Read Biblija - Pe Baltitko Romani čib (Romanes) 2019 Baltic Romani Bible Luka 20 Bible Online

Luka 20 - Biblija - Pe Baltitko Romani čib (Romanes) 2019 Baltic Romani Bible bible

Luka 20

¹Dro jekh dasavo dyvés, kiéli Isúso sykliakirdiá dre Khangirí i phendiá bahtaló lav, rašángire barydyrá i lylvarítka khetané godephurenca javné i phendlé Léske:

²“Phen aménge, savé pravosa Tu kerésa saró davá? Ci kon dyjá Túke dasavo pravo?”

³I Isúso otphendiá lénge: “I Me phučava tuméndyr pal jekh, i phenén mánge:

⁴‘Ianoskiro boldeipen sys bolybnástyr ci manušéndyr?’

⁵Jone ž rakirdé maškír péste: ‘Kóli phenása, so bolybnástyr’, Jov tedy phenéla: ‘Sóske ada tumé na patiandyné léske?’

⁶ne kóli phenása: ‘Manušéndyr,’ tedy saré manušá javéna te marén barénca, pal-dová so jone džinéna mištés, so Iáno sys proróko!”

⁷I jone otphendlé: “Ame na džinása, katýr jov sys.”

⁸I Isúso phendiá lénge: “I Me na phenáva tuménge, savé pravosa Me keráva davá.”

⁹I Isúso lyjá te rakirél manušénge dasavo primiéro (sykaibén): “Jekh manúš čhudiá vinagrádniko i dyjá les dro najmo vinagradar'jenge, i kokoró tradyjá pe baró časo.

¹⁰I dro péskiro časo jov bičhadiá pisharís ke vinagradarja, sob (kaj) jone te den léske barjakirdé (plódy) vinagradnikostyr; ne vinagradarja uhtyldé les, mardé i otbičhade les krig nisosa.

¹¹I nevéstyr jov bičhadiá javire pisharís: ne jone adiáke-pac' mardé les, ladžakirdé i otbičhade les krig nisosa.

¹²I nevéstyr jov bičhadiá tritone pisharís; ne jone domardé les ke rat, i tradyne javrí les.

¹³I tedy vinagradnikoskiro xuláj phendiá: ‘So te keráv mánge? Me bičhaváva Miré drogoné čhavés. So kiéli jone dykhéna les, xaj, jone javéna te ladžan, sob (kaj) te čilaven les.’

¹⁴Ne kiéli vinagradarja dykhné les, phendlé jekh jekhéske: ‘Ĥáda, javéla xuláj mištypnaskiro — javén, zamarasa les i léskiro mištypén javéla aménge’.

¹⁵I jone zorjása lydžiné les javrí i zamardé. So javéla te kerél vinagradoskiro xuláj lénca?

¹⁶Jov javéla i muliakiréla adalé vinagradar'jen i vinagrádniko déla dro najmo javirénge.” I kiéli jone šundlé davá, tedy phendlé: “Mek te na javél!”

¹⁷Ne Isúso dykhí pe lénde, phendiá: “So davá čhinybén značynéla: ‘Bar, savó na prilyné butiarné, jaciá šeralé baresa vaš uprečhuiben kheréskiro.’”

¹⁸I kažno manúš, kon peréla pe davá bar, rozmarelape pe kokalý, ne pe konéste jov peréla, rostasavela kodolés pe kokalý.”

¹⁹I rašángire barydyrá i lylvarítka dyné godý péske (dumindle) dre dová-pac' mardó (štúnda) te uhtylén Les, ne jone darándyne manušéndyr, pal-dová so jone ĥalyné, so Jov rakirdiá davá primiéro (sykaibén) pal lénde.

²⁰I jone dykhné rakhibnýtkes pal Isusóste, podbičhade čorahane manušén, savé pričhudepe čačuné manušénca, sob (kaj) te uhtylén Les dro lav te zden Les Rimóskire balunitkoneske (pravitieljoske), konéste sys zor i pravo te sendinel.

²¹I podbičhade manušá phučné Léstyr: “Sykliakiribnáskiro! Ame džinása, so Tu rakirésa i sykliakiresa čačipén, na dykhí, savó adavá manúš isyn:

²²Ci isyn pir Zakóno te pleskiras myto kiesarjoske ci nad?”

²³Ne Isúso džindiá léngiri dujemuitkima i phendiá: “Sóske tumé Man propatiakirena?

²⁴Sykavén Mánge dinarijo: konéskiro muj i lav isyn vyčhindlé adái?” Jone otphendlé “Kiesarjoskire.”

²⁵Tedy Isúso phendiá lénge: “Otdén kiesarjoskiro Kiesarjoske, a Devléskiro Devléske.”

²⁶I jone na mogindlé te uhtylén Isusós dro lav angíl manušénde, a divindlépe pe Léskiro otphenybén i jačné štyl.

²⁷I javné vari-savé Sadukiei, savé rakirénas, so nane otdžidyipen meribnástyr, javné ke Isúso i phučné:

²⁸“Sykliakiribnáskiro! Mójza čhindiá aménge, so kóli meréla pšal manušéste, jačkiréla romniá bi čhavorengiro, mek léskiro pšal te lel dalia romniá paloróm, sob (kaj) te riskirél pale ródo mulé pšaleskiro.

²⁹Sys eftá (bitrinéngiro deš) pšála, i pérvo pšal lyjá romniá i myjá bi bijatengiro;

³⁰i javír pšal lyjá la paloróm i myjá bi bijatengiro;

³¹i tríto pšal lyjá la; i saré eftá pšála adiáke-pac', i myné, i na jačkirdé čhavorén;

³²syg pal sarénde i džuvlý myjá.

³³Dro otdžidyipen meribnástyr, konéskiri romný javéla kadaja džuvlý? Pal-dová so saré eftá pšála sys lákire romá.”

³⁴Isúso phendiá lénge: “Manušá, savé lathéna drógima dro jekh davá svéto, lenape i vydžána paloróm;

³⁵ne manušá, savé isyn lačhé te dživén pe dová svéto i te otdžidjon meribnástyr, na javéna te lenpe i te vydžán paloróm;

³⁶jone na javéna te merén, pal-dová so jone javéna šerá (rávnes) Jangolenge; i jone javéna Devléskire čhavoré, pal-dová so jone javéna sýrby čhavoré, savé otdžidine meribnástyr.

³⁷Ne syr mulé otdžidjona, Mójza sykadiá dre péskiri lylvarí pal xrústo, savó xačolas jagása, kiéli jov kharéla Ras-Devlés Devlésa Avraamoskiresa i Devlésa Isaakoskiresa i Devlésa Jakovoskiresa;

³⁸ne Jov isyn na Devél mulenge, a Jov isyn Devél džidé manušéngiro; saré isyn džidé vaš Léske.”

³⁹Vari-savé lylvarítka phendlé: “Sykliakiribnáskiro! Tu lačhés otphendian!”

⁴⁰I lénde butýr na sys muršypen te phučel Isusóstyr, pal vari-so Jov ža phendiá lénge:

⁴¹“Syr davá rakiréna, so Xristóso isyn Čhavó Davidóskiro,

⁴²Davído ž kokoró phendiá dre Psalmengiri Lylvarí: ‘Phendia Raj Devél, Miré Ráske-Devléske: ‘Beš pe čačó vast Mándyr,

⁴³paka Me čhuváva vergén Tyrén tel ĥerá tyré’.

⁴⁴Davído ž Kokoró khardiá Les ‘Raj Devél”, katýr ža Jov isyn čhavó Léskiro?’”

⁴⁵I kiéli saré manušá šundlé Isusós, Jov phendiá Péskire sykliaibnytkonénge:

⁴⁶“Rakhénpe lylvaritkonendyr, savé kaména te psirén dre dind'kirde uribená i kaména, sob (kaj) manušá te den ‘paklono’ lénge pe targitka štéty; savé kaména te bešén pe anglatuné štéty dre sinagogi i pal khardé skaminda;

⁴⁷savé obhana pivliengire kherá i mangénape Devléske ĥará (dlúges), sob (kaj) len te dykhén. Adasaven manušén užakiréla pharó sendiakiriben.”