Read Biblija - Pe Baltitko Romani čib (Romanes) 2019 Baltic Romani Bible Luka 1 Bible Online

Luka 1 - Biblija - Pe Baltitko Romani čib (Romanes) 2019 Baltic Romani Bible bible

Luka 1

¹Pal-dová so, syr but manušá uže lynepe te čhinen rosphenyben pal dová, so sys maškír aménde i, so isyn drieván džindló tuménge,

²jone udžindlé manušéndyr, savé pérva dykhné dová péskire jakhénca i služyndle (dynarindlé) vaš Devléskiro lav, adiáke jone piriphendle aménge.

³Paldavá zdyjape i mánge, so javéla mištó te čhinav túke, baró Tieofilie, paló dová, syr me lačhés rozĥalyjom davá saró anglypnástyr,

⁴sob (kaj) tu te džinés čačipén pal dová, dro so tut sykliakirdé.

⁵Dro dolé dyvesá, kiéli Irodo sys králi pir Judéia, dživdiá jekh rašáj pir lav Zahárija Avijaskire rašángire rodóstyr, péskire romniása, Aronoskire rodóstyr pir lav Jelizavieta.

⁶Jone ž sys dujdžiné čačuné angíl Devléste, rikirdepe ke Devléskire priphenybená i Zakóno.

⁷Lénde na sys čhavoré, pal-dová so Jelizavieta na mogindiá te bijanél, jone dujdžiné sys phuré pir beršá.

⁸I sys adiáke: jékhvar, kiéli Zahárija kerdiá péskiri butý syr rašáj angíl Devléste, syr sys prilyno péskire rodóstyr,

⁹pal rašángiro dorakiribén pir žriébijo léske treindiá te zadžál dre Khangirí i te thuvliakirel gudlé smolenca ladanostyr,

¹⁰i saré manušá mangnepe Devléske javrí dro davá časo, kiéli sys thuvliakiriben gudlé smolasa.

¹¹I sykadyjá Zaharijaske Devléskiro Jangólo, savó sys terdó pir čačí (pravo) rig thuvitkone (kadilytkone) altarjostyr.

¹²Zahárija strahadyja, kiéli dykhciá les, i dar pyjá pe léste.

¹³Ne Jangólo phendiá Léske: “Na andyrša, Zahárija, pal-dová so Devél šundiá tyró mangipén, i tyrí romný bijanéla čhavés, i tu désa lav Léske Iáno.

¹⁴I javéla túke bari rádyma i viesjolyma (loš), i but manušá javéna te radynénpe léskire bijanypnastyr.

¹⁵Pal-dová so jov javéla baró angíl Raste-Devléste, i jov na javéla te p'jel mol (vino) i zoralé pibena, i Svénto Dúho (Fáno) javéla dre léste adáj že, syr jov bijandjola,

¹⁶i jov riskiréla pale ke Léngiro Raj Devél buten Izrailjoskire čhavén.

¹⁷I jov javéla angíl Raste-Devléste, zorjása i duhósa syr Ilíia, i jov keréla ramánie (miro) maškír dadende i čhavénde, riskiréla pe čačunó drom kodolén, savé na kandéna Devlés, sob (kaj) te skedel manušén vaš Ráske-Devléske.”

¹⁸I Zahárija phendiá Jangoloske: “Syr mánge te džináv, so adiáke javéla? Me som phuró, i mirí romný isyn uže dre beršá.”

¹⁹I Jangólo otphendiá Léske: “Me som Gavriilo, me som terdó pašýl Devléste. Jov bičhadiá man te phenáv túke i te janav túke davá bahtaló lav,

²⁰i, ĥáda, tu javésa štyl i tu na désa ráda (na zmoginesa) te rakirés angíl dová dyvés, kiéli saró davá kerélape, pal-dová so tu na patiandyjan Miré lavenge, savé kerénape ke kónco / jagóro dro péskiro časo.

²¹I manušá užakirde Zaharijas i divindlépe pe davá, so jov ĥará (dlúges) na džálas javrí Khangirjátyr.

²²Kiéli jov vygijá javrí, jov na dyjá ráda te rakirél, i jone ĥalyné, so sys léste dykhibén dro Khangirí; i jov sykavelas vasténca i jov jaciápe niemo (muto).

²³I kiéli dyvesá končyndlepe, dre savé jov lydžijá mangipén Devléske, jov risijá kheré.

²⁴I paló kadalé dyvesá e Jelizavieta, romný léskiri jaciá pharí, i garadiape pandž čhoná manušéndyr, rakirí péske:

²⁵“Adiáke, Raj Devél kerdiá vaš mánge”, — phendiá joi, — “Jov, ĥáda, kerdiá lačhipén mánge, sob (kaj) Jov te lel krig mándyr ladž angíl manušénde.”

²⁶Dro šóvto čhon Devél bičhadiá Jangolós Gavriilos ke Galilejakiro fóro Nazarieto.

²⁷Ke Patyvalý Terný Džuvlý, saví sys angrustiakirdy (dorakirdy) te džal paloróm pal muršeste pir lav Iosifo (Joza), savó sys Davidóskire rodóstyr; Patyvalia Ternia Džuvliá khardé Maríia[1].

²⁸I Jangólo zagijá ke joi, i phendiá láke: “Dobridim! Tu san bahtalý Devléstyr! Devél isyn Túsa!”

²⁹Joj ža strahadyja dalé rakiribnastyr, i Joj dyjá godý péske (dumindia) pal dová; “So ž dalé lavá značynena?”

³⁰I Jangólo phendiá láke: “Na andyrša, Maríia, pal-dová so Tu lathian bahtalypén Devléste.

³¹I Tu javésa pharí, i bijanesa Čhavés, i Tu désa lav Léske Isúso.

³²Jov javéla baró, i Les léna te kharén Čhavésa Naj Vučedyreskiresa, i Raj Devél déla Léske Davidóskiro trono, Léskire Dadéskiro;

³³i Jov javéla králi pe Jakovóskire manušénde pe saré viéki; i Léskiro Kralipén na končynelape.”

³⁴Ne Maríia phendiá Jangoloske: “Syr davá saštý (moginéla) te javél, kóli me na džináv romes?”

³⁵I otphendiá láke Jangólo, pheny: “Svénto Dúho (Fáno) zdžála pe Túte, i zor Sarevučedyreskiri učhakiréla Tut; pal-dová so Svénto Čhavó, Savó bijandjola, javéla te kharelpe Devléskiro Čhavó.

³⁶I iščo (inké), seménca Tyrí, Jelizavieta, jaciá pharí dre lákire phuré beršá; i joi, savjá džindlé syr bičhavorengirja, kakaná isyn pharí šóvto čhon,

³⁷pal-dová so Devléste nane nisó, sob (kaj) Jov na délas by ráda (moginelas) te kerél.

³⁸I phendiá Maríia: “Ĥáda, me som Devléskiri pisharica; mek te javél Mánge pir Tyró lav.” I Jangólo gijá krig látyr.

³⁹Dre dalé dyvesá Maríia uštyjá i gijá sýges pir bergitko phuv ke fóro dre Judéia,

⁴⁰i joj zagijá dro Zaharijaskiro kher i dyjá “dobridim” Jelizavietake.

⁴¹I sys adiáke: kiéli Jelizavieta šundiá, syr Maríia dyjá “dobridim” láke, tyknó bijáto trinskirdiape upré jekh mólo dro lákiro per, i tedy Svénto Dúho (Fáno) pherdiakirdiá la, obradyndia pes

⁴²i joj zoralés dyjá gódla i phendiá: “Tu san bahtiakirdy maškír džuvliende, i bahtiakirdó javéla bijáto, savés Tu bijanesa!

⁴³I katýr davá javdiá mánge, so Ráskire-Devléskiri Daj javdiá ke Me?

⁴⁴Pal-dová, kiéli me šundjom, syr Tu dyján “dobridim” mánge, miro tyknó bijáto obradyndiape radymátyr dro miro per,

⁴⁵so bahtalý isyn Kodoia, Saví upatiandyja dro dová, so davá javéla čačunés, syr Raj Devél phendiá láke.”

⁴⁶I phendiá Maríia: “Miro iló barjakiréla patýv Ráske-Devléske,

⁴⁷i Miro dúho (fáno) radynélape pal Devléste, Miré Zrakhibnariste.

⁴⁸So Jov podykhciá laskasa pe Péskire pisharicate, saví isyn kanduny, pal-dová so dalé dyveséstyr saré ródy javéna te kharén Man “bahtiakirdy”;

⁴⁹pal baripén, savó so kerdiá Mánge Zoralypnaskiro Devél, mek te javél svénto Léskiro lav,

⁵⁰I Léskiro tangipén javéla pe saré ródy, kon daréla Léstyr.

⁵¹Jov kerdiá baré butiá Péskire myščasa (vastésa), rostradyja odolén, savé isyn phut'kirdé i but kaména dre péskire ile;

⁵²Jov radia telé zoralen léngire tronendyr i ĥazdyjá upré kandune manušén;

⁵³Jov čaliakirdia čalés bokhalen, i mekciá krig barvalen čhučé vasténca,

⁵⁴Jov dyjá vast (pomogindia) Izrailjoske, Léskire dynaríske, sob (kaj) te ripirel Léskiro tangipén,

⁵⁵syr Jov dyjá lav i kerdiá amaré dadénge, Avraamostyr ke Léskiro ródo dre viéki.”

⁵⁶Maríia sys ke joj pašé trin čhoná, i tén'či Joj risijá dro Péskiro Kher.

⁵⁷Kiéli Jelizavietake javdiá časo te bijanél, joj bijandiá čhavés.

⁵⁸I šundlé lákire susiédy (kotárja) i semency, so Devél sys lačhó ke joi, i radyndlepe khetané lása.

⁵⁹I sys adiáke: kiéli bijatoske (muršoreske) sys ohtó (bidujéngiro deš) dyvesá, jone javné te občhinen les, i jone kamlé te kharén čhavés “Zahárija” pir dadéste,

⁶⁰ne Jelizavieta, daj léskiri, phendiá: “Nad, Léskiro lav javéla Iáno.”

⁶¹Jone phendlé láke: “Nane nikonés dro saró tyró ródo, savéste isyn dasavo lav.”

⁶²Jone phučné vasténca léskire dadéstyr, syr jov kamdiá te kharel čhavores.

⁶³Jov mangdiá phalori te čhinel, i čhindiá “Iáno” léske lav i saré ž divindlépe pe davá.

⁶⁴I jekhátyr Zaharijaskiro muj otkerdiape, léskiri čib otphandiape, i jov lyjá te rakirél, i te šarel Devlés.

⁶⁵Manušá, savé dživdé pašýl odój, strahádyne, i sarí bergitko phuv Judéia rakirdiá pal davá.

⁶⁶I sarénge, kon šundiá davá, zapyja dro iló i jone rakirdé: “So da javéla dolé bijatostyr?” Pal-dová so Devléskiro vast sys pe léste.

⁶⁷Svénto Dúho (Fáno) pherdiakirdiá Zaharijas, léskire dadés, Savó lyjá te angilphenel, rakirí:

⁶⁸“Bahtaló isyn Raj Devél, Izrailjoskiro Devél, Savó javdiá te dykhél Péskire manušén i te vyrakhel len,

⁶⁹Jov dyjá aménge zoralé Zrakhibnaris, savó isyn Dynári Davidóskire rodóstyr,

⁷⁰Syr Devél i dyjá lav but berš pale pir Péskire Sventoné prorokénde, savé phendlé,

⁷¹so Jov zrakhéla amen amaré vergéndyr i kodolengire vasténdyr, savé drieván na vyrikirena amen,

⁷²i Jov potanginela (požalinela) amaré daden i ripirela Péskiro Svénto Zavieto.

⁷³So pe davá Jov déla sovláh aménge, syr Jov dyjá amaré prapapuske Avraamóske,

⁷⁴te zrakhél amen vasténdyr amaré vergéndyr, sob (kaj) ame te dynarinás bi darákiro Léske,

⁷⁵pir sventyma i patiaibén angíl Léste pir saré amaré dyvesá.

⁷⁶I tut, čhavoró, javéna te kharén prorokosa Naj Vučedyreskiresa, pal-dová so tu javésa te džas angíl Raste-Devléste te skedes drom Léske,

⁷⁷sob (kaj) te rosphenes manušénge pal dová, so jone zrakhenape, pal-davá so Devél otmekéla léngire gréhi,

⁷⁸pal-dová so, syr amaró Devél tanginela, i amen sam dróga Léske, i začhuvela kham te uštel vyčipnastyr,

⁷⁹te svencynel pe odolénde, savé dživéna dro kalypén (ciamlypén) i dre dar meribnástyr, sob (kaj) te džán amaré ĥerá pir drom ke ramánjo (miro).”

⁸⁰O bijáto barjolas i jačelaspe zoraledýr dro dúho (fáno); jov dživdiá pe čhučí phuv angíl dyvés, syr te sykadiel Izrailjoskire manušénge.