Read Biblija - Pe Baltitko Romani čib (Romanes) 2019 Baltic Romani Bible Marko 4 Bible Online

Marko 4 - Biblija - Pe Baltitko Romani čib (Romanes) 2019 Baltic Romani Bible bible

Marko 4

¹Isúso nevéstyr (nevés) sykliakirelas pe morjoskiro (derjavéskiro) brégo; pašýl Léste skedynépe adákicy manušá, so Jov besciá dre bárka, sob (kaj) te javél dro mórjo (derjáv), a, sob (kaj) saré manušá te jačénpe pe phuv pe brégo.

²Isúso sykliakirelas len buté primierenca (sykaibnenca), rakirí:

³“Šunén! Jekh gavitko vygijá pe félda te sieinel

⁴i sys adiáke: kiéli jov rosčhurdelas ziárki, tedy vari-savé ziárki pyné pašýl drom. Privurniandyne čirikliá i xané len.

⁵Javír ziárki pyné pe baruno štéto, kaj sys nábut phuv; jone barine upré sýges, syr na sys xor dre phuv;

⁶a kóli jaciá xačkiribén khamestyr, rostki (ščuki) murdalyne (zvianindle) i zašutine, pal-dová so kórni (rukhá) lénde na xor sys.

⁷Javír ziárki pyné dre dylyny čar, dylyné čarjá barine upré i zamardé len, i jone na dyné pribaripen.

⁸A javír ziárki pyné pe lačhí phuv, dyné pribaripen dre trijánda i dešušovdeša i šel móly!”

⁹I Isúso rakirdiá lénge: “Konéste isyn kaná, mek te šunél.”

¹⁰Kiéli manušá rozginepe i Isusósa jačnépe dešudúj i javír manušá, savé šundlé Les, jone phučné Léstyr, so značynena dalé primiery (sykaibena)?

¹¹I Jov rakirdiá lénge: “Garadé čačipená Devléskire Kralipnaskire dyné tuménge. Ne kon isyn durál Kralipnastyr, odolénge rakirelape primierenca (sykaibnenca).

¹²Jone dykhéna jakhénca, i na dykhéna, jone šunéna, i na ĥaljona; a kóli jone riskirenas péskiro džiibén ke Devél, tedy jone javénas primangne.”

¹³Duredýr rakiréla Jov: “Naúšto i tumé na ĥaljona davá primiéro (sykaibén)? Syr tumé tedy ĥaljona saré primiery (sykaibena)?

¹⁴Sieinybnaskiro čhuvéla dre phuv Devléskiro lav.

¹⁵Isyn manušá, savé isyn sýrby daja ziárka pašýl drom. Syr féni (tóka) jone šunéna lav, to javéla nálačho i čorela les léndyr.

¹⁶Isyn adasavé manušá, savé isyn sýrby daja ziárka, saví posieindly pe baruno štéto: jone šunéna lav i jekhátyr (srázu), ake, priléna les radymása.

¹⁷A adiáke, syr kórni (rukhá) xor lénde nane, tedy jone sys sarésa nadlenga. Kóli pal prilyno lav jone dykhéna tradypen i pharipén, jone mekéna lav jekhátyr.

¹⁸Javír ziárki, savé počhude dre dylyny čar, isyn sýrby manušá, savé šunéna lav:

¹⁹ne kažno dyvesýtko košybén, xohaibén pal barvalypén, javír mysli pe iló javéna i murdiakirena dre lénde lav i keréna les bibarjakirdoneskiresa.

²⁰Ziárki, savé počhude pe lačhí phuv, isyn sýrby manušá, savé šunéna lav, priléna les i déna pribaripen dre trijánda i dre šovdešá i dre šel móly.”

²¹Isúso phendiá lénge: “Kóli zahačkirena momoly, na čhuvéna la tel piriskirdy pirí ci tel čhuibén? Naúšto na čhuvéna la dro šandalo (podsviečniko)?

²²Pal-dová so nisó nane čorahano; sob (kaj) te na javél bicialó (dyc'lo), nisó nane sčhakirdo, sob (kaj) te na vydžál pe dud (svéto), pe jakhá manušénge.

²³Konéste isyn kaná, mek te šunél!”

²⁴I rakirdiá lénge: “Ripiren mištó davá, so tumé kakaná šunéna: savjása mierasa tumé mierinena, adiáke tumen javéna te mierinen i iščo (inké) butýr.

²⁵A konéste isyn, odoléske iščo (inké) javéla dynó, a konéste nane, odoléstyr javéla otlyno i dová nábut, so isyn.”

²⁶Isúso rakirdiá duredýr: “Devléskiro Kralipén isyn sýrby jekh manúš, savó sieinela félda;

²⁷i ratý manúš isyn sutó, pe zlóko (pe ránko) uštéla, i prodžána (nakhena) dyvesá, ziárki ĥazdénape i barjona, a manúš kokoró na džinéla, syr davá saró kerélape.

²⁸A phuv kokori barjakiréla. Angíl sykadjola rostko (ščuko), tén'či koloso, koloso pherdjola ziarkasa.

²⁹Kóli ziárka vyspiainela, javéla sčhinyben, tedy gavitko javéla sierposa (čhindlesa) te čhinel.”

³⁰Isúso rakirélas duredýr: “Sósa saštý (možna) te roŭninas Devléskiro Kralipén? Save primierosa (sykaibnasa) saštý les te sykavas?

³¹Jov isyn syr garčyčno ziárka, saví isyn naj tyknedýr saré ziarkendyr pe phuv, i manúš čhuvéla la dre phuv,

³²Ne kiéli joj vybyrjola, tén'či javéla baredýr javirendyr barjakirdone raslinendyr. Tel lákire baré randiá čirikliá moginéna te khuven gniázdy (kúfy) dre randiengiri zer (tienjo).”

³³Adiáke primierenca (sykaibnenca) Isúso sykliakirdiá manušén pe adákicy, pe kici jone mogindlé te ĥaljon;

³⁴bi primierengiro Jov sarésa na sykliakirdiá, ne kiéli Jov jačelaspe jekhdžinó péskire sykliaibnytkonénca, Jov saró piriphenelas lénge.

³⁵Dro dová dyvés, bel'velié, Isúso phendiá Ppeskire sykliaibnytkonénge: “Piridžasa pe javír rig.”

³⁶I kiéli jone otmekne manušén, jone lyné Les pésa dre daja-pac' bárka, kaj Isúso sys; i javír barki sys Lésa.

³⁷I, ake, pe mórjo (derjáv) ĥazdyjápe zoralý balvál. Pani marelas zoralés pir barkakiro borto i začhuvelas la.

³⁸Isúso dro dová časo sys sutó pe korma, čhuvi šeranduny tel šeró. Sykliaibnýtka džangavenas Les, i phendlé Léske: “Sykliakiribnáskiro! Túke so, usajékh isyn, so ame xasjovasa?”

³⁹Isúso uštyjá, priphendiá balvaliake te na phurdel i phendiá valnenge: “Štyl! Pirijačen!” I balvál štylyja i jaciá divno štylypen.

⁴⁰“Ne, so tumé strahádyne? — phendiá Jov lénge, — kaj isyn tumaró patiaibén?”

⁴¹Piristrahade sykliaibnýtka phučenas jekh jekhestyr: “Ne kon Jov isyn adasavó, so i balvál i mórjo (derjáv) Les kandéna?”