Read Biblija - Pe Baltitko Romani čib (Romanes) 2019 Baltic Romani Bible Luka 22 Bible Online

Luka 22 - Biblija - Pe Baltitko Romani čib (Romanes) 2019 Baltic Romani Bible bible

Luka 22

¹Javélas syg Svénko Apriesnokengiro, savó khardé Patradí,

²i rašángire barydyrá i lylvarítka dumindle, syr te muliakirén Isusós čorahanés, pal-dová so jone darándyne manušéndyr.

³Tén'ci nálačho (satana) zagijá dro Judáskiro iló, savés khardé Iskarioto i jov sys jekh dešudujé sykliaibnytkonendyr.

⁴I jov gijá i rakirdiá rašángire barydyrénca i xaladytkone barydyrénca, syr te del Isusós dre vastá lénge.

⁵I jone obradyndlepe i dyné lav te den léske lové.

⁶Juda dyjá lav te kerél davá i lyjá te rodél lačhí vakancyja (slučajo), sob (kaj) te zdel Isusós na angíl manušénde.

⁷Javdiá Apriesnokengiro Dyvés, kiéli treindiá te čhinen Patraditkone bakrores (Patradí).

⁸I bičhadiá Isúso Petris i Ianos, phení: “Džán i kerén Patraditko Xabén vaš aménge, sob (kaj) ame te xas les.”

⁹Ne jone phučné: “Kaj kamésa, sob (kaj) ame te kerás?”

¹⁰Isúso ž phendiá lénge: “Ĥáda, kiéli tumé javéna te zadžán dro fóro, tedy tumen pirilela manúš, savó javéla te lydžál pirí paniésa; džán pal léste dro kher, dro savó jov zadžála,

¹¹i tumé phenén kheritkoné xuláske: ‘Sykliakiribnáskiro rakírla túke: ‘Kaj javéla štúba, sob (kaj) Me Péskire sykliaibnytkonénca te xav Patradí?’

¹²I jov sykavéla upratuny bari štúba; odój kerén skamínd vaš aménge.’”

¹³I giné sykliaibnýtka i lathné, syr lénge Isúso phendiá i kerdé Patraditko Xabén.

¹⁴I kiéli javdiá mardó (časo), Isúso besciá pal skamínd khetané dešudujé Apostolenca.

¹⁵I phendiá Jov lénge: “Me drieván kamdjom te xav davá Patraditko Xabén tuménca angíl dová, syr Mánge te vyrikirav mén'ki.

¹⁶I Me phenáva tuménge, so korigedýr (pozžedýr) daléstyr Me butýr na javáva te xav davá xabén, paka davá čačunó smyslo vaš Patradí kerélape ke kónco / jagóro (spolninelape) dro Devléskiro Kralipén dro Bolybnáskiro Rajo.”

¹⁷Tén'ci Isúso lyjá tahtái, phendiá parikiriben Devléske i phendiá: “Len davá i rosčhuven maškír péste.

¹⁸I Me phenáva tuménge: Me na javáva sarésa te pjáv aplodo vinagradoskire xrustostyr, paka javéla Devléskiro Kralipén dro Bolybnáskiro Rajo.”

¹⁹Tén'ci Isúso lyjá maró, parikirdia Devlés (Devléske), phagirdiá les, i dyjá lénge; rakirí: ‘Ĥáda, isyn Miré Masá, savé otdenape pal tuménde; davá adiáke i tumé kerén te ripirén pal Mánde.”

²⁰Adiáke-pac' i tahtáj (čaša) korigedýr, syr jone xané maró, Isúso dyjá lénge, phení: “Kadavá tahtáj isyn nevó zavieto dro Miro rat, savó čhuvélape pal tuménde.

²¹I dykhén: adáj isyn vast kodoleskiro, kon isyn Mánca pal skamínd, i savó biknela Man;

²²i Čhavó Manušéskiro džála pe meribén, syr Devléske isyn lačhó, ne bída kodolé manušéske, savó zdela Les.”

²³I jone lyné te dophučen jekh jekhestyr, kon davá moginéla léndyr te javél, sob (kaj) te kerél davá.

²⁴I sys phučiben maškír lénde, konéske léndyr trej te ginelpe syr naj baredýr.

²⁵I Isúso phendiá lénge: “Najudengire kral'jénde isyn pravo pe lénde, i léngire baré raja, savé xulainena, rakiréna, so jone keréna lačhipén manušénge.

²⁶Ne te na javén adiáke maškír tuménde: savó isyn baredýr tuméndyr, te javél ternedyr; i savó isyn šeraló, te javél dynári (sluga).

²⁷Pal-dová so, kon isyn baredýr; kodová, savó isyn beštó pal skamínd, ci kodová, savó podela pe skamínd? Kodová, savó isyn beštó pal skamínd. A Me som maškír tuménde, syr kodová, savó podela pe skamínd.

²⁸Ne tumé vyterdine Mánca khetané dre Miré pharipena.

²⁹I Me piridava tuménge kralítko pravo, syr Miro Dad piridyja mánge,

³⁰sob (kaj) tumé te xan i te p'jen pal skamínd dro Miro Kralipén, i te bešén pe trony te sendinén dešudúj Izrailjoskire ródy.”

³¹[I phendiá Raj Devél r.s.]: “Simonie, Simonie! Dykh ža, nálačho drieván zakamdiá te propatiakirel tumen sýrby te prosieinel tumen pir sito (porizen), syr prosieinena parnó giv,

³²ne Me mangdjompe Devléske pal túte, sob (kaj) tyró patiaibén te na tyknjol, i tu, kiéli risjosa pale ke Me, tedy podrikiresa tyré pšalén.”

³³I Pétri otphendiá Léske: “Rajo Dévla! Me som skedynó te džav Túsa i dre štaribén, i pe meribén.”

³⁴I phendiá Isúso: “Me rakiráva túke, Pétri: bašno na probagala adadyvés angíl dová, syr tu trin móly otphenesape Mándyr.”

³⁵Tén'ci Isúso phendiá lénge: “Kiéli Me bičhadjom tumen bi mujéngiro (kapšukoskiro), bi sakvakiro i bi ĥeritkonengiro, ci sys trej tuménge vari-so?” Jone otphendlé: “Nad.”

³⁶Tedy Isúso i phendiá lénge: “Ne kakaná konéste isyn mujengiro (kapšuko), mek te lel les: adiáke-pac' i sakva, konéste nane kurtála, mek te biknel péskiro uribén i te kinel kurtála,

³⁷paldavá Me phenáva tuménge, so dová, so isyn čhindló, trej te spolninélpe Mánca: “Jov sys čhudo maškír rozmaribnar'jende”: pal-dová so saró, so isyn pal Mánde, syg končynelape.”

³⁸Sykliaibnýtka phendlé: “Rajo Dévla! Adáj isyn duj kurtaly (sabli).” Isúso otphendiá lénge: “Uhtýlla (dósi).”

³⁹I gijá Isúso foróstyr i syr Jov prisyklyja, gijá pe Olivítko bérga, i Léskire sykliaibnýtka adiáke-pac' giné pal Léste.

⁴⁰I kiéli Jov javdiá pe štéto, tedy phendiá lénge: “Mangénpe Devléske, sob (kaj) tumé te na perén dro propatiakiriben.”

⁴¹I Jov otgijá léndyr pe adákicy, pe kicý dočhurdesa bar, i terdijá pe čangá, i mangdiápe Devléske dasavé lavénca:

⁴²“Dádo! Kóli te javél Tyrí vólia, lýdža davá tahtáj dre rig Mándyr; — ne te javél na Mirí, a Tyrí vólia.”

⁴³I Jangólo bolybnástyr sykadyjá Léske i zorjakirdia Les.

⁴⁴Isusóste sys pharó pe iló i Jov zoralés mangdiápe Devléske. Léskiri khamlyn (poto) sys, syr rateskire kapli (čolynia), so perenas pe phuv

⁴⁵I kiéli Jov uštyjá mangipnastyr, tedy Jov javdiá pale ke sykliaibnýtka; i lathiá, so jone sys suté péskire tugatyr

⁴⁶I phendiá Isúso lénge: “So tumé san suté? Uštén i mangénpe Devléske, sob (kaj) tumé te na perén dro propatiakiriben.”

⁴⁷I kiéli Isúso iščo (inké) rakirdiá, ĥáda, sykadyne but manušá, i ake, jov, savés khardé Juda, jekh dešudujedyr sykliaibnytkonendyr, džálas angíl lénde, i jov podgíia ke Isúso te čamudel Les.

⁴⁸Isúso phendiá Léske: “Júde! Tu biknesa Manušéskire Čhavés čamudypnasa?”

⁴⁹I sykliaibnýtka, savé sys pašýl Léste, kiéli dykhné, ke so davá dogijá, phučné Léstyr: “Rajo Dévla! Te čhinas aménge kurtalenca?”

⁵⁰I jekh léndyr čingirdia pisharís rašángire barydyreskires i otčingirdia léske čačó (pravo) kan.

⁵¹Ne Isúso phendiá: “Mekén, uhtýlla (dósi)!”, — i Jov čiladiá léskiro kan i vysastiakirdiá les.

⁵²I phendiá tedy Isúso rašángire barydyrénge i khangirjákire-xaladytkone barydyrénge, godephurenge, savé javné pe Léste: “Syr pe rozmaribnariste tumé vyginé kurtalenca i kilenca (konkenca)?

⁵³Kiéli Me sómas so dyvés tuménca dre Khangirí, tedy tumé naĥazdyne vastá pe Mánde; a kakaná — tumaró mardó (štúnda) javdiá i nalačhi zor léla te xulainél dro kalypén (ciamlypén).”

⁵⁴I jone lyné Isusós, lydžiné les krig i jandlé dro pervoné-rašángire barydyreskiro kher. I Pétri ž džálas duripnastyr.

⁵⁵I jone kerdé jag maškír gréda (dvóro) i bešné khetané; Pétri ž besciá maškír lénde.

⁵⁶I jekh dynárica, kiéli dykhciá les pašýl jag, pridykhciape rakhunes pe léste i phendiá: “I kadavá manúš sys Lésa.”

⁵⁷Ne Pétri otphendiape Léstyr, phení: “Džuvlije, me na džinóm Les.”

⁵⁸I syg javír manúš, syr dykhciá Petris, phendiá: “I tu san jekh léndyr.” Ne Pétri otphendiá: “More, me na som.”

⁵⁹I kiéli progijá (nakhcia) pašé mardó, iščo (inké) vari-kon lyjá zorjása te dophenel: “Čačó, kadavá manúš adiáke-pac' sys Lésa, pal-dová so jov isyn adiáke-pac' Galilejanino.”

⁶⁰Ne Pétri otphendiá: “More, me na džinóm, so tu rakirésa.” I adáj že, paka jov rakirdiá, probagandia bašno.

⁶¹I Raj Devél riskirdiá šeró, podykhciá pe Petriste; i priripirdia Pétri Isusóskiro lav, syr Jov phendiá Léske: “Angíl, syr probagala bašno, tu trin móly otphenesape Mándyr.”

⁶²I Pétri, vygii javrí, rondiá kirkes.

⁶³I manušá, kon rikirdia Isusós, kerdé bipatyvakiro saben (zdiekindlepe) pe Léste i mardé Les;

⁶⁴i jone phandenas Léskire jakhá, phučné Léstyr, phení: “Uĥaljov, proróko, kon pekadiá Tut?”

⁶⁵I jone phendlé but košybnytka lavá pe Léste.

⁶⁶I kiéli jaciá dyvés, godephuré manušéndyr, rašángire barydyrá i lylvarítka skedynépe, i lydžiné Isusós angíl péskiro Siniedriono i phendlé:

⁶⁷“Kóli Tu san Xristóso, phen aménge.” Jov phendiá lénge: “Kóli Me phenáva tuménge, tumé na patiána;

⁶⁸i kóli Me phučava tuméndyr, tumé na javéna te otphenen Mánge, i na otmekena Man;

⁶⁹ne korigedýr daléstyr Čhavó Manušéskiro javéla te bešél pir čačó vast Devléstyr.”

⁷⁰I jone saré phendlé: “Tu, xaj, san Čhavó Devléskiro?” I jov otphendiá lénge: “Tumé rakiréna mištés, so Me som?”

⁷¹I jone phendlé: “Save aménge iščo (inké) akaná trej jakhítka, pal-dová so ame kokoré šundiám davá Léskire móstyr?”