Read Biblija - Pe Baltitko Romani čib (Romanes) 2019 Baltic Romani Bible Luka 21 Bible Online

Luka 21 - Biblija - Pe Baltitko Romani čib (Romanes) 2019 Baltic Romani Bible bible

Luka 21

¹Isúso dykhciá, syr barvalé manušá čhuvénas lové dre Khangirjákiri piralý (tyknori);

²i Jov dykhciá adiáke-pac', syr vari-saví čorori pivly (udova) čhudiá duj xarkuné (miedítka) ‘gaspria (liepty).

³I phendiá Isúso: “Čačes, Me rakiráva tuménge: adáia čorori pivly čhudiá butýr saréndyr;

⁴pal-dová so jone čhuvénas dyibén Devléske péskire barvalypnastyr; a joj péskire čororipnastyr dyjá saró, so láte sys; saró so sys láte te dživél.”

⁵Kiéli vari-savé Léskire sykliaibnýtka rakirdé pal Khangirí, so joj sys šukár drogoné barénca i darenca, Isúso phendiá:

⁶“Javéna dyvesá, kiéli daléstyr, so tumé dykhéna, na jačélape bar pe bar; savó te na javél phagirdó.”

⁷Jone phučné: “Sykliakiribnáskiro! Phen aménge, kiéli davá saró javéla i saví špéra (primieta) javéla angíl, syr saró davá kerélape?”

⁸I phendiá Isúso: “Rakhénpe, sob (kaj) nikón te na xohavél tumen, pal-dová so but javéna ke tumé Miré lavésa i javéna te rakirén: ‘Me som Jov,’ i ‘Časo javdiá;’ na džán pal lénde.

⁹I kiéli tumé šunéna pal maribena i bunty, na andyršan; pal-dová so saró davá trej te javél; ne davá na javéla iščo (inké) kónco (jagóro).”

¹⁰Tedy Jov phendiá lénge: “Ĥazdenape manušá pe manušénde i kralipén pe kralipén;

¹¹phuv javéla te trinskirelpe dre rázna štéty, javéna baré bokha i meribnytka fránsy, i javéna darane sykaibena i baré znamiénii (ĥiertyká) bolybnástyr.

¹²Ne angíl saró davá manušá javéna te zakeden tumen i te tradén tumen, javéna te zden tumen dre sinagogi i štaribena; i javéna te lydžán tumen angíl kral'jénde i balunitkonende pal Miro lav;

¹³ne davá javéla saštypen vaš tuménge te rosphenén pal patiaibén dre Mánde.

¹⁴Javén murškané dro tumaró iló te na obduminen angíl, so tuménge te otphenen te zaterdjon pal péste;

¹⁵pal-dová so Me dáva tuménge lavá i godý, so tumaré vérgi na zmarena tumen dro lav, i jone adiáke-pac' na déna ráda (na zmoginena) te bangiakiren tumen dro dová, so tumé otphenena.

¹⁶I až dadá i pšála javéna te zden tumen, i semency i drúgi (malá), i vari-konés tuméndyr zamarena;

¹⁷i kažno manúš javéla te na sykavél patýv zoralés tuménge pal Miro lav.

¹⁸Ne nijékh bal na xasjola tumaré šerestyr.

¹⁹Ne tumaré vyrikiribnasa tumé zrakhena dúho (fáno) vaš čačunó džiibén.

²⁰Ne kiéli tumé dykhéna, so xaladé obdžana Jerusalimo rigéndyr, tedy džinén, so syg javéla golotýnia.

²¹Tedy odolé, kon isyn dre Judéia, mek te našén dre bérgi, i kon isyn dro fóro, mek te vydžán foróstyr; i kon isyn dro gav, mek te na zadžál dro fóro:

²²pal-dová so davá javéla kára pe manušénde dre dolé dyvesá, sob (kaj) te spolninélpe, so isyn čhindló dro Svénto Čhinybén.

²³Men'ka javéla tedy perale džuvlienge i džuvlienge, savé čaravena kolynesa bijatén dre dolé dyvesá; pal-dová so javéla bari bída pe phuv i javéla Devléskiri kára pe manušénde.

²⁴I jone peréna kurtalátyr i vari-savén léndyr lydžána dro pliéno ke javír nácyi; i Náiudy javéna te štakiren Jerusalimo, paka jone javéna te rikirén zor.

²⁵I korigedýr (pozže) daléstyr vari-savé znamiénii (ĥiertyká) javéna te kerenpe pe kham, pe čhon i pe čergeniá, a manušénde pe phuv javéla dukh pe iló, morjoskire (derjavéskire) rjovostyr i valnendyr, savé javéna daranes te ĥazdénpe;

²⁶i manušéngire ile javéna te roskošenpe darátyr i užakiribnastyr, so javéla duredýr pir saró svéto, pal-dová so bolybnáskire zorja javéna trinskirde.

²⁷I tedy manušá javéna te dykhén Manušéskire Čhavés, Savó javéla te džal telé dre óbloki zorjása i jarkone Devléskire slavása.

²⁸A kiéli saró davá javéla te spolninélpe, tedy pridykhenpe i ĥazdén šeré, pal-dová so tumarí vólia javdiá pašyledýr.’”

²⁹I phendiá Isúso lénge primiéro (sykaibén): “Dykhén pe inžyritko kašt i javír kaštá;

³⁰kiéli jone rozmekena patria (listy), tedy tumé džinéna, so lynaj (milaj) javéla syg.

³¹Adiáke-pac' i tumé, kiéli tumé dykhéna, so davá saró adiáke kerlape, džinén, so Devléskiro Kralipén dro Bolybnáskiro Rajo javdiá pašyledýr.

³²Čačes, Me rakiráva tuménge: na prodžála (nakhela) davá manušýtko ródo, paka saró davá kerélape ke kónco/iagóro (spolninelape).

³³Bolybén i phuv prodžána, a lavá Miré na prodžána (nakhena).

³⁴Ne rakhénpe kokoré pibnastyr i xabnastyr bi mierakiro, sob (kaj) tumaró iló te na javél pherdó tradypnasa pal barvalypén i džiibnytkone pharipnasa, i, sob (kaj) davá dyvés te na javél čorahanés pe tuménde;

³⁵pal-dová so jov javéla sýrby felý (sietka) pe sarénde, kon isyn dro davá svéto.

³⁶Vaš davá dykhén i na soven i mangénpe Devléske kažno časo, sob (kaj) tumé te javén mol te zrakhenpe saréstyr daléstyr, so trej te javél, i te terdjon angíl Manušéskire Čhavéste.”

³⁷I Isúso sykliakirelas so dyvés dre Khangirí, i tel rat Jov džálas javrí, kaj sys Jov pe bérga, saví khardé “Olivítko Bérga”;

³⁸i saré manušá kažno zlóko (ránko) javénas ke Jov dre Khangirí te šunén Les.