Read Biblija - Pe Baltitko Romani čib (Romanes) 2019 Baltic Romani Bible Marko 9 Bible Online

Marko 9 - Biblija - Pe Baltitko Romani čib (Romanes) 2019 Baltic Romani Bible bible

Marko 9

¹I Jov rakirdiá lénge: “Čačes, Me rakiráva tuménge: adáj isyn terdé vari-savé, savé na meréna, paka jone dykhéna, syr javéla Devléskiro Kralipén dre sarí Léskiri zor.”

²Pir šov dyvesá Isúso lyjá Pésa Petris, Jakovós i Ianos i jandiá len pe vučí bérga. Odój pe jakhá sykliaibnytkonende Jov parudyja:

³Léskiro uribén jaciá drieván parnó, parnedyr kažnoné parnypnastyr dro svéto, so moribnaskiro (suknovalo) moginéla te kerél.

⁴Tén'ci sykadyne Ilíia i Mójza, i jačné te rakirén Isusósa.

⁵Pétri phendiá Isusóske: “Ravvi, aménge adáj isyn adiáke šukár! Kerása adáj trin šátry: jekh Túke, jekh Mojzáske i jekh Ilijaske.”

⁶Darátyr jov kokoró na džindiá, so rakirdiá, pal-dová so jone sys dre bari dar.

⁷Ne adáj ža sykadyjá óbloko, čhakirdia len i oblokostyr rozdyjape zan!: “Kadavá isyn Miro drógo Čhavó, Les šunén!”

⁸I saré jekhátyr obdykhne pašýl i na dykhné nikonés, apríč jekhe Isusóste lénca.

⁹Kiéli jone džánas telé bergátyr, Isúso angilpriphendia lénge, sob (kaj) jone ni konéske te na rakirén, so jone dykhné, paka Čhavó Manušéskiro na otdžidjola muléndyr.

¹⁰Jone rakhne davá dre péste, a maškír péste but móly rakirdé pal davá, syr te ĥaljon Léskire lavá ‘otdžidjola muléndyr’.

¹¹I phučenas Léstyr, rakirí: “Sóske ž lylvarítka (knížniki) rakiréna, so Ilíia angledýr sys bangó (musindia) te javél?”

¹²I Jov otphendiá lénge: “Čačó, so Ilíia angledýr sys bangó te javél i te kerél saró nevéstyr, syr i isyn čhindló pal Čhavéste Manušeskireste, so prijavelape Léske but te pirilydžal mén'ki, i so Jov javéla ladžakirdó?

¹³Ne Me rakiráva tuménge, so Ilíia uže javdiá, i manušá kerdé Lésa, so sys pe iló lénde, syr davá i sys čhindló pal léste.”

¹⁴Kiéli jone javné pale ke sykliaibnýtka, tén'či dykhné pašýl lénde but manušén i lylvaritkonen, savé dophenenas lénge.

¹⁵I jekhátyr (srázu), kiéli saré manušá dykhné Les, jone divindlépe zoralés, lyné te podprastan ke Jov te den “dobridim” Léske.

¹⁶“Pal so tumé dophenena jekh jekhéske?” — phuciá Isúso léndyr.

¹⁷I jekh manúš otphendiá Léske: “Sykliakiribnariskiro, me jandjom ke Tu miré čhavés, dre léste zagijá nálačho dúho (fáno) i čhavó na rakiréla.

¹⁸I kaj nálačho dúho (fáno) les te na uhtylel, to jov ravela les telé, adavá manúš mekéla piena móstyr, jov skriežytynela dandenca i jačélape syr kašt. I adiáke me rakirdjom Tyré sykliaibnytkonénge, sob (kaj) jone te vytraden davá nálačho dúho (fáno) javrí, ne jone na dyné ráda.

¹⁹Isúso otphendiá kadasavé lavénca: “O, napatiaibnytko ródo! Kicý Mánge te javav tuménca? Ci but Mánge te vyrikirav tumen? Janén les ke Me!”

²⁰Tén'ci jone jandlé les ke Jov. I kiéli jov dykhciá Les, jekhátyr nálačho dúho (fáno) zoralés trinskirdia les, i jov pyjá pe phuv i radiape, i mekelas piena móstyr.

²¹I phuciá Isúso léskire dadéstyr: “Syr ĥará (dlúges) davá kerélape lésa?” I jov phendiá: “Tyknybnastyr.

²²I častes dúho čhurdelas les dre jag i dro paní te xasiakirél les. Ne kóli tu désa ráda te kerés vari-so, mek te javél túke pe iló te des vast aménge.”

²³O Isúso phendiá Léske: “Kóli tu moginésa te patias nábut, saró moginéla te javél kodoléske, kon patiála.

²⁴Jekhátyr (srázu) terné-beršengiro dad dyjá gódla i phendiá jasvénca: “Rajo Dévla! Me patiáva, pomogin Miré napatiaibnaske!”

²⁵Kiéli Isúso dykhciá, so manušá lyné te prastan ke davá štéto, jov štyliakirdia nálačho dúho (fáno), phení léske: “Dúho (Fáno) kašuko i muto (niemo), me priphenava túke, te džas krig léstyr, i, sob (kaj) butýr te na zadžas!”

²⁶Tén'ci nálačho dúho (fáno) dyjá gódla, trinskirdia zoralés les i gijá krig léstyr. I adavá manúš jaciá sýrby muló, paldavá but manušá phendlé: “Jov isyn muló.”

²⁷Ne Isúso lyjá terné-beršengires paló vast, pomogindia (dyjá vast) te ĥazdelpe i odová uštyjá pe ĥerá.

²⁸Kiéli Isúso zagijá dro kher, Léskire sykliaibnýtka jekh pe jekh phučné Léstyr: “Sóske ame na mogindiam te vytradas nálačho dúho (fáno)?”

²⁹I Jov phendiá lénge: “Dasavo dúho (fáno) vytradelape féni (tóka) mangipnasa i postosa.

³⁰Isúso i sykliaibnýtka giné péske dalé štetóstyr i giné pirdál Galiliéia. Isúso pričhudia zor te kerél adiáke, sob (kaj) manušá te na džinén, kaj Jov sys.

³¹Pal-dová so Jov sykliakirdiá Péskire sykliaibnytkonén, i phendiá lénge: “Čhavés Manušeskires zdena dre manušéngire vastá, i jone muliakirena Les; i muliakirdo Jov otdžidjola pir trin dyvesá.”

³²Ne jone usajékh na ĥalyné dalé lavá, a te phučén Léstyr darándyne.

³³I jone javné dro Kapiernaumo. Kiéli Isúso sys dro kher, Jov phučelaspe léndyr: “Phenén, pal so tumé dénas duma pir drom?”

³⁴Jone ž sys štyl; pal-dová so pir drom rakirdé jekh jekhésa, kon isyn naj baredýr maškír lénde?

³⁵Isúso besciá, skedyjá len trusciál (vokrug) Péste i rakiréla: “Kon vykedéla te javél anglatunó, odová mek te javél palatunó i butiarno vaš sarénge.”

³⁶Jov lyjá tykné bijatós (čhavores) pe vastá, oblyja les, čhudiá les maškirál i phendiá lénge:

³⁷“Kon priléla ke pe jekhés adasavé bijatós vaš Miro lav, odová i Man priléla, a kon priléla Man, odová priléla Odolés, Kon bičhadiá Man?”

³⁸Iáno phendiá Isusóske: “Sykliakiribnáskiro! Ame dykhciam manušés, savó Tyré lavésa vytradela nalačhé dúhi (fany) i ame léske phendiam te pirijačel, pal-dová so jov na sys aménca.”

³⁹“Na zaphenen Léske, — phendiá lénge Isúso, — kon Miré lavésa keréla dívo, odová na moginéla te phenél čoripén pe Mánde.

⁴⁰Kon isyn pal aménde, odová nane proti aménde.

⁴¹Kóli vari-kon déla tuménge tahtáj (čaša) šylale paniésa, vaš Miro lav, pal-dová so tumé san Xristosóskire, čačes Me rakiráva tuménge: jov na xasiakiréla otdyibén Devléstyr.

⁴²I kon zlydžala ke grého adasaven tyknen, savé patiána dre Mánde, tedy fedýr javélas léske te ur'jel siavitko (miel'nično) bar pe men i te čhurdén les dro morjoskiro (derjavéskiro) xoripén.

⁴³Kóli tyró čačó vast zlydžala ke grého tut, čingir krig les. Fedýr javélas túke te zadžas dro džiibén jekhe vastésa, syr duje vasténca te zadžas dro liúno (ado), dre jag, so nijékhvar na murdjola.[1]

⁴⁴

⁴⁵I kóli tyrí ĥerój zlydžala ke grého tut, čingir krig la. Fedýr javélas túke te zadžas dro džiibén langalesa, syr duje 'gerenca te čhurdén tut dro liúno.[2]

⁴⁶

⁴⁷I kóli tyrí jakh zlydžala ke grého tut, vyle la. Fedýr javélas túke te zadžas dro Devléskiro Kralipén jekhe jakhasa, syr dujo jakhénca te čhurdén tut dro liúno,

⁴⁸kaj isyn kirmo, savó xála len, savo na muljola, i jag, saví xačkiréla len, so na murdjola.

⁴⁹Kažno manúš javéla žužakirdo i sýrby londiakirdo jagása.

⁵⁰Lond isyn kuč, ne kóli lond jačéla bi londypnaskiro, sósa londiakiresa lond pale? Te javél lond dre tuménde, i te javén tumé dro ramánjo (miro) jekh jekhésa!”