Read Biblija - Pe Baltitko Romani čib (Romanes) 2019 Baltic Romani Bible Luka 10 Bible Online

Luka 10 - Biblija - Pe Baltitko Romani čib (Romanes) 2019 Baltic Romani Bible bible

Luka 10

¹Paló davá Raj Devel vykedyjá javír eftadešá sykliaibnytkonén i bičhadiá len pir dujende angíl Péste dro kažno fóro i gav, karik Jov Kokoró kamdiá te džal.

²Jov phendiá lénge: “Ubijandypen isyn barvaló, a butiarné isyn nábut; mangén pal davá Ras-Devlés, Kon isyn Xuláj pe féldy, sob (kaj) Jov te bičhavel butiarnen pe Péskiro ubijandypen.

³Džán! Me bičhaváva tumen, syr bakrén maškír ruvende.

⁴Na len pésa ni mujengiro (košel'ko), ni sakva, ni ĥeritka, i nikonéske na den ‘dobridim’.

⁵I kiéli tumé zadžána dro vari-savó kher, angledýr phenén: “Te javél ramánjo (miro) tumaré kheréske.”

⁶I kóli odój javéla manúš, savó kaméla ramánjo (miro), mek te jačélpe tumaró lav “ramanjosa” pe lénde, kiéli tumé dyné ‘dobridim’ lénge; a kóli na adiáke, mek te risjol pale ke tumé tumaró lav mangipnasa Devléske;

⁷i jačénpe dro dová kher, xan i p'jen dová, so isyn lénde: pal-dová so butiarno isyn mol pleskiribnaske pal péskiri butý. Na psirén kheréstyr dro kher.

⁸I kóli tumé javéna dro vari-savó fóro i tumen priléna, xan, so tuménge čhuvéna pe skamínd;

⁹sastiakiren nasvalen, savé isyn dro kher, i rakirén lénge: ‘Devléskiro Kralipén javdiá pašyledýr ke tumé’.

¹⁰A kóli tumé zadžána dro vari-savó fóro, i tumen na priléna, tedy, syr tumé vydžána javrí, phenén:

¹¹‘Phuv, so jačiape pe amaré ĥerá, tumaré foróstyr ame trinskirasa tuménge; ne džinén, so Devléskiro Kralipén javdiá pašyledýr ke tumé.’”

¹²Me rakiráva tuménge, so javéla lokhedýr dro sendoskiro dyvés Sodomoske, syr tumaré foroske.

¹³Bida túke, Xorazino! Bida túke, Vifsaida! Pal-dová so, kóli dasavé dívy, so sys kerdé dre tuménde, te javén kerdé dro Tíro i Sidono, jone ĥará riskirenas péskiro džiibén ke Devél dro uribén balytkone gonestyr i dro pieplo;

¹⁴a Tiroske i Sidonoske javéla lokhedýr dro sendoskiro dyvés, syr javéla tuménge;

¹⁵i tu, Kapiernaúmie, ke bolybén ĥazdesape! Ke liúno (ado) tu javésa čhurdynó telé.

¹⁶Kon šunéla tumen, odová šunéla Man, i kon na priléla tumen, odová na priléla Man; a kon na priléla Man, odová na priléla Odolés, Kon bičhadiá Man.”

¹⁷I eftadešá sykliaibnýtka javné pale baré radymása, rakirí: “Rajo Dévla! Kokoré nalačhé dúhi (fany) kandyné amen, kiéli ame rakirdiam Tyré lavésa.”

¹⁸Isúso otphendiá lénge: “Me dykhcjom nalačhés, savó pyjá bolybnástyr syr bliskavica;

¹⁹ake, šunén: Me dáva tuménge zor te terdjon pe sapende i skorpionende i te pirizorjakiren sarí vergoskiri zor i nisavó čoripén na javéla tuménge;

²⁰i tumé na radynénpe, so nalačhé dúhi (fany) kandéna tumen, a tumé radynénpe doléstyr, so tumaré lavá isyn začhindlé dro bolybén.”

²¹Dre dová-pac' mardó (štúnda) Isúso jaciá drieván rado Sventoné Duhóstyr i phendiá: “Me barjakirava Tut, Dádo, Raj Devél Bolybnáskiro i phuvjákiro, so Tu ĥaradian davá god'varendyr i sykliakirdendyr i otkerdian davá tykné čhavorenge. Lačhés, Dádo, mek te javél adiáke, syr Tu kamdian.

²²Miro Dad piridyja Mánge saré dalé keribena; i kon isyn Čhavó, nijékh na džinéla, jekh Dad, i kon isyn Dad, nijékh na džinéla, jekh Čhavó, i odolé, konéske Čhavó kaméla te rosphenel.”

²³Tén'ci Isúso risijá ke sykliaibnýtka i phendiá féni vaš lénge: “Bahtalé isyn tumaré jakhá te dykhén dová, so tumé dykhéna!

²⁴Me phenáva tuménge, so but proróki i králja kamlé te dykhén dová, so tumé dykhéna, ne jone na dykhné; i te šunén dová, so tumé šundlé, ne jone na šundlé.”

²⁵I, ĥáda, jekh Zakonoskiro sykliakiribnari, uštyjá i kami te propatiakirel Isusós, phendiá: “Sykliakiribnariskiro! So mánge te keráv, sob (kaj) te doresav viéčno džiibén?”

²⁶Isúso otphendiá Léske: “So isyn čhindló dro Zakóno? So tu ginesa?”

²⁷Manúš otphendiá: “Rikir dre péste syr Drógima Ras-Devlés tyrés saré ilésa peskiresa, i saré tyré duhósa (fanosa), i saré tyré zorjása i saré tyré godiása, i sykáv patýv péskire pašatuné manušéske, syr kokoró péske.”

²⁸Isúso phendiá Léske: “Tu čačunés otphendian, ker adiáke, i tu javésa te dživés.”

²⁹Ne Zakonoskiro sykliakiribnari, kami te sykavél pes čačunesa, phuciá Isusóstyr: “Kon isyn miro pašatuno manúš?”

³⁰Isúso ž otphendiá: “Jekh manúš gijá Jerusalimóstyr dro Jerihóno i pyné pe léste rozmaribnarja; jone zlyne léstyr uribén, domardé les i giné; i mekné les pašdžides.

³¹I sys adiáke, so jekh rašáj gijá dolé dromésa i, kiéli dykhciá les, gijá duredýr.

³²I Lievito adiáke-pac' sys pe dová štéto, podgíia, podykhciá i gijá durydyr.

³³Ne jekh samarianino, savó tradyjá dolé dromésa, lathiá les, kiéli dykhciá les, jaciá léske tango (žalko) dalé manušés;

³⁴i jov podgíia ke davá manúš, piriphandia léskire fránsy (rany), čhudiá dzet (oliejo) i mol (vino) pe rany; tén'či jov ĥazdyjá dalé manušés pe osloste, jandiá les dro zatradypnytko kher (gostinica) i dykhciá pal léste.

³⁵I pe javír dyvés, kiéli jov tradelas péske, jov vytyrdyja duj dinarii, dyjá xuláske zatradypnytkone kheréstyr i phendiá léske: ‘Dykh pal léste; i, kóli túte udžana butýr lové, to me vypleskirava túke, kiéli javáva pale.’

³⁶Kon dalé trinendyr, tu duminesa, isyn pašyledýr kodoléske, pe konéste pyné rozmaribnarja?”

³⁷Zakonoskiro sykliakiribnari otphendiá: “Kodová, kon jaciápe pašýl adalé manušéste.” Tedy Isúso phendiá Léske: “Džá i tu ker adiáke-pac'.”

³⁸Kiéli Isúso i Léskire sykliaibnýtka iščo (inké) giné dromésa, Isúso zagijá dro jekh gav; odój sys jekh džuvlý, savjá khardé Marfa, joj prilyjá Les radymása dro péskiro kher.

³⁹Láte sys phen, savjá khardé Maríia, joj besciá ke Isusóskire ĥerá i šundiá Léskire lavá.

⁴⁰A Marfa sys drieván zalyny (zalymi) butiasa pir kher, i joj podgíia i phendiá: “Rajo Dévla! So Tu duminesa pal dová, so phen mekciá man jekhdžinia te keráv sarí kherítko butý? Phen láke te dzn vast mánge!”

⁴¹Isúso otphendiá láke: “Marfie! Marfie! Tu duminesa i kerésa pharó pe iló péske pal but butiá,

⁴²ne jekh trej. Maríia vykedyjá čačuný paš, saví nikón na otlela látyr.”