Read Biblija - Pe Baltitko Romani čib (Romanes) 2019 Baltic Romani Bible Luka 14 Bible Online

Luka 14 - Biblija - Pe Baltitko Romani čib (Romanes) 2019 Baltic Romani Bible bible

Luka 14

¹I sys adiáke: Isúso zagijá dro kher ke jekh Farisiejoskiro barydyró te xal maró savatoné (subotoné), a jone dykhné dre saré jakhá pal Léste.

²I jekh manúš, konéste rosšulyne ĥerá i vastá, podgíia ke Isúso.

³I phuciá Isúso lylvaritkonendyr i Farisiejendyr: “Ci saštý te vysastiakirav dro sávato?”

⁴Ne jone sys štyl. Isúso lyjá manušés, vysastiakirdiá les i otmekciá les te džal.

⁵I Jov phendiá lénge: “Kon tuméndyr, konéste óslo (miegári) ci guruv pyjá dre ĥanýng, uraz na vytyrdela les upré dro sávato?”

⁶Ne jone nisó na mogindlé te otphenen Léske.

⁷Isúso phendiá pritča odolé manušénge, savén khardé pal skamínd, pal-dová so Isúso dykhciá, syr jone vykedenas anglatuné štéty:

⁸“Kóli vari-kon kharéla tut pe bjav, na beš pe anglatunó štéto, sob (kaj) te na javél vari-kon patyvaledyr tútyr, savés adiáke-pac' khardé,

⁹i xulái, kon khardiá tut i les, sob (kaj) te na poddžál i te na phenél túke: ‘De štéto léske,’ a túke prijavelape ladžasa te bešél palál.

¹⁰Ne kiéli kharéna tut, tedy beš pe palatunó štéto, sob (kaj) kodová, kon khardiá tut, moginelas te poddžál ke tu i te phenél: ‘More! Piribeš pe štéto angledýr: odój túke javéla patýv angíl sarénde, savé isyn bešté pal skamínd túsa;

¹¹pal-dová so kažno, kon ĥazdéla pes, les Devél čhuvéla teledýr, a kon čhuvéla pes teledýr, kodolés Devél ĥazdéla vučedýr.’”

¹²Tén'ci Isúso adiáke-pac' phendiá kodoléske, savó khardiá Les: “Kiéli tu kerésa baró skamínd, na khar ni malen, ni pšalén, ni semencen peskiren, ni barvalé susieden (kotar'jén), sob (kaj) i jone te na kharén pale tut vari-kiéli, i sob (kaj) te na otpleskiren pale túke.

¹³Kiéli tu kerésa svénko, khar čororen, kalieken, langalen, kororen,

¹⁴i tu javésa bahtiakirdó: pal-dová so lénde nane sósa te otpleskiren pale túke; a túke, javéla otpleskirdo pale, kiéli čačuné manušá otdžidjona meribnástyr.

¹⁵I jekh manúš, kon sys beštó Lésa pal skamínd i otkhinjolas, kiéli šundiá davá, to phendiá Isusóske: “Bahtaló isyn odová manúš, kon javéla te xal maró, pal skamínd dro Devléskiro Kralipén dro Bolybnáskiro Rajo.”

¹⁶Isúso phendiá Léske: “Vari-savó manúš kerdiá baró skamínd i khardiá buté manušén.

¹⁷I bičhadiá jov péskire pisharís dre dová-pac' mardó te phenél kodolénge: ‘Javén, saró uže isyn skedynó’.

¹⁸Ne khardé manušá, jekh pal jekhéste, lyné te otphenenpe. Pérvo manúš phendiá pisharíske: ‘Me kindjom phuv, i mánge trej te džav i te dykháv la; mangav tut te primanges mánge’.

¹⁹I javír manúš phendiá: ‘Me kindjom pandž pary guruvén te den andré, i me džáva te sprobinav len; mangav tut te primanges mánge’.

²⁰I tríto phendiá: ‘Me lyjom romniá, i paldavá mánge naštý te javav.”

²¹I javdiá pishári kheré i piriphendia saré lavá xuláske. Tedy kheréskiro xuláj phendiá dre xolý pisharíske: ‘Džán pir baré vulícy (gásy) i gasycy, i jan adarík čororen, kalieken, langalen i kororen’.

²²I phendiá pishári: ‘Rajo, kerdó, syr tu phendián zorjása, i isyn iščo (inké) štéto’.

²³I xuláj phendiá pisharíske: ‘Džá pir baré dromá i pašé týny (izgorodi) i rákir pir iló lénge te javén, sob (kaj) te javél pherdó miro kher;

²⁴paldavá Me phenáva túke, so nijékh odoléndyr, savén khardé, na pokoštynela (na sprobinela) miro xabén.’”

²⁵I but but manušá džánas Isusósa i Jov porisija ke jone i phendiá lénge:

²⁶“Kóli vari-kon javéla ke Me i na jačkiréla péskire dadés i da, i romniá, i čhavorén, i pšalén, i phenien, i adiáke-pac' na javéla te rakhél péskiro džiibén; kodová na moginéla te javél Miro sykliaibnýtko;

²⁷i vari-kon, kon na léla trušúl péskiro i na džála Mánca, kodová na moginéla te javél Miro sykliaibnýtko.

²⁸Pal-dová so, kon tuméndyr, savó kaméla te čhuvél kher, angledýr na bešéla i na rozginela lové, so javéla mol davá, ci uhtýlla (dósi) lové léste te dokončynel butý;

²⁹sob (kaj), kiéli jov čhuvéla fundámiento i kóli na moginéla te dokončynel, sob (kaj) saré, kon dykhéla davá, te na len te sanpe léstyr;

³⁰rakirí: ‘Kadavá manúš lyjá te čhuvél kher i na dyjá ráda (zmogindia) te dokončynel butý?’

³¹Ci, syr králi, savó kedelape te džal te marélpe javire kralísa, ci na bešéla jov i na obrakirela angledýr, ci moginéla jov deše tysjoncenca te terdjol proti javire kralíste, savó džála pe léste bišé tysjoncenca?

³²I kiéli na adiáke, tedy paka odová králi isyn dur, jov bičhavéla ke javír králi vykedyné manušén te mangén, syr te kerél ramánjo (mirinelpe) dolé kralísa.

³³Paldavá kažno tuméndyr, kon na otphenelape saréstyr, so léste isyn, na moginéla te javél Miro sykliaibnýtko.

³⁴Lond isyn lačhó, ne kiéli jov našavela péskiro londypen, sósa saštý te kerés, sob (kaj) nevéstyr lond te javél londo?

³⁵Les butýr ni karik na čhuvésa: ni dre phuv, ni pe gnejo; les vyčhurdena. Konéste isyn kaná, mek te šunél.”