Read Biblija - Pe Baltitko Romani čib (Romanes) 2019 Baltic Romani Bible Luka 16 Bible Online

Luka 16 - Biblija - Pe Baltitko Romani čib (Romanes) 2019 Baltic Romani Bible bible

Luka 16

¹I phendiá Isúso ž i Péskire sykliaibnytkonénge: “Sys jekh barvaló manúš, konéste sys kheréskiro barydyró, savés manušá bangiakirenas xuláske, so jov rozmekelas xulaskiro mištypén.

²I adavá barvaló manúš vykhardia les i phendiá: ‘So da me šunava pal túte? Pode mánge rozginybnytko papiria, syr tu xulaindian miré mištypnasa, pal-dová so butýr túke naštý te jačespe kheréskire barydyrésa.’

³Ne kheréskiro barydyró phendiá péske: ‘So mánge te keráv, kiéli Miro raj otlela mándyr butý pir kherítko mištypén? Me na mogináva te ĥanavav, ladžava te mangav.

⁴Me džinóm (džináv), so me javáva te keráv; sob (kaj) manušá te prilén man dre péskire kherá, kiéli man zlena butiátyr pir kherítko mištypén.’

⁵I jov vykhardia pir jekhéste ke pe kažnoné manušés, kon sys vužlo léskire ráske, i phendiá pervoneske: ‘Kicý tu san vužlo miré ráske?’

⁶I odová otphendiá: ‘Šel cebry (miery) dzet’ (jeliejo). I kheréskiro barydyró phendiá Léske: ‘Le tyró rosčhinybnytko, beš sýges i čhin pandždešá’.

⁷Tén'ci jov phuciá javirestyr: ‘A kicý tu san vužlo miré ráske?’ I jov otphendiá: ‘Šel goné (miery) parnó giv.’ I kheréskiro barydyró phendiá léske: ‘Le tyró rosčhinybnytko i čhin ohtodešá’.

⁸I šardia ž raj péskire načačune kheréskire barydyrés, so jov adiáke god'vares kerdiá. Pal-davá so manušá, savénge isyn drógo jekh davá svéto, isyn godedyr manušéndyr, savénge isyn drógo duhovno (fanoskiro) svéto.

⁹I Me phenáva tuménge: malynenpe barvalypnasa dalé svetóstyr, savó moginéla te javél bibáht adiáke, syr isyn lačhó Devléske, sob (kaj), kiéli davá barvalypén končynelape, tumé te javén prilyné dro viéčno kher.’”

¹⁰Kodová, kon isyn patiaibnýtko dro nabaró réndo, javéla čačunó dro baró réndo; a kodová, kon isyn načačuno dro nabaró réndo, javéla adiáke-pac' načačuno dro baró réndo.

¹¹I kóli tumé na sánas čačuné dro dalé svetoskiro barvalypén, kon tuménge dopatiala Bolybnáskiro čačunó barvalypén?

¹²I kóli tumé na sánas čačuné dro čúžo barvalypén, kon tuménge déla péskiro mištypén?

¹³Nijékh dynári (sluga) na moginéla te dynar'jel duje range, ci jekhés te javéla te na kamel, ne javirés te kamel, ci javéla čačunó ke jekh, a pe javiréste javéla te dykhél vučipnástyr. Tuménge naštý te dynarinén Devléske i barvalypnaske.”

¹⁴Šundlé saró davá i Farisiéi, savé zoralés tradynepe pal barvalypén i jone lyné te sanpe Isusóstyr.

¹⁵Jov phendiá lénge: “Tumé sykavéna pes, so tumé san čačuné manušénca angíl manušénde, ne Devél džinéla tumaró iló; so manušá ginéna pal bari patýv, isyn džungalypén (brytkima) angíl Devléste.

¹⁶Mojzáskiro Zakóno i prorokéngire začhinybena sys angíl Ianoste Boldeipnariste: dalé časostyr bahtalý zan (zvies') pal Devléskiro Kralipén dro Bolybnáskiro Rajo mištophenelape, i kažno manúš zorjása zadžála andré.

¹⁷Ne sygedýr bolybén i phuv prodžána, syr jekh tykny bukvica (literka) Zakonóstyr našadjola.

¹⁸Kažno manúš, kon mekéla peskirjá romniá i léla javirja, odová keréla biladžaipén; i kažno manúš, kon léla javirja, savjá rom mekciá, odová keréla biladžaipén’.

¹⁹“Gada, sys jekh barvaló manúš i jov ur'jelaspe dre porfiritko i naj fedydyr ídia, xaja i pija so fededýr so dyvés.

²⁰I sys jekh čororó manúš, pir lav Lazarjo, kon sys paštó pašýl barvaleskiri pórta i léskire masá sys dre fránsy,

²¹a adavá bógo sys rado te čaljol koterenca, so perenas barvalé — manušéskire skamindestyr, i džukela, kiéli javénas, čarenas léskire fránsy.

²²I sys adiáke: kiéli myjá bógo Lazarjo, tedy Jangóly zalydžine les te javél pašýl Avraamoste.

²³I barvaló manúš adiáke-pac' myjá i garadé les. I jov menčyndiape drieván dro liúno (ado) i, kiéli jov ĥazdyjá jakhá, tedy dykhciá durál Avramos i Lazarjos, savó sys pašýl Léste.

²⁴I jov dyjá gódla zoralés: ‘Dádo, Avraamie, potangine man i bičháv Lazarjos, sob (kaj) jov te kindiakirel angúšt dro paní i te kindiakirel mirí čib, so me adiáke menčynavape dre daja xačkirdy jag’.

²⁵Ne Avrámo phendiá: ‘Čháva, priripir, so túte sys lačhó džiibén, kiéli tu sánas džidó, a Lazarjoste sys pharó džiibén. A kakaná jov adáj radynélape, a tu menčynesape.

²⁶I apríč davá saró, maškír aménde isyn bidugnoskiro properiben, so odolé, kon kaméla te piridžal adathýr ke tumé, naštý te piridžan ke ame.’

²⁷Tedy barvaló manúš phendiá: ‘Me mangav tut, Dádo, te bičhavel Lazarjos ke Miré-dadéskiro kher;

²⁸odój mánde pandž pšála, a jov te patiakirel len te na javén pe davá štéto te menčynenpe.’

²⁹Ne Avraámo phendiá léske: ‘Lénde isyn Mójza i proróki: mek te šunén len’.

³⁰A barvaló manúš phendiá: ‘Nad, Dádo Avraamie! Ne kóli vari-kon muléndyr te javél ke jone, jone riskirenas péskiro džiibén ke Devél’.

³¹Ne Avraámo phendiá léske: ‘Kóli jone na kandéna Mojzás i prorokén, tedy xoc' i vari-kon otdžidjolas muléndyr, jone na upatianas.’”