Read Biblija - Pe Baltitko Romani čib (Romanes) 2019 Baltic Romani Bible Luka 2 Bible Online

Luka 2 - Biblija - Pe Baltitko Romani čib (Romanes) 2019 Baltic Romani Bible bible

Luka 2

¹Dre dolé dyvesá Rimoskiro khieningo (kiesarjo) Aŭgusto dyjá uphenybén te piriginen saré manušén, savé sys pir sarí phuv.

²Davá sys pérvo piriginybén i les kerénas dro dová časo, kiéli o Kviriniejo sys Sirijakire-themeskiro barydyró.

³Kažnonéske treindiá te javél dro péskiro fóro vaš piriginybén.

⁴I Joza (Iosifo) adiáke-pac' gijá Nazarietostyr, savó isyn dre Galiliéia ke Judéia dro fóro Viflieemo, savó kharlape adiáke-pac' “Davidóskiro fóro”, pal-dová so jov sys Davidóskire manušéndyr i rodóstyr,

⁵te začhinelpe Marijasa, Saví gindiape léske syr romný, i Saví sys pharí.

⁶I sys adiáke: paka jone sys odój, javdiá Láke dyvés te bijanél,

⁷i Joj bijandiá Péskire Pervoné Čhavés, i pat'kirdia Les dre pherne, i čhudiá Les dre jasla (khurly), pal-dová so na sys lénge štéto dro zatradypnytko kher (gostinica).

⁸Sys čhupnárja (pastuhi) pe kodoia rig pe félda, i rakhenas ratý péskiro gurto.

⁹I jekhátyr (srázu) Devléskiro Jangólo javdiá angíl lénde, i Devléskiri sláva syr jaguno dud (svéto) zasvencyndia pašýl lénde; i pyjá pe lénde bari dar.

¹⁰I Jangólo phendiá lénge: “Na darén, me phenáva tuménge lačhó nevipen pal bari rádyma vaš saré manušénge.

¹¹Adadyvés dro Davidóskiro fóro bijándyja tuménge Zrakhibnari, savó isyn Xristóso, Raj Devél.

¹²I, ĥáda, tuménge znako (špéra): tumé lathéna Tykné Bijatos pat'kirdes dre pherne, i Jov javéla dre jasla.”

¹³I jekhátyr sykadyne but bolybnýtka xaladybena (Jangóly) khetané dalé Jangolosa; jone šarenas Devlés i rakirénas:

¹⁴“Te slavinelpe Devél dre upratune bolybena, i te javél ramánjo (miro) pe phuv maškír manušénde, savéndyr Devél radynélape.”

¹⁵I sys adiáke: kiéli Jangóly giné krig léndyr pe bolybén, to čhupnárja phendlé jekh jekhéske: “Javén dro Vifliejémo te dykhas, so odój kerdiápe, pal so sys davá nevipen Rástyr-Devléstyr amarestyr.”

¹⁶I jone sýges javné, i lathné Maríia i Jozas (Iosifos) i Tykné Bijatos, Savó sys paštó dre jasla (khurly).

¹⁷Kiéli jone dykhné davá, jone rosphendlé pal dová, so sys phendló lénge pal dalé Tykné Bijatoste.

¹⁸I saré, kon šundlé davá, divindlépe pe dová, so lénge čhupnárja phendlé.

¹⁹Ne Maríia ripirelas saré dalé lavá, i duminelas pal lénde xor dro Péskiro iló.

²⁰I čhupnárja risiné pale šarenas i parikirenas Devléske pal saró, so jone šundlé i dykhné adiáke, syr lénge sys phendló.

²¹I kiéli proginé ohtó (bidujéngiro deš) dyvesá, sob (kaj) te občhinen Tykné Bijatos, dyné Léske lav Isúso, lav, savó dyjá Jangólo angíl davá, syr Léskiri Daj jaciá pharí Lésa.

²²I kiéli proginé (nakhle) dyvesá, savé sys na žužé pir Mojzáskiro Zakóno, jone jandlé les te svenciakiren (te sykavén i te čhuvén dre rig Les) angíl Devléste,

²³syr isyn čhindló dro Devléskiro Zakóno: “Kažno muršoro, savó vydžála dákire ločoviátyr (utrobatyr), te javél svenciakirdo vaš Devléske”,

²⁴sob (kaj) te janén svénto dyibén, syr isyn phendló dro Devléskiro Zakóno, dujén golumbicen ci dujén golumbengire tyknoren.

²⁵I, ĥáda, sys manúš, savés khardé Simieono; jov sys čačunó manúš i darelas Devléstyr; jov užakirelas, kiéli javéla Izrailjoskiro Zrakhibnari, i Dúho (Fáno) Svénto sys pe léste.

²⁶I Dúho (Fáno) Svénto otkerdia džinybén Léske, so jov na meréla, paka jov dykhéla Devléskire Xristosós.

²⁷Dúho (Fáno) lydžijá les i jandiá dre Khangirí. I kiéli dad i daj jandlé Bijatos Isusós, sob (kaj) te kerén vaš Léske dová, so trej pir Zakóno,

²⁸to Simieono lyjá Les pe vastá, parikirdia Devléske i phendiá:

²⁹“Kakaná, Rajo, Tu otmekesa Péskire pisharís, pir Lav Tyró ramanjosa (mirósa).

³⁰Pal-dová so Miré jakhá dykhné Tyró zrakhibén,

³¹Savó Tu prigotovindian angíl saré manušénde,

³²Jov javéla syr Dud (Svéto) te otkerel Tyrí vólia vaš Najudénge. Jov janéla sláva Tyré manušénge, Izrailjoske.”

³³Ne o Joza, i Bijatoskiri Daj divindlépe pe dová, so sys phendló pal Léste.

³⁴Simieono bahtiakirdiá len i phendiá Marijake, Dake Leskirjake: “Pal Léste but manušá Izrailjostyr peréna i ĥazdénape syr bahtalé, Jov javéla sýrby ĥiertýk (znako) Devléstyr, pal Konéste manušá javéna te rakirén xoliása;

³⁵i kurtála (miečo) promarela tyró iló, sob (kaj) te otkerenpe ĥaradé dúmy.”

³⁶Adáj sys adiáke-pac' Anna, proročica, Fanuiloskiri čhaj, Asiroskire rodóstyr, saví dodživdia ke phurané beršá i dživdiá péskire romesa féni eftá berš, syr joj gijá paloróm.

³⁷Dalé pivliake (udovake) sys ohtodešá štar berš; joj na džálas Khangirjátyr i dynarindiá Devléske postosa i mangipnasa Devléske.

³⁸Dre dová-pac' mardó (štúnda) joj podgíia i slavindia Devlés, i rakirdiá pal Čhavoreste sarénge, kon užakirdia vyrakhiben dro Izrailjo.

³⁹I kiéli Joza i Maríia kerdé saró pir Devléskiro Zakóno, jone risiné dro léngiro fóro Nazarieto dre Galiliéia.

⁴⁰Bijáto barjolas i zoraljolas, jačelaspe ŭsa god'varedyr; i Devléskiro bahtylen sys pe Léste.

⁴¹So berš dad i daj Léskire džánas ke Jerusalimo pe Svénko Patradí.

⁴²I kiéli Léske sys dešudúj berš, jone javné pe svénko, syr len sykliakirdé.

⁴³Kiéli svenkoskire dyvesá končyndlepe, jone risjonas kheré, ne Terné-Beršengiro Isúso jaciápe dro Jerusalimo, a Léskire dadá na dykhné davá;

⁴⁴a jone dumindle, so Jov džála javirenca, ne syr jone proginé (nakhle) dyveseskiro drom, lyné te rodén Les maškír semencende i džindlende (pindžkirdende),

⁴⁵i pal-dová so jone na lathné Les, to jone risiné dro Jerusalimo te rodél Les.

⁴⁶Pe tríto dyvés jone lathné Les dre Khangirí, kaj Jov sys beštó maškír sykliakirdende: Jov šunelas len i phučelas Léndyr.

⁴⁷Saré, kon šundiá Les, divindlépe pe Léskiri godý i pe dová, syr Jov otphenélas.

⁴⁸Kiéli Léskire dadá dykhné Les, jone zdivindlepe, i Léskiri Daj phendiá Léske: “Mro Čhávoro! So Tu kerdián aménge? Ĥáda, Tyró dad i Me baré dukhasa rodyjam Tut.”

⁴⁹Jov phendiá lénge: “Vaš so tuménge treindiá te rodén Man? Ci na džinenas tumé, so Mánge trej te javav te keráv Miré-Dadéskiro réndo.”

⁵⁰Ne jone na ĥalyné lavá, so Jov phendiá lénge.

⁵¹I Isúso gijá lénca i javdiá dro Nazarieto, i Jov zoralés kandelas len. A Léskiri Daj ripirdia saré kadalé lavá dro Péskiro iló.

⁵²I Isúso jačelaspe god'varedyr i barjolas dro láska Devléstyr i manušéndyr.