Read Biblija - Pe Baltitko Romani čib (Romanes) 2019 Baltic Romani Bible Luka 23 Bible Online

Luka 23 - Biblija - Pe Baltitko Romani čib (Romanes) 2019 Baltic Romani Bible bible

Luka 23

¹[Saré adalé manušá uštyné i lydžiné Isusós ke Piláto].

²I jone lyné te bangiakiren Isusós, rakirí: “Ame pridžindiam, so adavá manúš lydžála krig amarí nacyja čačuné droméstyr i priphenela te na pleskiren myto Kiesarjoske; Jov dophenéla, so Jov Kokoró isyn Xristóso Králi.

³I Piláto šylales phuciá Léstyr: “Tu san Králi Judéngiro?” I Jov otphendiá: “Adiáke, syr tu rakirésa.”

⁴Tedy Piláto phendiá rašángire barydyrénge i manušénge: “Me na lathjom ni saví bang dre kadalé manušéste.”

⁵Ne jone terdiné pe péskiro bangiakiriben, rakirí duredýr pe Isusóste: “Jov podmarela manušén pe búnto i sykliakiréla adiáke pir sarí Judéia, Galilejatyr až ke adarík.”

⁶Ne kiéli Piláto šundiá pal Galiliéia, phuciá šylales, ci sys adavá manúš Galilejatyr;

⁷i syr jov udžindiá, so Isúso sys phuvjátyr, kaj Irodo xulaindia, bičhadiá Les ke Irodo, savó sys dro Jerusalimo dre dolé dyvesá.

⁸I kiéli Irodo dykhciá Isusós, jov drieván obradyndiape, pal-dová so jov ĥará kamdiá te dykhél Les: jov šundiá but pal Léste, i jov užakirdia te dykhél Isusóstyr vari-savé dívy;

⁹i Irodo vyphučelape but Isusóstyr, ne Jov nisó na otphendiá.

¹⁰Rašángire barydyrá i lylvarítka uštenas i zoralés bangiakirenas Les.

¹¹Irodo péskire xaladenca kerdé bipatyvakiriben Léske i sandlepe xoliames Léstyr, urjakirde pe Léste parnó kralítko uribén i bičhadiá pale Les ke Piláto.

¹²A dro dová dyvés Piláto i Irodo jačné drúgi (malá) maškír péste, ne ĥaredyr jone sys xoliamé jekh pe jekhéste.

¹³I Piláto khardiá khetané ke pe rašángire barydyrén, i šeralen, i adiáke manušén,

¹⁴i phendiá lénge: “Tumé jandlé adalé Manušés ke me sýrby Jov podmarelas manušén ke búnto; i, gada, me dophucjom Les angíl tuménde i me na lathjom ni saví bang dro dová, dro so tumé bangiakirena Les.”

¹⁵I Irodo phendiá: “Me ž bičhavavas Les ke jov, i, ĥaljon, nisó na lathné dre Léste, sob (kaj) Jov te javél bangó ke meribén.

¹⁶Paldavá me kamám, sob (kaj) Les te marén čhupniasa syr kára, i me otmekáva Les.”

¹⁷Jov sys bangó te otmekél jekhe manušés štaribnastyr pe svénko.

¹⁸Ne jone zadyne gódla khetané: “Meribén Léske! Otmek Varavas aménge!” —

¹⁹adavá sys jekh manúš, savés čhudé dro štaribén pal búnto, so sys dro fóro, i pal zamariben.

²⁰A Piláto kamdiá te otmekél Isusós i nevéstyr rakirdiá lénca.

²¹Ne jone zadyne gódla dro otphenybén: “Primar Les pe trušúl, primar!”

²²Jov phendiá lénge tríto mólo: “Savó ž čoripén Jov kerdiá? Me na lathjom ni saví bang dre Léste ke meribén: me čhuváva kára pe Léste i otmekáva Les.”

²³Ne jone duredýr dénas gódla so isyn zor, sob (kaj) te primaren Isusós ke trušúl. I sataki jone pirizorjakirde péskire zanienca (glosienca).

²⁴I Piláto prisendindia Isusós adiáke, syr jone mangné.

²⁵Jov otmekciá lénge odolés, savó sys beštó pal búnto i zamariben, pal savéste jone mangné les, a Isusós dyjá dre vastá lénge pir vykedyiben.

²⁶I syr xaladé lydžiné Les krig, zauhtylde vari-savé Simonos, Kirienejatyr, savó džálas feldatyr, i čhudé pe léste trušúl te lydžál pal Isusóste.

²⁷But manušá džánas pal Léste, i džuvliá, savé rondlé i rakirdé jasvénca pal Léste.

²⁸Isúso riskirdiá šeró i phendiá: “Džuvliale Jerusalimóstyr! Na rovén pal Mánde, a rovén pal péste i péskire čhavorende;

²⁹ĥáda, javéna dyvesá, kiéli tumé phenéna: ‘Bahtalé isyn kodolé, savé na moginéna te bijanen, i džuvliá, savé na bijanenas, i džuvliá, savé na čarade kolynesa’.

³⁰Tedy jone javéna te rakirén bergenge: ‘Peren pe aménde’, i bergicenge: Ĥaraven amen;’”

³¹Kóli jone dasavo keréna zelene kaštesa, so tedy javéla šuké kaštesa?”

³²I duje javire manušén, rozmaribnar'jen, adiáke-pac' lydžiné Isusósa te primaren pe trušúl.

³³I kiéli jone javné pe štéto, savó kharelpe “Čieriepnytko”, odój jone primarde Les pe trušúl i rozmaribnar'jen jekhés pir čačy rig, javirés pir zérvo rig.

³⁴Isúso phendiá: “Dádo! Darin (primang) lénge, pal-dová so jone na džinéna, so keréna.” Jone ž rosčhuvenas pe pašá Léskire uribená, čhurdyi žriébijo.

³⁵Manušá sys terdé i putravenas péskire jakhá. A léngire barydyrá khetané lénca sandlepe Léstyr, rakirí: “Javirén Jov zrakhelas; mek te zrakhél Kokoró Pes, kóli Jov isyn Xristóso, Saves Devél vykedyjá.”

³⁶Adiáke-pac' i xaladé sandlepe bipatyvakires Léstyr: jone poddžanas i podlydžanas šutlo (uksuso),

³⁷i rakirdé: “Kóli Tu san králi Judéngiro, zrákh Kokoró Pes.”

³⁸I upré Léskire šerestyr sys začhinyben, savó sys pir griekítko i judýtko čibá (čibjá): “Ĥáda, isyn králi Judéngiro.”

³⁹Jekh rozmaribnar'jendyr, savó sys primardo, sandiape xoliames Isusóstyr: “Ci na san Tu Xristóso? Zrákh Pes i amen.”

⁴⁰Ne javír vyrakirdia Léske, phení: “Tu adiáke-pac' na daresa Devléstyr, kóli tu kokoró prisendindlo pe davá-pac'?

⁴¹Aménge ž sys čačunó séndo, so ame sam mol pal dová, so kerdiám; ne Jov ž ni savó čoripén na kerdiá.”

⁴²I jov phendiá Isusóske: “Priripir pal mánde, Isúsie, kiéli Tu javésa syr Králi te xulaines?”

⁴³Isúso phendiá Léske: “Čačes, Me rakiráva túke: adadyvés tu javésa Mánca dro Bolybnáskiro Rajo.”

⁴⁴Davá sys pašé šov mardé (štundy), i jaciá kalypén pir sarí phuv ke jeniáto (bijekhéskiro déšto) mardó.

⁴⁵Kham jaciá ciamlo i šýrma dre Khangirí roskusciape dro maškirál.

⁴⁶I Isúso dyjá gódla zoralé zaniása i phendiá: “Dádo! Me otdáva Péskiro dúho (fáno) dro Tyré vastá!” I kiéli Jov phendiá davá, myjá.

⁴⁷A xaladéngiro barydyró, dykhí davá, phendiá: “Dro kadavá Manúš, so myjá, sys čačipén”, — i jov slavindia Devlés.

⁴⁸Kiéli saré manušá, savé javné pe davá dykhibén, dykhné davá, jone pale lyné te risjon pir kherá i marenas pes dro kolýn.

⁴⁹A odolé saré, savé džindlé Isusós i džuvliá sys terdé nádur i, savé džánas pal Léste Galilejatyr i dykhné davá saró.

⁵⁰I ĥáda, jekh lačhó i patiaibnýtko manúš pir lav Joza (Iosifo), savó sys adiáke-pac' jekh raj barydyrendyr dro séndo (sovieto),

⁵¹i kon na podrikirdia séndo i léngiro prirakiriben Isusóske. Jov sys Arimafejatyr, Judytkone foróstyr i užakirdia kokoró Devléskiro Kralipén dro Bolybnáskiro Rajo;

⁵²jov gijá ke Piláto te mangél Isusóskiro trúpo.

⁵³I kiéli Joza zlyjá les, zakrencyndia trúpo dro žužó pohtan i čhudiá les dre koplíca vyčingirdy dre skála, kaj iščo (inké) na sys paštó ni jekh manúš.

⁵⁴Davá sys parastivín (piatnica), [dyvés vaš prigotovinyben-ju.o.], i ĥáda, sygo treindiá te javél sávato.

⁵⁵I džuvliá, kon giné pal Isusóste Galilejatyr, giné Jozasa i podykhne koplíca i, syr čhudé Léskiro trúpo.

⁵⁶I kiéli jone javné pale, tedy jone kedyne aromatytka čarjá i gudlé draba te khosen; i jone jačnépe štyl savatoné (subotoné), syr trej pir priphenybén dro Zakóno.