekenape gréhi tyré.”

⁶Vari-kon lylvaritkonendyr, savé sys bešté odój, rakirénas dre péste:

⁷“So Jov rakiréla adiáke? Jov teliakirela Devlés. Kon apríč Devléste rikiréla zor te otmekél gréhi?”

⁸Isúso sýges ĥalyjá léngiro rakiribén. “So tumé adiáke pal davá duminéna dre tumaré ile?” — rakiréla Jov lénge.

⁹So lokhedýr te phenés nasvaleske: “Otmekenape túke gréhi tyré”, ci “Uštý, le matraco péskiro i psir?”

¹⁰Adiáke, sob (kaj) tumé te džinén, so Čhavéste Manušeskireste isyn zor pe phuv te otmekél gréhi.” Tedy rakiréla Jov praličytkoneske:

¹¹“Túke rakiráva: “Uštý, le matraco péskiro i džá dro péskiro kher.”

¹²I jov jekhátyr (srázu), pe jakhá sarénde, uštyjá, skedyjá péskiro matraco i gijá javrí. Davá divinelas sarén, i manušá slavinenas Devlés i rakirénas: “Dasavo ame nijékhvar na dykhciam!”

¹³I Isúso gijá nevéstyr ke mórjo (derjáv), i pašýl Léste skedynépe but manušá i Jov sykliakirdiá len.

¹⁴Progii duredýr, Jov dykhciá Lievijos, Alfiejoskire čhavés. Odová sys beštó dro mytytko kher. “Jav Mánca”, — rakiréla Léske Isúso. Lievijo uštyjá i gijá pal Léste.

¹⁵I sys adiáke: kiéli Isúso sys beštó dro Alfiejoskiro kher, bešenas pal skamínd Lésa i Léskire sykliaibnytkonénca but mytoskire skedyibnarja i grehengire; sys but len, i jone džánas Lésa.

¹⁶I kiéli vari-savé Farisijendyr dykhné, so Jov xalas grehengirenca i mytoskire skedyibnar'jenca, jone rakirdé Léskire sykliaibnytkonénge: “Sóske Jov xála mytoskire skedyibnar'jenca i grehengirenca?”

¹⁷Isúso šundiá davá i phendiá: “Na saste manušénge trej sastypnari (doktoro), a nasvalenge. Me javdjom te prikharav na patiaibnytkonen, a grehengiren.”

¹⁸Sykliaibnýtka Ianoskire Boldeipnariskire i Farisiéi postinenaspe. Vari-savé poddžanas ke Isúso i phučenas: “Sóske Ianoskire sykliaibnýtka i Farisijengire postinenape, a Tyré sykliaibnýtka-nad?”

¹⁹Isúso otphendiá lénge: “Ci moginéna drúgi (malá) Terneskire te otphenenpe xabnastyr, kóli jone isyn pe Léskiro bjav? Paka Ternó isyn lénca, palsó lénge te postinenpe?

²⁰Ne javéna dyvesá, kiéli Ternó javéla lynó krig léndyr, tedy jone javéna te postinenpe dro dová dyvés.

²¹Nikón na čhuvéla pe phuranó uribén nevó pohtanytko kotér. Pal-dová so ljoha (dirka) butýr javéla.

²²Nikón na čhuvéla neví mol (vino) dro phurané cypitka goné, joj riskiréla len i mol vythadela i goné xasjona. Terný mol čhuvéna dre neve cypitka goné.”

²³Jekhvar dro sávato (subóta) Isusóske prigijape te džal givitkone feldasa. Sykliaibnýtka Léskire bokhalyne i lyné te zriskiren kolosy.

²⁴I Farisiéi rakiréna Léske: “Dykh, sóske jone keréna dová, so naštý te kerén dro sávato?

²⁵I jov rakiréla lénge: “Naúšto tumé na gindlé dro Svénto Čhinybén, so kerdiá králi Davído, kiéli jov i léskire malá bokhalyne:

²⁶davá sys tedy, kiéli rašángiro barydyró sys Aviafaro; syr Davído zagijá dre Khangirí i xaja odój dyibnytko maró, savó sys naštý te xal nikonéske apríč rašande! Jov xaja, i dyjá péskire malenge.”

²⁷I rakirdiá lénge: “Sávato (subóta) isyn vaš manušéske, a na manúš isyn vaš sávato;

²⁸pal-dová so Čhavó Manušéskiro isyn Xuláj i pe sávato.”