Read Biblija - Pe Baltitko Romani čib (Romanes) 2019 Baltic Romani Bible Luka 19 Bible Online

Luka 19 - Biblija - Pe Baltitko Romani čib (Romanes) 2019 Baltic Romani Bible bible

Luka 19

¹I zagijá Isúso dro Jerihóno i džálas pir davá fóro.

²I, ĥáda, jekh manúš, pir lav Zakhiejo, kon sys barydyró pe mytytko (taksytko) kher i sys drieván barvaló,

³jov kamdiá te dykhél Isusós, Savó Jov isyn, ne jov na mogindiá pal manušénde, pal-dová so jov sys tyknó baripnasa.

⁴Jov zaprastandyja angíl, zarescia pe kašt-sikamoro te dykhél Isusós, pal-dová so Isusóske treindiá te džal dalé dromésa.

⁵Kiéli Isúso podgíia ke dová štéto, Jov dykhciá upré, dykhciá Zakhiejos i phendiá Léske: “Zakhieje! Res telé sygedýr, pal-dová so adadyvés Mánge trej te jačavpe dro tyró kher.”

⁶I Zakhiejo sýges rescia telé i prilyjá Les ke pe radymása.

⁷I saré, kon dykhné davá, rakirdé xoliames: “Jov zagijá te jačélpe ke grehítko manúš.”

⁸Ne Zakhiejo uštyjá i phendiá Ráske-Devléske “Rajo Dévla! Me otdáva bogenge paš saré Miré mištypnástyr i, kóli me lyjom xohaibnasa butýr vari-savé manušéstyr, me dáva pale štar móly butýr.”

⁹I Isúso phendiá Léske: “Adadyvés zrakhibén javdiá dro davá kher, pal-dová so adavá manúš adiáke-pac' isyn Avraamóskiro čhavó;

¹⁰Čhavó Manušéskiro javdiá te rodél i te zrakhél odolén, savé xasiné i otrisine Devléstyr.”

¹¹Kiéli manušá šunenas Isusós, Jov phendiá lénge iščo (inké) jekh primiéro (sykaibén), pal-dová so Jov sys nádur Jerusalimóstyr i jone dumindle, so jone syg javéna te dykhén Kralipén, kaj Devél javéla te xulainél.

¹²Jov ž phendiá lénge: “Vari-savó manúš baré rodóstyr gijá baré dromésa, sob (kaj) te jačél kralísa pe doiá phuv i te javél pale.

¹³Jov khardiá ke pe péskire deše pishar'jén i dyjá deš miny kažnonéske, i phendiá lénge: ‘Kofarinen lénca (mekén len dro réndo), paka me javáva’.

¹⁴Ne léskire manušénge sys drieván na pir iló, i bičhadé manušén pal léste, sob (kaj) jone te phenén: ‘Ame na kamasa, sob (kaj) jov te javél amaró králi’.

¹⁵I kiéli adavá manúš javdiá pale, jov priphendiá te vykharel pishar'jén, savénge jov dyjá lové, sob (kaj) te džinél, kon so zakerdia.

¹⁶I pérvo pishári podgíia i phendiá: ‘Rajo! Me zakerdjom deš miny tyré minasa’.

¹⁷I manúš phendiá léske: ‘Mištó, tu san lačhó pishári; pal-dová so tu sánas patiaibnýtko nabaré lovenca, me keráva tut barydyrésa pe deš fórja’.

¹⁸Javír pishári podgíia i phendiá: ‘Rajo! Me zakerdjom pandž miny tyré minasa’.

¹⁹Manúš phendiá adiáke-pac' i léske: ‘Me keráva tut barydyrésa pe pandž fórja’.

²⁰Tríto pishári podgíia i phendiá: ‘Rajo! Ĥáda, tyré lové, savé me rakhcjom dro pohtan.

²¹Me darandyjom tútyr, pal-dová so tu san pharó manúš: sčhinesa odój, kaj na sieindian, i skedesa odój, kaj na rosčhudian’.

²²Raj phendiá léske: ‘Tu san zlydnia dynári, tyré lavénca me javáva te sendinav tut: tu džindian, so me som pharó manúš i so me skedáva, kaj na rosčhudjom i sčinava, kaj na sieindjom.

²³Sóske tu na čhudián miro rup dro banko, sob (kaj) me, syr risijom, te lav pale péskire lové kofosa’.

²⁴I tedy jov phendiá odolénge, savé sys terdé pašýl: ‘Len léstyr mina i den kodoléske, konéste isyn deš miny’.

²⁵Ne jone phendlé léske: ‘Rajo! Léste isyn deš miny’.

²⁶“Ne me phenáva tuménge, so kažnonéske, savéste isyn, javéla butýr dynó, ne kodolestyr, savéste nane, lélape léstyr dová, so isyn léste.”

²⁷A adalé vergén, savé na kamlé, sob (kaj) me te javav králi pe lénde, janén len adarík i domaren angíl mánde.’”

²⁸Isúso phendiá davá i gijá angíl lénde duredýr ke Jerusalimo.

²⁹I kiéli Jov sys pašýl gavá Vifagija i Vifanija, angíl bérga, savjá khardé Olivítko (Jelieonoskiri), Jov bičhadiá dujén Péskire sykliaibnytkonendyr i phendiá:

³⁰“Džán dro gav, savó isyn angíl tuménde, i kiéli tumé zadžána odorík, tumé dykhéna priphandle terné oslós (miegarís), pe savéste nikón na sys beštó, otphanden les i janén adarík.

³¹Kóli vari-kon phučela tuméndyr, ‘So tumé keréna’, phenén adiáke léske: ‘Jov trej Ráske-Devléske’.

³²Bičhadé sykliaibnýtka giné i lathné saró, syr Isúso phendiá lénge.

³³I kiéli jone otphandenas osljonkos, léskire xulaja phučné léndyr: ‘Sóske tumé otphandena osljonkos’.

³⁴Jone otphendlé: “Jov trej Ráske-Devléske”,

³⁵i otlydžine osljonkos ke Isúso; i čhudé upré pe léste péskire uribená, i bešliakirde Isusós pe osljonkoste.

³⁶I syr Jov tradelas, manušá čhuvénas péskiro uribén pe drom.

³⁷Kiéli Isúso podtradyja ke Olivitkone-Bergakiro sklono, saré sykliaibnýtka lyné te slavinén parikiribnasa Devlés radymása, zoralé zanienca pal saré Léskire dívna butiá, savé jone dykhné;

³⁸jone rakirdé: “Te javél bahtiakirdó Králi, Savó džála vaš lav Devléskiro! Te javél ramánjo (miro) pe bolybén i sláva dre upratunende.”

³⁹Tedy vari-savé Farisijendyr, kon sys maškír manušénde, phendlé Isusóske: “Sykliakiribnariskiro! Priphen sykliaibnytkonénge te javén štyl!”

⁴⁰I Isúso otphendiá lénge: “Me phenáva tuménge, so kóli jone javéna štyl, tedy bará javéna te den gódla.”

⁴¹I kiéli Jov javdiá pašyledýr ke fóro, dykhciá pe léste i zarondia,

⁴²i phendiá: “Kóli tu xoc' adadyvés džinesas, so túke trej vaš tyró ramánjo (miro)! Ne davá iščo (inké) garadó jakhéndyr”;

⁴³pal-dová so javéna dyvesá pe túte, so tyré vérgi ĥazdéna barikady trusciál túte i oblena tut saré rigéndyr; i stasavena tut saré rigéndyr,

⁴⁴i rosphagirena saró pe phuv i zamarena tyré čhavorén: i na jačéla bar pe bar, pal-dová so tu na udžindian časo, kiéli Devél javdiá te zrakhél tut.”

⁴⁵I zagijá Isúso dre Khangirí i lyjá te tradel javrí sarén, savé biknenas i kinenas,

⁴⁶i rakirdiá lénge: “Isyn čhindló: ‘Miro kher javéla te kharelpe ‘mangipnytko kher,’ a tumé kerdé léstyr rozmaribnar'jengiri kirčyma.’”

⁴⁷I Jov sykliakirdiá len so dyvés; rašángire barydyrá i lylvarítka i godephuré dumindle, syr te xasiakirén Les,

⁴⁸i na pridumindle nisó, so te kerén Lésa, pal-dová so manušá tyrdynepe ke Jov te šunén.