Read Biblija - Pe Baltitko Romani čib (Romanes) 2019 Baltic Romani Bible Luka 15 Bible Online

Luka 15 - Biblija - Pe Baltitko Romani čib (Romanes) 2019 Baltic Romani Bible bible

Luka 15

¹I džánas pašyledýr ke Isúso mytoskire skedybnarja i grehítka manušá te šunén Les:

²i Farisiéi i lylvarítka rakirdé xoliása adiáke: “Kadavá manúš priléla grehitkoné manušén i xála lénca.”

³I Jov phendiá lénge dasavo primiéro (sykaibén):

⁴‘Kon tuméndyr, konéste isyn šel bakriá, i kóli jov našavela jekha, na jačkiréla jeniadeša pe čhučí phuv i na džála te rodél kodolia, saví xasijá, paka lathéla la.

⁵A kiéli jov lathéla la, jov čhuvéla la pe psiké radymása;

⁶a syr jov javéla kheré, kharéla ke pe péskire drugen (malén) i susiedén (kotar'jén) i phenéla lénge: “Radynénpe Mánca, pal-dová so Me lathjom bakriá, saví xasijá.”

⁷Čačes, Me phenáva túke: adiáke-pac' javéla butýr rádyma dro bolybén pal jekhe grehitkoné manušéste, savó riskirdiá péskiro džiibén grehéndyr ke Devél, syr pal jeniadeša jeniá čačipnytkonende, konéske na trej te kerél davá.

⁸Ci kóli jekh džuvlý, konéste sys deš rupuvé ĥaspria (kopieiki) i joj našavela jekh léndyr; so joj na zahačkirela momolia i na jačéla te šulavel dre štúba i te rodél rakhibnýtkes, paka joj lathéla daja ĥasprin?

⁹A kiéli joj lathéla lové, tedy kharéla ke pe podrugén (malnién) i susiedken (kotarken) i phenéla: ‘Radynénpe tumé Mánca, me lathjom ĥasprin, saví našadjom.’”

¹⁰Me phenáva tuménge: adiáke-pac' i radynénape Devléskire Jangóly pal jekhe grehitkoné manušéste, savó riskiréla péskiro džiibén grehéndyr ke Devél.”

¹¹I iščo (inké) Isúso phendiá: “Sys jekh manúš, konéste sys duj čhavé;

¹²i phendiá ternedyr čhavó dadéske: ‘Dádo, de mánge kakaná mirí paš mištypnástyr’. I rosčhudiá dad mištypén maškír léskire duje čhavénde.

¹³Syg paló saró davá, tyrnedyr čhavó skedyjá saró i gijá pe duratuny phuv i odój jov rozmekcia péskire lové dro rozmekno džiibén.

¹⁴Kiéli jov rozmekcia saró, so sys léste, ĥáda, bari bokh jaciá pir doiá phuv; jov lyjá te bokhaljol;

¹⁵tedy jov gijá i terdijá pe butý khetané javirenca ke jekh xuláj pe doiá phuv, a kodová manúš bičhadiá les pe péskiri félda te čaravel balyčen;

¹⁶i jov javélas rado te xal čalés balyčane roški, so balyče xané, ne nikón na dyjá léske.

¹⁷Tedy jov dogijá ke péskiri godý i phendiá: ‘Miré dadéste isyn adákicy butiarné, savé xána čalés maró, a me adáj meráva bokhátyr!

¹⁸Uštava me i džáva ke péskiro dad, phenáva léske: ‘Dádo! Me kerdjom grého angíl Devléste i angíl túte.

¹⁹Me butýr na som mol, sob (kaj) tu te khares man čhavésa; le man ke pe syr péskire butiarnes.’

²⁰Uštyjá jov i gijá ke péskiro dad. Kiéli jov sys iščo (inké) dur péskire kheréstyr, dad dykhciá les; dadéskire ileske jaciá tango les i dad prastándyja, obuhtyldia čhavés vasténca i občamudia les.

²¹‘Dádo, — phendiá čhavó, — me kerdjom grého angíl Devléste i angíl túte. Me butýr na som mol, sob (kaj) tu te khares man čhavésa.’

²²Ne dad khardiá péskire pishar'jén: ‘Janén sygedýr naj fededýr uribén i urjaven pe léste. Urjaven angrusty léske pe vast i triviki pe ĥerá.

²³Janén thule cieliantos, čhinen les i javása te xas i te radynaspe,

²⁴pal-dová so kadavá miro čhavó sýrby myjá vaš mánge i kakaná otdžidyjá, xasijá i lathiape’. I jone lyné te viesielinenpe (te lošaljon).

²⁵A phuredýr léskiro čhavó sys pe félda: i kiéli jov džálas pale i džálas pašýl ke kher, tedy šundiá bagaiben i khelyben.

²⁶Jov dyjá gódla jekhe dynarís i phuciá, so doj dasavo sys?

²⁷A dynári otphendiá: ‘Tyró pšal javdiá i tyró dad začhindiá thule cieliantos, pal-dová so tyró pšal javdiá sastó’.

²⁸Jov xoliásyja i na kamdiá te zadžál dro kher. Ne dad léskiro vygijá i khardiá les.

²⁹Ne phuredýr čhavó otphendiá dadéske: ‘Me adákicy berš keráva butý pe túte i nijékhvar na phendjom lav proti tyré uphenybená. Ne tu nijékhvar na dyján mánge xoc' buznores (kozljonkos), sob (kaj) me te viesielinavpe (te lošaljovav) péskire malénca;

³⁰a kadavá tyró čhavó kakaná javdiá, kiéli rozmekcia saró péskiro mištypén nalačhé džuvliénca; ne tu ž začhindiá thule cieliantos vaš léske’.

³¹Dad otphendiá: ‘Mo čhavoró! Tu san so dyvés Mánca, i saró, so mánde isyn, isyn tyró;

³²ne paldavá trej te viesielinaspe (te lošaljovas), so kadavá tyró pšal sys sýrby muló vaš aménge i kakaná otdžidyjá, xasijá i lathiape.’”