Read Biblija - Pe Baltitko Romani čib (Romanes) 2019 Baltic Romani Bible Luka 12 Bible Online

Luka 12 - Biblija - Pe Baltitko Romani čib (Romanes) 2019 Baltic Romani Bible bible

Luka 12

¹Dre dová-pac' mardó (štúnda) adákicy but manušá skedynépe khetané, so jone lyné te tasaven jekh jekhés, i Isúso lyjá te rakirél angledýr Léskire sykliaibnytkonénge: “Rakhénpe Farisijengire roščynatyr: rakhénpe léngire dujemuitkimatyr;

²ne nane nisó učhakirdo, sob (kaj) te na vydžál pe jakhá i garadó, sob (kaj) te na javél džindló;

³pal-dová so saró, so tumé phenéna dre kaly (ciamly) rat, dová javéna te šunén dro sviatlo dyvés, i dová, so tumé phendlé štylés (tihes) pe kan, dová javéna te rakirén pe kherítka strehi.

⁴Ne Me rakiráva tuménge, Miré drúgi (malá): “Na andyršan kodolendyr, savé muliakirena tumen, ne savé na moginéna butýr nisó te kerén.

⁵Ne Me sykaváva tuménge, konéstyr trej te darén: darén kodolestyr, konéste isyn zoralypén te čhurdel tumen dro giejena. Čačó, Me phenáva tuménge: darenpe léstyr!

⁶Haj, na duj špaki biknenape pal jekh asarije? I ni jekh léndyr nane bistyrdo Devléste.

⁷Tuménde až i balá pe šeró saré gindlé. Na andyršan ža: tumé san kučydyr, syr kadalé but špaki.

⁸Ne Me phenáva tuménge: kažnones, kon priĥaljola Man i rosphenéla pal Mánde angíl manušéste, kodolés Me priĥaljovava angíl Devléskire Jangolende;

⁹i vari-savó, kon otphenelape Mándyr angíl manušénde, kodolestyr otphenavape i Me angíl Devléskire Jangolende;

¹⁰i kóli vari-kon phenéla lav pe Čhavéste Manušeskireste, léske grého javéla otmekno, ne kodová, savó phenéla lav pe Svénto Dúho (Fáno), léskiro grého na javéla otmekno ni dro davá viéko, ni dro viéko, savó javéla.

¹¹Kiéli jone javéna te lydžán tumen dre sinagogi i ke barydyrá i pe sendy, na piridživen, syr i so tumé javéna te otphenen, ci so te phenén;

¹²pal-dová so Svénto Dúho (Fáno) javéla te sykliakirél tumen dre dová-pac' mardó, so trej te phenén.

¹³Tedy vari-kon manušéndyr phendiá: “Sykliakiribnariskiro! Phen Miré pšaléske, sob (kaj) jov te rosčhuvel pir pašá (te ulavél) mánca meknó mištypén, so dad jačkirdiá aménge.”

¹⁴Ne Isúso otphendiá Léske: “Mro manúš, kon čhudiá man te sendiakirav, ci te rosčhuvav pir pašá (ulavav) mankiruiut tuménde?”

¹⁵I Jov iščo (inké) phendiá lénge sarénge: “Rakhénpe i na tradenpe tumé pal barvalypén, pal-dová so čačunó Manušéskiro džiibén na dro dová, so ci but barvalypena isyn léste.”

¹⁶I Isúso rosphendiá lénge dasavo primiéro: “Jekhe-barvaleskire manušeskiri phuv délas lačhó aplodo:

¹⁷i jov duminelas péske: ‘So te keráv mánge? Mánde isyn nábut štéto, sob (kaj) te čhuvav miro giv.’

¹⁸I jov duredýr phendiá péske: ĥáda, so me keráva? Rosphagirava mirí šúrna i čhuváva neví šúrna baredýr, i odój me kedava saró miro giv i miro mištypén:

¹⁹Tedy me phenáva péske: ‘Barvaló me som pe but berš: otkhinjov, xa, pi, dživ, syr kamésa.’

²⁰Ne Devél phendiá léske: ‘Dylynó tu san! Dre daja rat léna tútyr tyró džiibén; konéske davá saró jačélape, so tu skedyjan?’

²¹Adiáke džála kodolende, savé skedéna kučipén péske, a na skedéna dová, so isyn mištó angíl Devléste.”

²²I phendiá Isúso Péskire sykliaibnytkonénge: “Paldavá Me rakiráva tuménge: na piridživen pal tumaró džiibén, so tuménge te xan, ci pal tumaré masá, so tuménge te ur'jen:

²³naúšto džiibén isyn na butýr xabnastyr, naúšto masá isyn na butýr uribnastyr?

²⁴Dykhén pe korakende (voronende), jone na čhuvéna dre phuv i na sčhinena; lénde nane ni piralý, ni šúrna; i Devél čaliakirela len. Pe kicý fedydyr tumé san čirikliendyr?

²⁵Ne kon tuméndyr piridživi pal džiibén, moginéla te barjakirel pe nábut péskiro baripén?

²⁶I kóli tumé na moginéna te kerén až dasavo tyknó rendoro, sóske piridživena tumé pal javír keribena?

²⁷Dykhén pe lilii, syr jone barjona: jone na keréna butý, na khuvena thava; ne Me phenáva tuménge, so i Solomóno péskire barvalypnasa na ur'jelaspe adiáke, syr kažno léndyr.

²⁸Kóli ž dasavo uribén Devél déla feldytkone čarjake, saví adadyvés isyn pe félda, ne atasiá javéla čhurdyny dro bov, tedy pe kicý fedýr Jov déla tuménge uribén, tumé ž san nabaré — patiaibnaskire manušá?

²⁹Na rikirén jekh dro šeró, so tuménge te xan ci te p'jen, i tumé na piridživen;

³⁰pal-dová so saré nácyi dalé svetóstyr rodéna davá, i tumaró Dad džinéla, so tuménde isyn trébima dro davá saró;

³¹a rodén Léskiro Kralipén, i dová saró javéla dynó tuménge.

³²Na andyršan, so tumé san na baró manušéngiro ĥurto, pal-dová so tumaró Dad déla laskasa tuménge Kralipén.

³³Biknen, so tuménde isyn i rozden lové bogenge; kerén péske mujéngire (košel'ki), savé na jačéna phurané, keden péske kučipén, savó na tyknjola dro Bolybnáskiro Rajo, karik čor na podganavelape, i mol' (mel') na xasiakiréla.

³⁴Paldová, kaj tumaró kučipén isyn, odój javéla tumaró iló.

³⁵Javén skedyné ke saró, mek te xačon tumaré jaga;

³⁶tumé san syr manušá, savé užakiréna péskire xulás, kon isyn pe bjav, kiéli jov džála pale svenkostyr, kiéli jov javéla kheré i marela dro vudár, sob (kaj) tumé tedy jekhátyr te otčhakiren léske.

³⁷Bahtalé isyn odolé dynárja, konés xuláj lathéla, so jone na suté; čačes, Me phenáva tuménge, so xuláj prigotovinelape i bešliakirela len pal skamínd te otkhinjon; i džála ke jone i jačéla te podel lénge.

³⁸I, kóli jov javéla dre pašrat, i javéla korigedýr (pozžedýr), i lathéla, so jone adiáke-pac' isyn na suté, javéna bahtalé kadalé manušá.

³⁹Ne tumé zoralés džinén, so, kóli kheréskiro xuláj džinelas, kiéli ratý javéla čor, jov javéla te rakhelpe i na délas, sob (kaj) čor te podĥanavelpe tel léskiro kher.

⁴⁰Paldavá javén skedyné, pal-dová so Čhavó Manušéskiro javéla dre dasavo mardó (štúnda), so tumé na duminéna.”

⁴¹Tedy Pétri phendiá Léske: “Rajo Dévla! Tu rakirésa davá primiéro (sykaibén) aménge ci sarénge?”

⁴²I phendiá Raj Devél: “Kon tedy isyn patiaibnýtko i god'varó pishári, konéske léskiro xuláj dyjá zor pe léskire butiarnende, sob (kaj) te del lénge léngiri paš marestyr dro časo, savó trej?

⁴³Bahtaló isyn kodová pishári, konéskiro xuláj syr javéla, lathéla, so jov keréla adiáke, syr uphendló léske;

⁴⁴čačes, Me rakiráva tuménge: jov déla léske pravo pe saró léskiro mištypén, so isyn léste.

⁴⁵Ne kóli davá pishári phenéla péske: ‘Miro raj zarikirelape;’ i jov léla te marel dynar'jén i dynaricen, te xal i te p'jel, i te matjol,

⁴⁶tedy javéla pishariskiro xuláj dro dová-pac' dyvés, dro savó jov na užakiréla: i dro dová-pac' mardó, pal savó jov na džinéla i xuláj rosčingirela les pe paš i déla léske dasaví sud'ba, syr napatiaibnaskire manušénge.

⁴⁷I odová pishári, kon džindiá léskire xulaskiri vólia, a na sys skedynó i na kerdiá pir xulaskiri vólia, javéla zoralés mardó čupniasa,

⁴⁸a kodová pishári, kon na džindiá, ne kerdiá adiáke, pal so jov isyn bangó, javéla mardó čhupniasa tyknedýr. Kažnonestyr, konéske but dynó, phučena but; i kažnoné manušéstyr, konéske isyn but dopatiandlo, léstyr phučena butýr.

⁴⁹Me javdjom te janav jag pe daja phuv; i syr Me kamám, sob (kaj) joj te xačol kakaná?

⁵⁰Mánge trej te bolavpe, i syr Me piridživava, paka davá saró spolninelape!

⁵¹Na duminen, so Me javdjom te janav ramánjo (miro) pe phuv? Nad, Me phenáva tuménge, so na ramánjo (miro), a Me javdjom te rosčhuvav manušén:

⁵²adadyvesatune dyveséstyr semia pandžine manušéndyr rosčhuvenape pe pašá: trindžine javéna te rosčhuvenape pe pašá dujdžinenca, dujdžiné javéna te rosčhuvenpe pe pašá trindžinenca:

⁵³dad javéla proti čhavéste, i čhavó javéla proti dadéste; daj javéla proti čhate, i čhaj javéla proti borjate, i bori javéla proti sasiate.”

⁵⁴I phendiá Isúso adiáke-pac' manušénge: “Kiéli tumé javéna te dykhén óbloko, savó ĥazdélape zapadostyr (pal-paniendyr), tedy tumé ŭraz rakiréna: ‘Bryšýnd javéla; i adiáke jov javéla.’

⁵⁵I kiéli tumé čuinena (šunéna), so paš-dyvesýtko balvál phurdela, tedy tumé phenéna: ‘Hačkiribén javéla;’ i adiáke jov javéla.

⁵⁶Dujemuitka, tumé san! Tumé džinéna, syr te uĥaljon, so isyn pe phuv i pe bolybén; a syr da tumé na ĥaljona časo, dro savó tumé dživéna.

⁵⁷A sóske tumé na roskedenape vaš péske, so isyn čačipén?

⁵⁸Kiéli tu džása ke sendoskiro barydyró manušésa, savésa tu san dre xolý, tedy sprobin te urakires les pir drom, sob (kaj) manúš te na zatyrdel tut ke sendári, a sendári te na otdél tut fandaríske (istiazatieljoske), i odová te na čhurdel tut dro štaribén.

⁵⁹Me phenáva tuménge: tu na vydžasa odothýr, paka tu otdesa ke naj tyknedýr xarkuny ĥasprin.”