Read Biblija - Pe Baltitko Romani čib (Romanes) 2019 Baltic Romani Bible Luka 24 Bible Online

Luka 24 - Biblija - Pe Baltitko Romani čib (Romanes) 2019 Baltic Romani Bible bible

Luka 24

¹Pe zlóko, dro pérvo kurkeskiro dyvés, jone javné ke koplíca i jandlé aromatytka čarjá te makhen (te khosen), savé jone kedyne.

²I jone dykhné, so bar sys riskirdo krig koplicatyr.

³I kiéli jone zaginé dre koplíca, jone na lathné Ráskire-Devléskiro trúpo.

⁴I jone sys terdé dre dar; i ĥáda, javné duj muršá dre gada, savé ziaindle.

⁵Kiéli jone darátyr poklonindlepe mujenca ke phuv, muršá phendlé lénge: “So tumé rodéna Džides, kaj mulé isyn pašté?”

⁶Les nane adái, Jov otdžidyjá: ripirén, so Jov rakirdiá tuménge, kiéli Jov sys iščo (inké) dre Galiliéia:

⁷so Jov phendiá: ‘Treindiá Čhavéske Manušeskireske, sob (kaj) Jov te javél zdyno dre grehitkoné-manušéngire vastá, te javél primardo pe trušúl, i te otdžidjol pe tríto dyvés.’”

⁸I jone priripirde Léskire lavá;

⁹i jone javné pale koplicatyr i rosphendlé saró davá dešujekhenge i sarénge javire manušénge.

¹⁰Odój sys Maríia Magdalina i Iana i Maríia, Jakovoskiri daj; ĥáda, jone i javír džuvliá, savé sys lénca, rosphendlé saró davá Apostolenge.

¹¹Ne dalé-džuvliengire lavá zdynepe Apostolenge sýrby paramýsia (skazka), i jone na patiandyné lénge.

¹²Ne Pétri uštyjá i gijá ke koplíca; jov bandija telé i dykhciá jekh pohtan, savó sys paštó i gijá pale kheré zdivindlo pe dová, so kerdiápe.

¹³I, ĥáda, dro dová-pac' dyvés duj Isusóskire sykliaibnytkonendyr džánas dro gav, Jemauso, so sys pašýl dešujekh kilomietry (eftá versty) Jerusalimóstyr;

¹⁴i jone rakirdé maškír péste pal dová, so kerdiápe.

¹⁵I sys adiáke: kiéli jone rakirdé i obduminenas jekh jekhésa, ĥáda, Kokoró Isúso podgíia pašyledýr ke jone i gijá lénca;

¹⁶ne léngire jakhá sys sýrby zaphandle, sob (kaj) te ĥaljon Les.

¹⁷I Jov phendiá lénge: “Save tuménde rakiribena, so tumé lydžána pir drom? Sóske tumé san smentna?”

¹⁸I jekh léndyr pir lav Klieopa phuciá Léstyr: “Ci tu san jekh dasavo manúš, so javdiá dro Jerusalimo, i tu na džinésa, so kerdiápe dro fóro dre dalé dyvesá?”

¹⁹Jov phuciá: “So ž sys?” I jone phendlé Léske: “Dová, so sys Isusósa Nazarietostyr. Jov sys proróko, Savó kerdiá saró i rakirdiá baré zorjása angíl Devléste i manušénde;

²⁰syr amaré rašángire barydyrá i baré raja zdyne Les pe meribnytko séndo i primarde Les pe trušúl.

²¹Ne ame drieván patiása, so Jov isyn Kodová, Savó zrakhéla Izrailie; a ke saró davá, ĥáda, kakaná tríto dyvés, syr davá saró kerdiápe.

²²I vari-savé amaré džuvliá divindle amen, kiéli jone sys pe zlóko ke koplíca,

²³i jone na lathné Léskiro trúpo, i, kiéli javné, rosphendlé, so jone dykhné, syr Jangóly sykadyne, savé phendlé, so Jov isyn džidó.

²⁴A vari-savé améndyr giné ke koplíca, i na lathné adiáke, syr džuvliá phendlé, ne jone na dykhné Les.”

²⁵I phendiá tedy Isúso lénge: “Ne, tumé san bigodiakire i pharé-iléskire manušá, sob (kaj) te upatian dro dová, so proróki phendlé!

²⁶Ci na treindiá adiáke te vyrikirel Xristosóske dalé mén'ki, sob (kaj) te zadžál dro Péskiro viéčno Kralipén.”

²⁷I Isúso lyjá te rosphenel lénge saré lylvaria Sventoné Čhinybnástyr Mojzastyr ke prorokéngire začhinybena, so sys phendló pal Léste.

²⁸I jone podginé pašyledýr ke gav, karik jone giné; i Isúso sykadiá, so Jov, xaj, kedelape te džal duredýr;

²⁹Ne jone zarikirde Les, phení: “Jačpe aménca, syg javéla bel'vél' i dyvés uže končyndiape.” Isúso zagijá i jaciápe lénca.

³⁰I sys adiáke: kiéli Isúso sys pal skamínd lénca, Jov lyjá maró, bahtiakirdiá i, kiéli phagirdiá, dyjá lénge.

³¹I otkerdepe léngire jakhá, i jone ĥalyné Les. I Isúso sýrby xasijá léngire jakhéndyr.

³²Jone phendlé jekh jekhéske: “Ci na xačija amaró iló, kiéli Jov rakirdiá aménca pir drom i, kiéli Jov piriphenelas Svénto Čhinybén aménge?”

³³I jone uštyné dre dová-pac' mardó (časo) i risiné pale ke Jerusalimo. I jone lathné dešujekhe Apostolen, savé skedynépe khetané javire manušénca,

³⁴savé rakirdé: “Raj Devél čačunés otdžidyjá meribnástyr i sykadyjá Simonoske.”

³⁵I odolé duj manušá piriphendle, so sys pir drom, i syr jone ĥalyné Les, kiéli Jov phagirdiá maró.

³⁶I kiéli jone iščo (inké) rakirdé saró davá, Isúso Kokoró jekhátyr (srázu) terdijá, maškír lénde i phendiá lénge: ““Ramánjo (miro), tuménge.”

³⁷Ne jone zoralés strahádyne i divindlépe darása, pal-dová so jone dumindle, so davá sys duhóskire zdanki lénge.

³⁸Ne Jov phendiá lénge: “Sóske tumé strahádyne? Sóske tumaré ile adiáke kuninenape?”

³⁹Ake, Miré vastá i Miré gera, dykhén, ĥáda Me som. Čilaven Man i rozdykhen, pal-dová so dro dúho (fáno) nane ni loč, ni kokalý, savé Mánde isyn, syr tumé dykhéna.”

⁴⁰Isúso phendiá davá i sykadiá lénge Léskire vastá i ĥerá.

⁴¹Kiéli jone iščo (inké) na patiandyné radymátyr i divindlépe, Jov phuciá léndyr: “Ci isyn adáj vari-so te xas?”

⁴²I jone dyné Léske kotér pekno mačho, i avgín sotendyr.

⁴³I lyjá Isúso i xaja angíl lénde.

⁴⁴I phendiá Jov lénge: “Ĥáda, isyn dolé lavá, savé Me phendjom tuménge, paka Me iščo (inké) sómas tuménca: so saró, so isyn čhindló dro Mojzáskiro Zakóno i dre prorokéngire začhinybena i dre psalmy pal Mánde, trej te spolninélpe (te kerélpe ke kónco/iagóro).”

⁴⁵Tedy Jov dyjá lénge godý te ĥaljol Svénto Čhinybén,

⁴⁶i phendiá lénge: “Adiáke isyn čhindló i adiáke trej Xristosóske te vyrikirel mén'ki, i te otdžidjol meribnástyr pe tríto dyvés;

⁴⁷i, sob (kaj) te phenelpe lav vaš Léskire-Manušéskiro risiben grehéndyr ke Devél, sob (kaj) Jov te otmekél gréhi maškír saré nácyi, lyi te kerél davá Jerusalimóstyr.

⁴⁸I tumé san jakhítka (svidietieli) pal davá.

⁴⁹I, ĥáda, Me bičhaváva tuménge dová, pal so Miro Dad dyjá lav; ne tumé jačénpe dro fóro, paka tumé léna zor upralestyr.”

⁵⁰I Jov vylydžijá len foróstyr ke Vifanija, ĥazdyjá Péskire jakhá i bahtiakirdiá len.

⁵¹I sys adiáke: kiéli Jov iščo (inké) bahtiakirelas len, Jov lyjá te durjol léndyr i lyjá te ĥazdelpe ke bolybén.

⁵²A jone poklonindlepe Léske i javné pale dro Jerusalimo baré radymása,

⁵³i jone sys saró časo dre Khangirí, slavindle i šarde parikiribnasa Devlés. Amín'.