Read Biblija - Pe Baltitko Romani čib (Romanes) 2019 Baltic Romani Bible Luka 4 Bible Online

Luka 4 - Biblija - Pe Baltitko Romani čib (Romanes) 2019 Baltic Romani Bible bible

Luka 4

¹Isúso sys pherdó Sventoné Duhósa i risijá Iordanostyr i Dúho (Fáno) lydžijá Les pe čhučí phuv,

²kaj nálačho propatiakirelas Les štardešá dyvesá i Isúso nisó na xaja dre dolé dyvesá; a kiéli dalé dyvesá proginé, Jov zakamdiá te xal.

³I phendiá Léske nálačho: “Kóli Tu san Devléskiro Čhavó, phen, sob (kaj) dalé bará te jačen marésa.”

⁴A Isúso otphendiá Léske: “Isyn čhindló: ‘Na marésa jekhésa dživéla manúš, a kažnoné lavésa, so vydžála Devléskire uštendyr.’”

⁵Tedy lydžijá Les nálačho pe vučí bérga, i sykadiá Léske sýges pal menta (minuta) saré svetóskire kralipená.

⁶I nálačho phendiá Léske: “Me dáva Túke pravo pe saré dalé kralipená, i léngiri sláva, pal-dová so joj isyn dyný mánge, i me dáva la odoléske, konéske me kamám;

⁷ĥáda, saró javéla Tyró, kóli Tu pokloninesape mánge.”

⁸Isúso otphendiá Léske: “Isyn čhindló: ‘Devléske tyréske kloninpe i Léske jekhéske dynarin (služyn)’”

⁹Tedy nálačho lydžijá Les dro Jerusalimo, i čhudiá Les pe Khangirjákiri stréha (čhakín), i phendiá Léske: “Kóli Tu san Devléskiro Čhavó, uhty, Kokoró, adathýr telé”,

¹⁰pal-dová so isyn čhindló: “Jov déla priphenybén Jangolenge Peskirenge te zrakhél Tut;

¹¹i pe vastá jone lydžána Tut, sob (kaj) Tu te na obštavespe pir bar ĥerjasa Peskirjasa.”

¹²Isúso otphendiá Léske: “Isyn phendló: ‘Na propatiakir Ras-Devlés péskires.’”

¹³Kiéli nálačho končyndia saré propatiakiribena, jov gijá krig Isusóstyr, užakiri javír časo.

¹⁴Odothýr Isúso risijá dre Galiliéia. Jov sys pherdó Duhósa (Sventoné Duhósa); i mavlýn (malva) pal Léste rozgijápe pir sarí phuv, kaj Jov sys.

¹⁵Jov sykliakirdiá dre sinagogi, i saré šarde Les.

¹⁶Tén'ci Isúso javdiá dro Nazarieto, kaj Jov barija, i zagijá dre sinagoga dro sávato (subóta) pir Péskiro prisykliaiben, i lyjá te ginel

¹⁷prorokoskire-Isajoskiri lylvarí, saví Léske podyne; i Jov otkerdia lylvarí, tedy lathiá štéto, kaj sys čhindló:

¹⁸“Devléskire — Ráskiro Dúho (Fáno) isyn pe mánde; pal-dová so Jov vykedyjá Man te rosphenav bahtalý zan (zvies') bogenge i bičhadiá Man te phenáv vólia odolénge, savé isyn dro pliéno, te dykhén svéto kororenge; te otmekav pe vólia i te dzn vast odolénge, savén vérgi pritasade,

¹⁹te rosphenav manušénge pal lačhó berš, dro savó Devél sykavéla Péskiri láska i tangipén (žalima) ke manušá.”

²⁰Isúso zakerdia lylvarí, i kiéli Jov otdyjá pale rašáske, besciá; i saré, kon sys dre Khangirí, lyné rakhunes te dykhén pe Léste,

²¹i ĥáda, Jov phendiá lénge: “Adadyvés kerdiápe ke kónco/iagóro (spolnindiape) Svénto Čhinybén, kiéli tumé šundlé les péskire kanenca.”

²²I jone saré prilyné davá Léstyr i divindepe pe bahtalypén lavéndyr, savé Isúso rakirdiá i jone rakirdé: “Ci na Jov isyn Jozaskiro Čhavó?”

²³Jov phendiá lénge: “Me (džinóm) džináv, so tumé Mánge phenéna: ‘Sastypnárie, vysastiakir Kokoró Pes! Ker davá-pac' adái, pe Péskiri phuv dová, so Tu kerdián dro Kapiernaumo, syr ame šundiám.’”

²⁴I Isúso phendiá lénge: “Čačes, Me rakiráva tuménge: Manušá na kutiakirena ni savé prorokós pe péskiri phuv,

²⁵čačipnása Me phenáva tuménge: But sys pivlia (udovy), kiéli Ilíia dživdiá, syr bolybén sys zakerdo pe trin berš i šov čhoná, i na sys bryšýnd trin pašésa berš i jaciá bari bokh pe doiá phuv;

²⁶i ni ke jekh pivliendyr na sys bičhadó Ilíia, a ke jekh pivly dre Sidonoskiri Sarienta;

²⁷adiáke-pac', sys but nasvale prokazaza dro Izrailjo, kiéli Jelisiejo dživdiá, i ni jekh léndyr na vysastija, apríč Nemanoste Sirijatyr.”

²⁸Kiéli manušá dre sinagoga šundlé davá, jone saré drieván xoliasyne;

²⁹i ĥazdynépe i vytradyné Isusós foróstyr, i lydžiné Les pe bergakiri krutyma, sob (kaj) te čhurdén telé Les bergátyr,

³⁰ne Jov progijá maškír manušénde i durija léndyr.

³¹I Isúso javdiá teledýr dro Kapiernaumo, Galilejakiro fóro, i sykliakirdiá len dro sávato.

³²Léskiro sykliakiribén divindia manušén, pal-dová so Léskire lavéstyr sys bari zor.

³³I sys jekh manúš dre sinagoga, konéste sys nálačho dúho (fáno), i jov zadyja gódla zoralés:

³⁴“So Tu kamésa améndyr, Isúsie Nazarietostyr? Tu javdián te xasiakires amen? My džináv, kon Tu dasavo-Tu san Svénto Devléskiro!”

³⁵Isúso zoralés priphendiá Léske lavénca: “Jav štyl i vydža léstyr.” I nálačho dúho (fáno) radia manušés maškirál dre sinagoga, vygijá léstyr, i ni savó čoripén na kerdiá Léske.

³⁶I jone saré zoralés divindlépe i rakirdé jekh jekhéske: “So davá značynéla, so Jov priphenela nalačhé duhenge zorjása i pravosa, i dúhi (fany) vydžána?”

³⁷I rozgijápe mavlýn (malva) pal Léste pir sarí phuv i štéty, so sys pašýl.

³⁸Isúso uštyjá i gijá sinagogatyr i javdiá dro Simonoskiro kher; Simonoskiri sasuj (tjošča) sys pašty xačkiribnasa; i jone mangné Les pal láte.

³⁹Jov podgíia ke joj i priphendiá xačkiribnaske te mekel džuvliá; i dukh mekciá la; i džuvlý adáj že uštyjá i dynarindiá Isusóske.

⁴⁰Kiéli zagijá kham, saré, konéste sys nasvale raznone dukhenca, janénas len ke Isúso; i Jov čhuvelas upré vastá pe kažnonéste, i vysastiakirelas len;

⁴¹i but nalačhé dúhi adiáke-pac' vydžánas buté manušéndyr godlása i rakirdé: “Tu san Xristóso, Devléskiro Čhavó.” A Jov priphendiá lénge te na rakirén, so jone džinéna, so Jov isyn Xristóso.

⁴²Kiéli jaciá dyvés, Isúso vygijá foróstyr i gijá pe štéto, kaj manušá na sys, a manušá rodyne Les; i kiéli jone lathné Les, jone kamlé te rikirén Les, sob (kaj) Jov te na džal léndyr.

⁴³Ne Jov phendiá lénge: “Mánge trej i javire for'jenge te mištophenav pal Devléskiro Kralipén, vaš dová Me i som bičhadó.”

⁴⁴I Jov rosphenelas Devléskiro lav dre saré Galilejakire sinagogi.