Read Biblija - Pe Baltitko Romani čib (Romanes) 2019 Baltic Romani Bible Marko 3 Bible Online

Marko 3 - Biblija - Pe Baltitko Romani čib (Romanes) 2019 Baltic Romani Bible bible

Marko 3

¹Isúso nevéstyr zagijá dre sinagoga, i sys odój manúš šuké vastésa.

²Dre sinagoga dykhenas rakhibnýtkes pal Léste, sob (kaj) te bangiakiren Isusós, ci na sastiakirelas Jov adales manušés dro sávato.

³I Jov rakiréla manušéske šuké vastésa: “Uštý i terdjov maškirál.”

⁴Tén'ci Jov rakiréla lénge: “So saštý [pir Zakóno-ju.o.] te kerés dro sávato: lačhipén ci fuipén, te rakhés džiibén ci te xasiakires?” Jone sys štyl.

⁵Tedy Isúso oblydžija len xoliamé dykhibnasa, i tugindia pal léngire pharé ile, i phendiá kaliekaske: “Protyrde tyró vast!” Jov protyrdyjá, i vast léskiro jaciá sastó sarésa.”

⁶Farisiéi vyginé, i khetané Irodianenca lyné te kerén zrakiribén te muliakirén Les.

⁷Isúso sykliaibnytkonénca giné ke mórjo (derjáv); i pal lénde giné but manušá Galilejatyr, Judejatyr,

⁸Jerusalimóstyr, Idumejatyr, pale Iordanostyr, šteténdyr Tirostyr i Sidonostyr. Šunybena pal dívy, savé kerélas Isúso, rozlydžinepe, i manušá zdžanaspe ke Jov.

⁹Jov phendiá sykliaibnytkonénge te skedén bárka (lodka) Léske, kóli manušá javéna te tasavenpe ke Jov.

¹⁰Pal-dová, so Jov vysastiakirdiá but manušén, saré, savénde sys nasvalypena (fránsy), čhurdenaspe ke Jov, sob (kaj) te čilaven Les.

¹¹Savénde sys nálačho dúho (fáno), dykhí Les, perenas angíl Léste pe phuv i dénas gódla: “Tu san Devléskiro Čhavó!”

¹²Ne Jov zorjása priphenelas nalačhé duhenge te na rakirén pal Léste.

¹³Isúso ĥazdyjápe pe bérga i khardiá ke pe manušén, savén Jov Kokoró vykedyjá, i jone javné ke Jov.

¹⁴I Jov vykedyjá dešudujen, savén Jov khardiá Apostolenca, sob (kaj) te javén Lésa, sob (kaj) te bičhavel len te phenén Léskiro lav,

¹⁵sob (kaj) lénde te javél zor te tradén nalačhé dúhi:

¹⁶ĥáda, isyn lavá adalé dešudujengire: Símono (les Isúso khardiá “Pétri”),

¹⁷Jakovo i Ioano, Zieviediejoskire čhavé, len Isúso khardiá ĥromoskire čhavé.

¹⁸Jendri (Andriejo), Filipo, Varfalamiejo, Matfiejo, Jakovo (čhavé Alfiejoskire) Fadiejo, Símono Kananito

¹⁹i Juda Iskarioto, savó i bikindia Isusós.

²⁰Isúso risijá dro kher; i skedynépe adakicyk but manušá, so Léske sykliaibnytkonénca sys naštý až te xan maró.

²¹Kiéli Isusoskiri seménca šundlé pal davá, jone javné te len Les, pal-dová so manušá rakirdé: “Jov isyn na dre Péskiri godý.”

²²Lylvarítka (knížniki), savé javné Jerusalimóstyr, dophenenas: “Dre Léste isyn Viel'zevulo. Jov tradéla javrí nalačhé dúhi nalačhé zorjása.”

²³Tedy Isúso otkhardia len, jaciá primierenca (sykaibnenca) te dophenel lénge: “Syr nálačho moginéla te vytradel nalačhés?

²⁴Kóli kralipén roskerdo (ulado) pe paš, jov na javéla terdó.

²⁵Kóli dre sém'ia (irí), saví dživéla dro kher, nane lado (miro), dasavo kher na javéla terdó.

²⁶Kóli nálačho džála maribnása proti péste, tedy syr jov moginéla te pirizorjakirel, pal-dová so léske xasibén javdiá.

²⁷I nikón na moginéla te javél ke zoralé-xulaskiro kher felatin i te občorel les, kóli angíl na phandela zoralé xulás, i korigedýr (pozžedýr) čorela saró léskire kheréstyr.

²⁸Čačes, Me rakiráva tuménge: ‘Saré gréhi i čoré lavá otmekenape manušéske, savé jov na’ phenelas;

²⁹ne košybén pe Svénto Dúho (Fáno) na otmekelape nikieli, grého davá jačélape pe dalé manušéste pe saré beršá.’”

³⁰Davá phendiá Jov, pal-dová so jone rakirdé: “Léste isyn nálačho dúho (fáno).”

³¹Javné daj i pšála Isusóskire i, terdii javrí, bičhadé te kharén Les.

³²Pašýl Léste sys bešté but manušá i phendlé Isusóske: “Tyrí daj i pšála rodéna tut javrí.”

³³“Kon isyn Mánge daj i pšála?” phuciá, — Isúso

³⁴Jov oblydžija jakhénca sarén, kon sys bešté pašýl Léste i rakiréla: “Davá isyn daj Mirí i pšála Miré;

³⁵Pal-dová so, kon keréla saró pir vólia Devléskiri, odová isyn Mánge pšal, i phen i daj.”