Read Biblija - Pe Baltitko Romani čib (Romanes) 2019 Baltic Romani Bible Marko 6 Bible Online

Marko 6 - Biblija - Pe Baltitko Romani čib (Romanes) 2019 Baltic Romani Bible bible

Marko 6

¹I Isúso gijá odothýr i javdiá pale dro péskiro fóro, katýr Jov sys rodosa; i Léskire sykliaibnýtka giné pal Léste.

²Kiéli javdiá sávato (subóta), Jov lyjá te sykliakirél dre sinagoga; saré šundlé Les i divindlépe: “Katýr Léste saró davá isyn? Katýr isyn dasaví bari godý? Syr Jov keréla dasavé dívy Péskire vasténca!

³Ci davá na Jov isyn skamindári, Marjakiro čhavó, a pšála Léste Jakovo, Joza, Juda i Símono? I pheniá Léskire isyn adái.” Davá xoliakirdia len.

⁴I Isúso phendiá lénge: “Manušá kutiakirena (patyvakirena) prorokén na pe péskiri phuv, dro péskiro kher i maškír péskire semencende”

⁵Na Jov na mogindiá te kerél odój baré dívy pal léngiro napatiaiben, na giny nábut nasvalen, pe savénde Jov čhuvelas upré vastá i vysastiakirdiá len.

⁶Jov divindiape doléstyr, so dre lénde nane patiaibén. I Jov jaciá te psirél pir pašatuné gavá te sykliakirél.

⁷Jov khardiá khetané Dešudujen sykliaibnytkonén i bičhadiá len pir dujende; dyi lénge zor te tradén javrí nalačhé dúhi;

⁸i dyjá lénge, ake, savó priphenybén: “Na len pésa nisó, apríč destó; ni xabén, ni gonó, ni lové pal kustýk,

⁹a te ur'jen curúli (cendali), i na len pésa duj gada.

¹⁰I Jov rakirdiá duredýr lénge: “Karik tumé te na zadžanas dro kher, jačénpe odój, paka tumé džána krig dolé foróstyr;

¹¹i kóli tumen na priléna, ci na zakamena te šunén, tedy džán javrí, strinskiren bláta tumaré ĥerendyr syr dophenybén vaš lénge.”

¹²I jone giné i jačné te phenén lav manušénge pal risiben grehéndyr ke Devél.

¹³I jone tradenas javri nalačhé dúhi i sastiakirenas buté nasvalen, čhuvi olivítko dzet pe lénde.

¹⁴I šundiá králi Irodo pal davá, pal-dová so Isusóskiro lav jaciá džindló; i manušá rakirdé: “Iáno Boldeipnari otdžidyjá muléndyr, i paldavá léste isyn dasaví zor.

¹⁵A javír rakirdé; “Davá isyn Ilíia.” A trita rakirdé: “Adavá isyn jekh ĥaratuné prorokendyr.”

¹⁶Kiéli Irodo šundiá dalé rakiribena, jov phendiá: “Iáno, savéske me otčingirdjom šeró, otdžidyjá muléndyr.”

¹⁷Pal-dová so Irodo kokoró priphendiá te len Ianos i te čhuvén les dro štaribén pal Irodiadate, léskire-pšaléskire Filiposkire romniáte, konés jov lyjá paloróm.

¹⁸Pal-dová so Iáno rakirdiá Irodoske: “Túke naštý te lespe péskire-pšaléskire romniása.”

¹⁹Irodiada rikirdia xolý pe Ianoste i rodelas saštypen (vozmožnost') te xasiakirél les, ne joj na mogindiá,

²⁰pal-dová so Irodo dardiape Ianóstyr i rakhelas les; Irodo džindiá, so Iáno sys čačunó i svénto manúš; but daléstyr, so rakirdiá Iáno, začhuvelas Irodos te zaduminelpe, i Irodo usajékh mangdiá te šunél les.

²¹Ne syg, ake, dasavo dyvés javdiá, kiéli Irodoste sys bijanypnytko dyvés, jov khardiá pe svénko péskire barvalé pašatuné ran, tysjoncengire-xaladytkone barydyrén i samone patyvalé manušén dre Galiliéia,

²²tedy Irodiadakiri čhaj zagijá i adiáke kheldia, so kokoró Irodo i léskire gosti javné dre bari rádyma; i králi phendiá raklorjake: “Phuč, so túke isyn pir iló? Saró túke me dáva!”

²³I jov sovlahadiá láke: “Mang mándyr dová, so túke isyn pir iló, saró túke otdáva! Až ke paš miro kralipén!”

²⁴Joj vygijá ke daj te phučel, so te mangél. “Mang Ianoskire-Boldeipnariskiro šeró”, — sýges phendiá odoia.

²⁵I adáj že rakly risija murškanés ke králi i mangdiá: “Mangav, sob (kaj) tu kakaná mánge te des Ianoskire-Boldeipnariskiro šeró pe čaró.”

²⁶Králi zoralés lyjá dro šeró péske, ne te otphenel láke na zakamdiá, adiáke syr jov dyjá sovláh angíl sarénde, kon sys pal skamínd.

²⁷I jekhátyr (srázu) králi bičhadiá katos i priphendiá léske te janel Ianoskiro šeró. I jov gijá i otčingirdia šeró léske dro štaribén,

²⁸i jandiá Léskiro šeró pe čaró i otdyjá les raklorjake; a raklori péskire dáke.

²⁹Kiéli Ianoskire sykliaibnýtka uĥalyne pal davá, jone javné, zakedyne léskiro trúpo i ĥaradé les.

³⁰Apóstoly skedynépe ke Isúso, i rosphendlé Léske saró, so jone kerdé, pal so jone sykliakirenas manušén.

³¹I Jov phendiá lénge: “Džán pe bimanušengiro štéto, tuménge trej te javén jekhdžine i te otkhinjon.” Pal-dová, so sys odój but manušá, savé javénas i džánas, lénde na sys až časo te xan.

³²I jone otplyvindle (dyné plíma duredyr) pe bárka (lodka) pe štéto, kaj nikonés na sys.

³³Ne manušá dykhné, so jone durjonas, i but udžindlé pal davá i prastanas odorík saré for'jéndyr i javné angíl lénde.

³⁴Kiéli Isúso vygijá pe brégo i dykhciá but manušén, Jov potangindia len, pal-dová so jone sys syr bakriá bi čhupnariskiro; i Jov jaciá len te sykliakirél.

³⁵Syr javdiá bel'vél', sykliaibnýtka podginé ke Isúso i rakiréna: “Ĥáda, uže baró časo i štéto adáj isyn bimanušengiro.

³⁶Otmek manušén, mek jone te džán dre pašatuné gavá, sob (kaj) te kinen péske vari-so xabnastyr.”

³⁷Ne Isúso otphendiá: “Tumé den lénge te xan.” Sykliaibnýtka ĥazdynépe: “Naúšto Tu myslinesa dro iló, sob (kaj) ame te zakinas maró pe dujšelá dinarii te das te xan adalé manušénge?”

³⁸“Kicý tuménde isyn laby maró?, — phučela Isúso, džán, dykhén.” Jone giné, uĥalyne, i rakiréna: “Pandž maré i duj mačhé.”

³⁹Isúso phendiá te bešliakiren manušén riadenca pe zeleno čar.

⁴⁰Saré bešné dre riady pir pandždešá i pir šel manušá.

⁴¹Isúso lyjá pandž maré i duj mačhé, ĥazdyjá jakhá pe bolybén i bahtiakirdiá xabén, i phagirdiá laby maró i lyjá te piridel sykliaibnytkonénge i odolé rozdenas manušénge; i roskerdiá Jov duj mačhé pe sarénde.

⁴²Saré xané i čalyne.

⁴³I jone skedyné dešudúj korzíny (khudé) marésa i mačhenca koterendyr (kuskendyr), so jačnépe.

⁴⁴I sys pandž tysjoncy muršá, savé xané laby maró.

⁴⁵Jekhátyr (srázu) paló davá Isúso priphendiá Péskire sykliaibnytkonénge te bešén dre bárka te piriplyvinen (dénas plíma pirdal) pe javír rig ke Vifsaida, paka Jov otmekéla manušén.

⁴⁶I kiéli Jov roziaciape i otmekciá manušén, to gijá upré pe bérga te mangélpe Devléske.

⁴⁷I kiéli javdiá bel'vél', bárka sys maškirál mórjo (derjáv), a Isúso sys jekhdžinó pe brégo.

⁴⁸I syr Jov dykhciá, so jone griebinenas vjoslenca (rovlienca) pir zor, pal-dová so balvál sys pe lénde — sys maškír tríto i štárto mardó (štúnda) ratiákiro, ĥáda, Jov lyjá te džal ke jone, štavindoj pir mórjo (derjáv); i Jov myslindia dro iló te prodžal pašé lénde duredýr,

⁴⁹ne kiéli jone dykhné, so Jov džála pir mórjo (derjáv), jone dumindle (dyné gody peske), so davá sys zdanki i zadyne gódla.

⁵⁰Pal-dová so jone saré dykhné Les i strahádyne; a Isúso jekhátyr lyjá te rakirél lénca: “Rikirenpe murškanés, davá som Me. Na andyršan!”

⁵¹I Jov zagijá andré ke jone dre bárka, i balvál štylyja. Jone sys drieván zdivindle;

⁵²pal-dová so jone iščo (inké) na ĥalyné dívo marésa, léngire ile sys pharé te ĥaljon.

⁵³I kiéli jone piriplyvindle (dénas plíma pirdal) pe javír rig pe Gienisarietoskiri phuv, jone terdiné ke brégo.

⁵⁴Syr jone giné javrí barkatyr, manušá jekhátyr uĥalyne Isusós;

⁵⁵jone prastandoj obgine pir saré štéty i syg ke Isúso lyné te janén nasvalen pe matracy odorík, kaj jone šundlé, so Isúso sys.

⁵⁶I kaj Jov te na javélas dre fórja ci dre gavá, manušá čhuvénas nasvalen pe štéty javrí [targitka štéty-ju.o.] i mangenas Les te mekel len i mek féni (xoc') te čilaven Léskiro uribén; saré, kon čilavenas, odolé vysastjonas.