Read Biblija - Pe Baltitko Romani čib (Romanes) 2019 Baltic Romani Bible Luka 13 Bible Online

Luka 13 - Biblija - Pe Baltitko Romani čib (Romanes) 2019 Baltic Romani Bible bible

Luka 13

¹Dro dová-pac' časo javné manušá i rosphendlé Isusóske pal manušénde Galilejatyr, syr Piláto zmiešyndia khetané léngire rata ratenca, savé sys syr svénto dyibén Devléske.

²I kiéli Jov otphenélas lénge pe davá, to phendiá adiáke: “So tumé duminéna, so kadalé Galilejakire manušá sys baredýr grehítka, syr saré javír Galilejakire manušá, so jone adákicy menčyndlepe?

³Nad, Me phenáva tuménge, so, kóli tumé na riskirena péskiro džiibén ke Devél, tedy tumé adiáke-pac' xasjona.

⁴Ci tumé duminéna, so kodolé dešuohto (bidujéngiro biš) manušore, pe konéste pyjá Silaamoskiri vučardý (bašnia) i primardia len, sys butýr bangé, syr saré javír manušá, savé dživéna ke Jerusalimo?

⁵Nad, Me phenáva tuménge, so, kóli tumé na riskirena péskiro džiibén grehéndyr ke Devél, tedy tumé adiáke-pac' xasjona.”

⁶I phendiá Isúso dasavo primiéro (sykaibén): “Vari-savé manušéste sys inžyritko kašt (drévo), savó sys čhudo dro vinagrádniko, i jov javdiá te rodél barjakirdé (plódy) pe léste i na lathelas ni jekh.

⁷I jov phendiá sadovnikoske (barjakireske): ‘Dykh, Me uže tríto berš, syr me javáva te rodav barjakirdé pe davá inžyritko kašt i na lathava nisó: čingir davá kašt telé; sóske jov ivjá (darmes) zalela phuv?’

⁸Ne barjakireskiro otphendiá xuláske: ‘Rajo, mek les iščo (inké) pe berš, paka Me obĥanavava les i čhuváva upré gnejo (mesta),

⁹i, kóli kašt déla fedýr barjakirdó; a kóli nad, tedy tu moginésa te čingires telé.’”

¹⁰I Jov sykliakirdiá dre jekh sinagoga dro sávato.

¹¹Odój sys jekh džuvlý, saví sys bizorjakiri dešuohto berš nalačhé duhóstyr (fanostyr); joj sys band'kirdy i na mogindiá te rozbandjol.

¹²I kiéli Isúso dykhciá la, Jov khardiá la ke Pe i phendiá: “Džuvlije, jav sasty tyré bizorjakiribnastyr.”

¹³I Jov čhudiá upré Léskire vastá pe láte; i adáj že joj iaciá roŭno i slavindia parikiribnasa Devlés.

¹⁴Ne sinagogakiro barydyró xoliásyja, so Isúso vysastiakirdiá dro sávato, i paldavá jov phendiá manušénge: “Isyn šov dyvesá, kiéli saštý (možna) te kerén butý; javén dre dalé dyvesá i sastjon, a na dro sávato.”

¹⁵Pal davá Raj Devél otphendiá léske adiáke: “Dujemuitko, tu san! Ci kažno tuméndyr na piriphandela péskire guruvés ci oslós katuhostyr i na lydžales les te paniakirel?

¹⁶I kadaja džuvlý, saví isyn Avraamoskiri pračhaj, savjá nálačho sphandia pe dešuohto berš, so ž, ci na treindiá la te otmekav dalé phandypnastyr savatoné (subotoné)?”

¹⁷I kiéli Jov phendiá davá, saré Léskire vérgi ladžandyne; i saré manušá radyndlepe Léskire slavnone butiendyr, savé Jov kerdiá.

¹⁸Isúso ž phendiá: “Pe so zdžála (podžala) Devléskiro Kralipén dro Bolybnáskiro Rajo. Sósa Me mogináva te priparuvav (te priroŭninav) les?

¹⁹Jov isyn sýrby garčyčno ziárka, saví manúš čhudiá dre phuv pe péskiri bar; i joj vybarija i jaciá syr baró kašt (drévo), kaj čirikliá bolybnýtka garadjonas dre léskire randiá.”

²⁰I nevéstyr Jov phendiá: “Sósa Me mogináva te priparuvav (te priroŭninav) Devléskiro Kralipén dro Bolybnáskiro Rajo?

²¹Devléskiro Kralipén dro Bolybnáskiro Rajo isyn sýrby droždžy (roščyna), savé džuvlý lyjá i zamiešyndia dre trin miery jaržó, paka saró xumer (ciasto) na jaciá šutlo.”

²²I džálas Isúso pir fórja i gavá i sykliakirelas manušén, kiéli Jov džálas dro Jerusalimo.

²³Vari-kon phendiá Léske: “Rajo Dévla!” Naúšto isyn nábut adasavé manušá, savé zrakhenape?” Isúso otphendiá lénge:

²⁴“Sprobinen zoralés te zadžán pir ciasno vudár, pal-dová so but manušá, Me phenáva tuménge, javéna te rodén, sob (kaj) te zadžán andré, i jone na déna ráda (zmoginena).

²⁵Paló davá, kiéli kheréskiro xuláj uštéla i zaphandela vudár, tedy tumé javéna te terdjon javrí i javéna te marén dro vudár, rakirí: ‘Rajo Dévla! Rajo Dévla.” Psirav (otphande) vudár aménge,” a Jov otphenéla tuménge: “Me na džinóm (na džináv) tumen, katýr tumé san?’

²⁶tedy tumé phenéna: ‘Ame xajam i pijam Túsa, i Tu sykliakirdian pir amaré vulícy (gásy);’

²⁷ne Jov phenéla: ‘Me na džinóm tumen, katýr tumé san; džán Mándyr krig tumé saré, kon keréla čoripén.’

²⁸Odój javéla roibén i dandengiri skriežyma, kiéli dykhéna tumé Avraamos, Isajos i Jakovós i saré prorokén dro Devléskiro Kralipén dro Bolybnáskiro Rajo, a tumen kokoren vytradena javrí.

²⁹I javéna manušá vastokóstyr i zapadostyr, paš-ratitkoné i paš-dyvesytkoné rigéndyr, i jone javéna te bešén pal skamínd dro Devléskiro Kralipén dro Bolybnáskiro Rajo.

³⁰I, ĥáda, isyn palatuné, savé javéna anglatuné; a isyn anglatuné, savé javéna palatuné.”

³¹Dre dová dyvés javné Farisiéi ke Isúso i phendlé Léske: “Džá adathýr i džá (péske), pal-dová so Irodo kaméla te muliakirél Tut.”

³²Isúso otphendiá lénge: “Džán i phenén dalé lokhniake (lisake); ĥáda, Me tradava krig nalačhé dúhi (fany) i vysastiakirava adadyvés, atasiá i pe tríto dyvés Me končynava mirí butý;

³³ne Mánge trej te psirav adadyvés i atasiá i javír dyvés, pal-dová so naštý te javél, sob (kaj) proróko te xasjol javrí Jerusalimóstyr.

³⁴Jerusalimo! Jerusalimo! Dro savó muliakirenas prorokén i šuliakirenas barénca kodolén, savén bičhadiá ke tu. Kicý móly Mánge isyn pe iló te skedav čhavorén tyrén, syr čirikly skedéla čirikloren tel phak i tumé na kamlé!

³⁵Ĥáda, kher tumaró javéla meknó čhučó tuménge; i Me rakiráva tuménge: tumé na javéna te dykhén Man kadalé dyveséstyr, paka tumé na phenéna: “Bahtiakirdó isyn Odová, Savó džála vaš Devléskiro lav.”