Read Biblija - Pe Baltitko Romani čib (Romanes) 2019 Baltic Romani Bible Marko 5 Bible Online

Marko 5 - Biblija - Pe Baltitko Romani čib (Romanes) 2019 Baltic Romani Bible bible

Marko 5

¹Isúso i Léskire sykliaibnýtka javné pe javír morjoskiri rig pe štéto Gadarino.

²Syr Isúso vygijá barkatyr pe brégo, adáj že angíl Léste maĥilytkone koplicendyr vygijá manúš, savéste sys nálačho dúho (fáno).

³Adavá manúš dživdiá maškír koplicy. I nikón na moginelas te phandel les až zandir'jenca (cepenca)

⁴Pal-dová so but móly les phandenas pir vastá i ĥerá zandir'jenca i vastytkone sastyrenca, i kažno mólo jov rozriskirelas len. Jov sys adasavó zoraló, sob (kaj) te zrikiren les.

⁵Dyvesé i ratý, jov psirelas pir koplicy i bérgi, i godlása marelas pes pir bará.

⁶Jov durál dykhciá Isusós, podprastandyja ke Jov i pyjá pe čangá angíl Léste;

⁷i dyjá gódla zoralés: “So Túke trej mándyr, Isúsie, Naj Vučedyreskiro Devléskiro Čhavó! Sovlahá Devlésa, so na menčynesa Tu man?”

⁸Pal-dová so Isúso priphendiá nalačhé duhoske: “Džá javrí adalé manušéstyr, nálačho dúho (fáno)!”

⁹Isúso phuciá: “Syr tut kharéna?” “Liegiono — phendiá odová, — pal-dová so amen isyn but.”

¹⁰Jov lyjá drieván te mangél Isusós te na vytradel nalačhé dúhi dalé štetóstyr.

¹¹Pašýl bérga dro davá časo čaradepe but balyče,

¹²nalačhé dúhi pomangne Isusós: “Mek amen te zadžas dre balyčende.”

¹³Isúso jekhátyr (totčas) domekcia, sob (kaj) nalačhé dúhi (fany) te vydžán adalé manušéstyr i te zadžán andré dre balyčende. Saré pašé duj bará (tysjoncy) šeré jekhátyr (srázu) čhurdynepe bregoskire krutymatyr dro paní i tasadyne.

¹⁴Balyčengire čaraibnarja tedy poprastandyne pir štetytka gavá te rosphenén pal dová, so kerdiápe. E manušá giné te dykhén, so kerdiápe.

¹⁵I javéna ke Isúso i dykhéna, so manúš, savés rikirdia nálačho dúho (fáno), sys beštó dro uribén, dre péskiri godý; kodová-pac', dre savéste sys but nalačhé dúhi. Jone saré piristrahadyne.

¹⁶I manušá, savé dykhné davá saró, rosphenenas, syr saró sys duhenca i balyčenca.

¹⁷I jone lyné te mangén Isusós, sob (kaj) Jov te džal krig léngire štetóstyr.

¹⁸Kiéli Isúso bešelas dre bárka, tedy manúš, savéstyr sys vytradyné nalačhé dúhi, mangelas Isusós te lel les Pésa.

¹⁹Ne Isúso na dyjá léske te džal pal Léste. “Džá kheré — rakiréla Jov léske”, — i rosphen sarénge, so túsa kerdiá Raj Devél, savó lačhipén Jov túke kerdiá i syr potangindia tut.’”

²⁰I jov gijá i jaciá te rosphenel dre Dešuforja, so kerdiá léske Isúso. Saré divindlépe.

²¹Kiéli Isúso risijá pale pe javír rig dre bárka, ke Jov skedynépe but manušá. Jov jaciápe pe brégo.

²²I javélas Iairo, jekh barydyró sinagogatyr, i, syr dykhciá Isusós,

²³to pyjá ke Léskire ĥerá, i jaciá te mangél Les: “Mirí čhaj meréla, jav i čhuv upré vastá pe láte, sob (kaj) joj te vysastjol i te dživél!”

²⁴I Jov (Isúso) gijá lésa; pal Léste giné but manušá, tasavi Les.

²⁵I sys džuvlý, saví dešudúj berš sys nasvaly ratvalypnasa,

²⁶joj vyrikirdia but, pal-dová so sastiakirelaspe butende sastypnar'jende (doktorende), rozdyja pe sastiakiriben but lové, a zamiést fedyripen, lákiro nasvalypen jaciá fujedýr.

²⁷Kiéli joj šundiá pal Isusóste, joj podgíia ke Jov palalestyr maškír manušénde i čiladiá Léskiro uribén;

²⁸“Kóli Mánge jekh uribén Léskiro te čilavav, tedy me vysastjovavas”, — rakirdiá joi;

²⁹i adáj že lákiro rat pirijaciá te džal, i joj šundiá dro péskire masá, so joj sastija péskire nasvalypnastyr.

³⁰Isúso jekhátyr ĥalyjá, so Léstyr vygijá zor, Jov risija i phuciá: “Kon čiladiá Miro uribén?”

³¹I Léskire sykliaibnýtka rakirdé Léske: “Trusciál (krugom) Túte isyn adákicy manušá i Tu phučesa, kon Tut čiladiá?”

³²Isúso oblydžija manušén dykhibnasa, sob (kaj) te dykhél, kon davá kerdiá.

³³A džuvlý, syr ĥalyjá, so sys lása i triinskiri darátyr, podgíia, pyjá ke Léskire ĥerá i rosphendiá saró čačipén.

³⁴Jov phendiá láke: “Čháie Mirí! Patiaibén tyró zrakhciá tut! Džá bahtiasa, jav sasty tyré nasvalypnastyr.”

³⁵Paka Isúso rakirdiá džuvliása, javné sinagogakire-barydyreskire Iairoskire kheréstyr manušá, savén bičhadé, i rakiréna Léske: “Čhaj Tyrí myjá, palsó iščo (inké) te pharjakires Sykliakiribnaskires?”

³⁶Ne Isúso, syr šundiá dová, so rakirdé, phendiá sinagogakire barydyréske: “Na andyrša, féni (tóka) patia!”

³⁷I Jov na domekcia nikonés te džal Lésa, apríč Petriste, Jakovoste i léskire pšaléste Ianoste.

³⁸I, ake, jone javné dro Iairoskiro kher i odój dykhné pherdó manušén, maškír savénde sys šumo godlenca; jone godlenas, i rondlé jasvénca.

³⁹Syr Jov zagijá dro kher, to phendiá lénge: “Palsó tumé keréna šumo i rovena; patyvalý terný džuvlý na myjá, joj isyn suty.”

⁴⁰I jone sandlepe Léstyr. Isúso phendiá sarénge te džán javrí, ne Kokoró Jov patyvalé-terné-džuvliakire dadénca i triné sykliaibnytkonénca zagijá dre štúba, kaj patyvalý terný džuvlý sys pašty.

⁴¹Lyi la pal vast, Isúso phendiá patyvalé terné džuvliáke: “Talita kumi!” (So značynéla Romanes: “Terný Džuvlíje, Túke rakiráva, uštý!”).

⁴²Patyvalý terný džuvlý jekhátyr uštyjá i jaciá te psirél; láke sys dešudúj berš. I saré jekhátyr jačné štyl divostyr.

⁴³Isúso šylales priphendiá lénge nikonéske te na rakirén pal davá, so sys; a patyvalia-ternia-džuvliá phendiá te čaliakiren.