Read Biblija - Pe Baltitko Romani čib (Romanes) 2019 Baltic Romani Bible Luka 18 Bible Online

Luka 18 - Biblija - Pe Baltitko Romani čib (Romanes) 2019 Baltic Romani Bible bible

Luka 18

¹I Isúso rosphendiá lénge primiéro (sykaibén) vaš dová, sob (kaj) jone te mangénpe Devléske i te na obmeken šeré:

²“Dro jekh fóro sys jekh sendári, savó na darandyja Devléstyr i na kutiakirdia manušén;

³dro dová-pac' fóro sys jekh pivly (udova), saví javélas ke sendári i rakirdiá: ‘Zaterdjov pal mánde Miré vergéndyr!’

⁴Ne sendári ĥará (dlúges) na kerdiá nisó, ne korigedýr (pozžedýr) phendiá péske: ‘Mek me i na darava Devléstyr i na kutiakirava manušén,

⁵ne pal-dová so adáia pivly dohaia mánge, me zatyrdjovava pal láte, sob (kaj) joj te na zamenčynel sarésa man!’

⁶I phendiá Raj Devél: “Šunén ža, so načačuno sendári rakírla.

⁷I so ž, naúšto Devél na zatyrdjola pal odolénde, konés Jov vykedyjá, savé javéna te mangénpe roibnasa Léske dyvés i rat, i Jov javéla te tyrdel otphenybnasa?

⁸Me phenáva tuménge, so Jov sýges zaterdjola pal lénde. A kiéli Čhavó Manušéskiro javéla, ci lathéla Jov patiaibén pe phuv?”

⁹I Isúso rosphendiá davá primiéro (sykaibén) adiáke-pac' odolénge, savé dumindle zoralés, so jone sys lačhé i, savé dykhné phut'kiribnasa pe javirende:

¹⁰“Duj manušá javné dre khangirí te mangénpe Devléske; jekh sys Farisiejo, javír mytoskiro skedyibnari.

¹¹Farisieje uštyjá i mangdiápe Devléske: ‘Dévla, parikiráv Túke, so me na som adasavó, syr javír manušá: rozmaribnarja; manušá, savé keréna bibáht javirénge; manušá, savé keréna biladžaipén; ci syr kadavá mytoskiro skedyibnari.

¹²Me postinava duj móly dro kurko, me dáva déšto paš doléstyr, so me zakerava dro čhon.’

¹³Ne mytoskiro skedyibnari sys terdó duredýr i jov na mogindiá až te ĥazdel jakhá péskire ke bolybén, a mardia pes dro kolýn i rakirdiá: ‘Dévla! Potangine man, grehitkoné manušés’.

¹⁴Me phenáva tuménge, jov gijá kheré butýr čačunesa, pal-dová so Devél butýr otmekciá léskire gréhi, syr kodová Farisiejo. Pal-dová so kažno manúš, kon ĥazdéla pes kokoró, Devél čhuvéla les teledýr, a kon čhuvéla pes kokoró teledýr, kodolés Devél ĥazdéla vučedýr.”

¹⁵I manušá lydžánas ke Isúso tykné bijatén, sob (kaj) Jov te čilavel (te dotkninel) len; ne sykliaibnýtka, kiéli dykhné dová, na domekenas bijatén ke Jov.

¹⁶Ne Isúso khardiá bijatén ke Pe i phendiá: “Mekén bijatén te javén ke Me, i na obrikiren len, pal-dová so Kralipén dro Devléskiro Rajo javéla vaš adasavé manušénge, savé sys syr kadalé bijaty.

¹⁷Čačes, Me rakiráva tuménge: kon na priléla Kralipén dro Bolybnáskiro Rajo adiáke, syr adavá bijáto, odová na zadžála dro Kralipén.”

¹⁸I vari-savó barydyró phuciá Isusóstyr: “Lačhó Sykliakiribnáskiro! So mánge te keráv, sob (kaj) te doresav viéčno džiibén?”

¹⁹Ne Isúso phendiá Léske: “Palsó tu kharesa man ‘Lačhó?’ Nikón isyn lačhó. Lačhó isyn jekh Devél.

²⁰Tu džinésa priphenybená: ‘Na ker biladžaipén, na zamar, na čor, na sovlahá xohanés; kutiakir péskire dadés i péskire da.’

²¹Manúš phendiá: “Saró davá me zrakhcjom čhavoripnastyr.”

²²I kiéli Isúso šundiá davá, Jov phendiá: “Jekh túke na uhtýlla (nádosi): džá, rozbikin saró péskiro barvalypén, i rozde lové bogenge, tedy túte javéla kučipén pe bolybén; tén'či jav, džá pal Mánde.”

²³Kiéli manúš šundiá davá, jov jaciá drieván smentno, pal-dová so jov sys drieván barvaló.

²⁴A kiéli Isúso dykhciá, so manúš jaciá drieván smentno, jov phendiá: “Syr pharó javéla barvaleske te zadžál dro Kralipén dro Devléskiro Rajo;

²⁵pal-dová so lokhedýr vierbliudoske te džal pir suvjakiro kan, syr barvaleske te zadžál dro Kralipén dro Bolybnáskiro Rajo.”

²⁶I manušá, kon šundlé Les, phučné: “Kon da moginéla tedy te zrakhelpe?”

²⁷Ne Isúso phendiá: “So manušénge naštý, odová saštý Devléske.”

²⁸I Pétri phendiá: “Ame saró jačkirdiam i gijam pal Túte.”

²⁹I phendiá Isúso: “Čačes, Me rakiráva tuménge: nane nikonés (nane nikón), kon jačkirdiá kher, ci dadés, ci da, ci čhavorén, ci romniá vaš Devléske,

³⁰sob (kaj) léste te na javél but móly butedýr dro davá džiibén, i dro viéčno džiibén, savó javéla.”

³¹Isúso khardiá dre rig Péskire dešudujé sykliaibnytkonén i phendiá lénge: “Dykhén, ame zadžasa dro Jerusalimo, i saró, so proróki čhindlé pal Manušéskire Čhavéste, kerélape ke kónco/iagóro (spolninelape);

³²Les déna dro vastá (zdena) Najudénge; i jone javéna te sanpe xoliames Léstyr, i te ladžakiren, i te čungarden pe Léste.

³³I kiéli jone domarena Les, tedy jone muliakirena Les; i pe tríto dyvés Jov otdžidjola.”

³⁴Ne jone na ĥalyné ni jekh lav daléstyr. Dalé-lavengiro smyslo sys ĥarado léndyr, i jone na džindlé, pal so Isúso rakirdiá.

³⁵I sys adiáke: kiéli Isúso džálas pašyledýr ke Jerihóno, vari-savó kororó bógo sys beštó pašýl drom i mangdiá bogitko dyibén.

³⁶I kiéli jov šundiá šumo manušéndyr, savé džánas pašýl, jov phuciá, so davá moginel te javél?

³⁷Jone phendlé Léske: “Isúso Nazarietostyr džála.”

³⁸I jov dyjá gódla: “Isúsie, Čhavó Davidóskiro! Potangine (požalin) man!”

³⁹Manušá, savé sys angíl léste, lyné te rakirén léske xoliása, sob (kaj) jov te javél štyl, ne jov délas gódla iščo (inké) zoraledýr: “Čhavó Davidóskiro! Potangine man!”

⁴⁰Isúso terdijá i phendiá te janén les. I kiéli jov podgíia pašyledýr ke Isúso, Isúso phuciá léstyr:

⁴¹“So tu kamésa, sob (kaj) Me te keráv túke?”

⁴²Jov otphendiá: “Rajo Dévla, sob (kaj) me moginavas te dykháv.” Isúso phendiá Léske: “Dykh ža: tyró patiaibén vysastiakirdiá tut.”

⁴³Kororó adáj že lyjá te dykhél i gijá pal Léste, i šardia Devlés. I saré manušá, kiéli dykhné davá, slavindle parikiribnasa Devlés.