Read Biblija - Pe Baltitko Romani čib (Romanes) 2019 Baltic Romani Bible Luka 11 Bible Online

Luka 11 - Biblija - Pe Baltitko Romani čib (Romanes) 2019 Baltic Romani Bible bible

Luka 11

¹I sys adiáke: kiéli Isúso mangdiápe Devléske dro jekh štéto i, syr pirijaciá, tedy jekh sykliaibnytkonendyr phendiá Léske: “Rajo Dévla! Sykliákir amen te mangaspe Devléske adiáke-pac', syr i Iáno sykliakirdiá léskire sykliaibnytkonén.”

²Isúso phendiá lénge: “Kiéli tumé mangénape Devléske, tedy rakirén: ‘Dad amaró Bolybnáskiro! Mek te slavinelpe Tyró svénto lav; Mek te javél Tyró Kralipén, Mek te spolninélpe, Tyrí vólia syr pe phuv, adiáke pe bolybén;

³Pode aménge maró pe kažno dyvés;

⁴I primang aménge gréhi amaré, Syr ame primangasa odolénge, Save isyn vužle aménge; I na domek amen ke propatiakiriben; Ne zrákh amen nalačhestyr’”

⁵I Jov phendiá lénge: “Konéste tuméndyr isyn drúgo (mal), i kiéli tumé javéna ke jov dre pašrat i phenéna léske: ‘Pšála, de dro vužlypén (dlugo) mánge trin laby maró,

⁶pal-dová so miro mal droméstyr zagijá ke me i mánge nane so te dav léske;

⁷i kadavá mal otphenéla tuménge: ‘De mánge te otkhinjovav! Vudár isyn phandlo i miré čhavoré isyn kakaná suté mánca; me na mogináva te uštav i te psiravav (te otphandav) túke?’”

⁸Me phenáva tuménge, so mek (xoc') jov na uštéla i na déla tuménge, pal-dová so tumé san léskiro mal, ne vaš dová, sob (kaj) tumé te na ladžakiren les mangipnasa, jov uštéla i déla tuménge adákicy, kicý tumé kaména.

⁹I Me rakiráva tuménge: mangén, i javéla dynó tuménge; rodén, i lathéna; marén dro vudár, i psiravena tuménge.

¹⁰Pal-dová so kažno, kon mangéla, doreséla péskiro; kažno, kon rodéla, lathéla; kažnonéske, kon marela dro vudár, javéla psirado.

¹¹Ne, ci isyn vari-kon tuméndyr syr dad, so, kóli léskiro čhavó mangéla léstyr maró, te del čhavéske bar? Ci, kiéli mangéla mačhes, te del léske sapes?

¹²Ci, kiéli mangéla parnoro, te del léske skorpionos?

¹³Kóli tumé san nalačhé i džinéna te kerén lačhipén péskire čhavénge, pe kicý butýr tuméndyr tumaró Bolybnáskiro Dad déla Svénto Dúho (Fáno) odolénge, savé mangena Léstyr!”

¹⁴Jekhvar Isúso vytradelas nálačho dúho (fáno) niemone (muto) manušéstyr. Kiéli nálačho dúho (fáno) vygijá léstyr, niemo manúš lyjá te rakirél. I manušá divindlépe.

¹⁵Ne vari-savé léndyr rakirdé: “Jov vytradela nalačhé dúhi (fany) Viel'zevuloskire zorjása, savó isyn xuláj pe nalačhé dúhi.”

¹⁶A javír manušá propatiakirenas Les, trebinenas Léstyr, sob (kaj) te javél ĥiertýk (znamiénijo) bolybnástyr.

¹⁷Ne Isúso džindiá, so jone dumindle i phendiá lénge: “Kažno Kralipén, kaj nane jekhipén andrál, javéla syr šukí phuv; kažno kher, kaj nane jekhipén andrál, na javéla te terdjol;

¹⁸i kóli nalačheste nane jekhipén andrál, syr léskiro kralipén javéla te terdjol? A tumé ž rakiréna, so Me vytradava nalačhé dúhi Viel'zevuloskire zorjása.

¹⁹Ne kóli Me vytradava nalačhé dúhi Viel'zevulosa, tedy tumaré čhavé, savé zorjása vytradena? Paldavá jone javéna sendárja tuménge, so tumé rakiréna načačipén.

²⁰A kóli Me vytradava nalačhé dúhi Devléskire zorjása, tedy Devléskiro Kralipén javdiá ke tumé.

²¹Kiéli zoraló manúš rakhéla péskiro kher karedyniasa, léskiro mištypén nikón na čilavéla;

²²ne kiéli manúš zoraledýr léstyr peréla pe léste, i pirizorjakirela xulás, jov zakedela saró léskiro mardýtko (oružyjo), pal savé xuláj rikirdiape, i rozdela léskiro čordo mištypén.

²³Kon isyn na Mánca, odová isyn proti Mánde, i kon na skedéla Mánca, odová rosčhurdela.

²⁴Kiéli nálačho dúho (fáno) vydžála manušéstyr, tedy jov lodela pir bipanieskire štéty, rodéla otkhinyben i na lathéla, i tén'či rakírla: ‘Risievava me dro miro kher, katýr me javdjom.’

²⁵I kiéli jov javéla, lathéla, so kher nane zalyno, vyšulado i ukedyno;

²⁶tén'či jov džála i léla pésa eftá (bitrinéngiro deš) javír dúhi, so isyn fujedýr léstyr, i jone zadžána i dživéna odój; i jačélape vaš dalé manušéske fujedýr, syr sys angíl davá.”

²⁷I sys adiáke: kiéli Isúso phendiá davá, vari-saví džuvlý, saví sys maškír manušénde, otkhardiape zoralé zaniása i phendiá Léske: “Bahtalý isyn džuvlý, saví bijandiá i čaradia kolynesa Tut.”

²⁸A Isúso otphendiá: “Čačó, bahtalé isyn kodolé, savé šunéna Devléskiro lav i kandéna les.”

²⁹Kiéli manušá skedynépe khetané, Isúso lyjá te rakirél: “Ĥáda, isyn nálačho i napatiaibnytko ródo, savó rodéla ĥiertýk (znamiénijo); na javéla lénge ĥiertýk apríč Ionaskiri ĥiertýk.

³⁰Adiáke, syr Iona sys ĥiertýk vaš manušénge Ninievijatyr, adiáke-pac' Čhavó Manušéskiro javéla vaš davá ródo.

³¹Paš-Dyveseskiri (Tate-Rigakiri) Králica ĥazdélape te sendinelpe manušénca dalé rodóstyr i dophenéla pe lénde: pal-dová so joj iavélas phuvjákire jagoróstyr (krajostyr) te šunél Solomonóskiro god'varipen; i adáj isyn Jekh, Savó isyn baredýr Solomonostyr.

³²Ninievijakire manušá ĥazdénape te sendinenpe dalé rodosa i jone dophenena pe lénde, pal-dová so jone na risiné grehéndyr ke Devél, kiéli Iona phendiá lav; i adáj isyn Jekh, Savó isyn baredýr Ionastyr.

³³I kiéli zahačkirena momoly, na garavena la ci čhuvéna la tel pirí, a dro šandalo (podsviečniko), sob (kaj) te dykhén manušá, savé džána andré dro kher.

³⁴Momolytko (svietíl'niko) vaš masá isyn jag. Paldavá, kóli jakh tyrí javéla žužy, to kokoré masá javéna žužé; kóli jakh tyrí na javéla žužy, tedy tu kokoró javésa dro ciamlypén (kalypén).

³⁵Dykh ža, sob (kaj) dud (svéto), savó isyn dre túte, te na javél ciamlo.

³⁶Pal-dová so, kóli saré tyré masá isyn sviatla syr jag, a nane pe léste ni jekh ciamlo štetyco, tedy tu javésa te ziaines dudesa syr momolytkonestyr (svietil'nikostyr), savó zahačkirdo.”

³⁷Kiéli Isúso rakirdiá, jekh Farisiejo khardiá Les ke xal léste; Jov zagijá i besciá pal skamínd.

³⁸Farisiéi divindepe, kiéli dykhné, so Isúso na mordia vastá angíl xabén.

³⁹Ne Raj Devél phendiá Léske: “Tumé, Farisiéi, kakaná morena tahtaja (čašy) i čaré javriestyr, a andrál, dro tumaró iló isyn pherdó bokh ke čúžo mištypén i nalačhé dúmy.

⁴⁰Tumé san bigodiakire! Ci da na Devél, Kon kerdiá davá saró javriestyr i andrestyr.

⁴¹Ne tumé fedýr otdén dyibén iléstyr doléstyr, so tuménde isyn dre tahtaja, i tumé javéna žužé.

⁴²Bida tuménge, Farisiéi; pal-dová so tumé déna déšto miéra miatatyr, rutatyr i kažnoné čarjatyr, ne tumé na duminéna pal séndo i Devléskiri láska; davá treindiá te kerén i adiáke-pac' te na bistren pal javír.

⁴³Bida tuménge, Farisiéi: pal-dová so tumé kaména naj fededýr štéty dre sinagogi i, sob (kaj) manušá te den ‘paklono’ tuménge pe targitka štéty.

⁴⁴Bida tuménge: pal-dová so tumé san sýrby nadyc'le maĥily, so manušá psiréna pir lénde i na džinéna len.”

⁴⁵I jekh lylvaritkonendyr otphendiá Isusóske: “Sykliakiribnariskiro! Kóli Tu rakirésa adiáke, Tu ladžakiresa adiáke-pac' amen!”

⁴⁶I phendiá Isúso: “Bida tuménge, lylvarítka: pal-dová so tumé čhuvéna baré pharipena dro džiibén pe manušénde, a kokoré na kaména anguštesa te čilaven len.

⁴⁷Bida tuménge; pal-dová so tumé keréna koplicy prorokenge, savén tumaré dadá zamardé.

⁴⁸Adiáke tumé dophenena ž pe tumaré dadende, i podrikirena len dro dová, so jone kerdé; pal davá, so jone zamarenas prorokén, a tumé lénge keréna koplicy.

⁴⁹Vaš davá i Devléskire godiása isyn phendló: ‘Me bičhaváva lénge prorokén i Apostolen; jone zamarena jekhen, a javirén jone vytradena syr džuklen’,

⁵⁰mek te javél séndo pe davá ródo pal prorokéngire rata, savé pročhude svetóskire anglypnástyr

⁵¹Avieljoskire ratestyr ke Zaharijoskiro rat, savés zamardé maškír altárjo i Khangirjákiri paš; čačes, Me, rakiráva tuménge: javéla phučno, syr trej dalé rodóstyr.

⁵²Bida tuménge, lylvarítka: pal-dová so tumé garavena klydyna vudarendyr dro džinybnaskiro kher; tumé ž kokoré na zaginé i na mekné javirén.”

⁵³I kiéli Isúso phendiá saró davá lénge, lylvarítka i Farisiéi lyné te resen ke Jov xoliása, sob (kaj) Jov te otphenel pe but phučybena;

⁵⁴a kokoré užakirde čorahanés te uhtylén Les dro lav, i sob (kaj) jone moginénas te bangiakiren Les.