Read Biblija - Pe Baltitko Romani čib (Romanes) 2019 Baltic Romani Bible Luka 6 Bible Online

Luka 6 - Biblija - Pe Baltitko Romani čib (Romanes) 2019 Baltic Romani Bible bible

Luka 6

¹I sys adiáke: pe javír dyvés dro pérvo sávato, pe javír Patradiakiro dyvés Isusóske prigijape te džal pir givitko félda, i Léskire sykliaibnýtka bokhalyne, i lyné te riskirenas kolosy i xan len, khosyi len vasténca.

²Vari-savé Farisiéi phendlé lénge: “Vaš so tumé keréna dová, so naštý te kerén dro sávato?”

³Isúso otphendiá lénge: “Naúšto tumé na gindlé dro Svénto Čhinybén, so kerdiá králi Davído, kiéli jov i léskire malá bokhalyne?

⁴syr jov zagijá dro Devléskiro Kher, i jov i manušá léskire xané svénto maró, savó sys naštý te xal nikonéske, a jekhe rašange?

⁵I phendiá Isúso lénge: “Čhavó Manušéskiro isyn Xuláj i pe sávato.”

⁶I sys adiáke: Isusóske prigijape dro javír sávato te zadžál dre sinagoga i te sykliakirél. I sys odój jekh manúš, savéste čačó (pravo) vast sys šuko.

⁷Lylvarítka i Farisiéi dykhenas rakhibnýtkes pal Léste, ci na sastiakirelas Jov dro sávato, sob (kaj) te lathén bangipen pe Isusóste.

⁸Ne Isúso džindiá, so jone dumindle, i phendiá manušéske šuké vastésa: “Uštý i terdjov maškirál.” I jov uštyjá i terdijá.

⁹Tén'ci phendiá lénge Isúso: “Me phučava tuméndyr: so trej te kerés dro sávato: lačhipén ci fuipén, te rakhés džiibén ci te xasiakires?” Jone sys štyl.

¹⁰Jov podykhciá pe lénde sarénde, i phendiá kodolé manušéske: “Protyrde tyró vast.” Jov protyrdyjá, i nasvaló léskiro vast jaciá sastó, syr i javír vast.

¹¹Jone našade pes tedy xoliátyr i rakirdé maškír péste, so lénge te kerén Isusósa?

¹²I sys adiáke: dre dolé dyvesá Isúso gijá pe bérga te mangélpe Devléske i mangdiápe sarí rat.

¹³Kiéli jaciá dyvés, Jov khardiá Péskire sykliaibnytkonén i vykedyjá dešudujen, savén Jov khardiá Apostolenca:

¹⁴Simonos, savés Jov khardiá “Pétri”, i Jendris (Andriejos), léskire pšalés, Jakovones i Ianos, Filipos i Varfalamiejos,

¹⁵Matfiejos i Fomas, Jakovós, Alfiejoskires i Simonos, savés kharenas Ziloto (Aktivisto),

¹⁶Judas Jakovoskires i Judas Iskariotos, savó i jaciá Léskire zdyibnarisa (Léskiro zdyibnari).

¹⁷Kiéli Isúso zmekciape bergátyr khetané Apostolenca, Jov terdijá pe roŭno (vórto) štéto khetané Léskire sykliaibnytkonénca; i sys but manušá Judejátyr i Jerusalimóstyr, Tiroskire i Sidonoskire šteténdyr, savé sys pašýl mórjo (derjáv):

¹⁸jone javné te šunén Les i te vysastiakirenpe péskire dukhendyr; sys manuše, savé menčyndlepe nalačhé dukhendyr, i jone vysastjonas.

¹⁹Saré manušá kamlé te čilaven Les, pal-dová so Léstyr vydžálas zor i Jov sastiakirelas sarén.

²⁰I Jov ĥazdyjá péskire jakhá pe Léskire sykliaibnytkonende i lyjá te rakirél: “Bahtalé isyn tumé, savé isyn čororé dro dúho, pal-dová so tumaró isyn Kralipén dro Bolybnáskiro Rajo.

²¹Bahtalé isyn tumé, konéskiro iló isyn bokhalo pal Devléskiro lav, pal-dová so Devél pherdiakirela tumaró iló. Bahtalé isyn tumé, savé rovena, pal-dová so tumé javéna te radynénpe.

²²Bahtalé isyn tumé, kiéli manušá javéna drieván te bidykhen tumen i, kiéli jone vytradena tumen i javéna te obkharen tumen nalačhé lavénca i kaliakirena tumaró lav pal Manušéskire Čhavéste.

²³Javén bahtalé i radynénpe dro dová dyvés, pal-dová so bari mazúri (nagrada) Devléstyr užakiréla tumen dro Bolybnáskiro Rajo. Adiáke léngire dadá kerdé prorokenca.

²⁴Bida tuménge, kon isyn barvalé! Pal-dová so tuménde uže isyn lokho džiibén!

²⁵Bida tuménge, konéste isyn saró, so tumé kaména; tumé javéna bokhalé. Bida tuménge, kon salape kakaná; pal-dová so tuménge javéla bari túga i tumé javéna te rovén.

²⁶Bida tuménge, kiéli saré manušá javéna te rakirén lačhipén pal tuménde. Pal-dová so adiáke kerdé xohané prorokenca dadá léngire.

²⁷Ne Me phenáva tuménge, kon šunéla man: sykáv patýv péskire vergénge, kerén lačhipén odolénge, savé keréna čoripén tuménge,

²⁸mangénpe pal odolénde, savé košena tumen i mangénpe pal odolénde, savé našukar otlydžanape ke tumé.

²⁹Kon pekavela tut dre čam (ščoka), rískir ke jov javír, kon otlela tútyr upratuno uribén, otdé léske i gad.

³⁰Kon mangéla tútyr, de, i kon isyn bangó túke, na phuč léstyr pale.

³¹Kerén dová javirénge, so tumé kaména, sob (kaj) javír manušá te kerén tuménge.

³²I kóli tumé sykavéna patýv odolénge, savé sykavéna patýv tuménge, savó parikiriben tuménge? Pal-dová so i grehítka sykavéna patýv odolénge, savé sykavéna patýv lénge.

³³I kóli tumé keréna lačhipén odolénge, savé keréna lačhipén tuménge, savó tuménge parikiriben pal dová? Pal-dová so i grehítka keréna do-pac'.

³⁴I kóli tumé déna dro vužlypén (dlugo) odolénge, savéndyr tumé užakiréna te len pale, savó parikiriben tuménge? Pal-dová so i grehítka déna dro vužlypén, sob (kaj) te len pale adakicyk.

³⁵Ne tumé sykavén patýv tumaré vergénge, kerén lénge lačhipén i javéla tuménge bari mazúri (nagrada) Devléstyr, i tumé javéna Naj Vučedyreskire Devléskire čhavé; pal-dová so Jov isyn lačhó i vaš odolénge, savé na parikirena i vaš nalačhenge.

³⁶Paldavá javén tangipnýtka (žalinybnytka), syr tangipnýtko isyn tumaró Dad.

³⁷Na sendinén, i tumé na javéna sendindle; na bangiakiren, i tumé na javéna bangiakirde; primangen i tuménge javéla primanglo.

³⁸Den i javéna te den tuménge: javéna te den tuménge pherdý miéra, i pritasado saró te javél, bi tangipnaskiro (žalimakiro), javéna te čhuvén tuménge pal breg adákicy, kicý tumé zmoginena te lydžán; savé mierasa tumé mierinena, dasavé-pac' mierasa tumen javéna te mierinen.”

³⁹Isúso phendiá lénge davá primiéro: “Ci moginéla kororó manúš te lydžál javire korores? Kóli adiáke, dujdžiné peréna dre ĥanbín (jama)?”

⁴⁰Sykliaibnýtko isyn na baredýr sykliakiribnaskirestyr; ne kiéli sykliaibnýtko vysykljola saró, jov javéla syr sykliakiribnáskiro.

⁴¹Sóske tu dykhésa pe tykny phusinka dre jakh tyré pšaleskiri, a baró berno na dykhésa dre péskiri jakh?

⁴²Ci syr tu moginésa te phenés péskire pšaléske: ‘Pšála, miro! De, me vylava phusinka tyré jakhatyr,’ kiéli tu kokoró na dykhésa berno dre tyrí jakh? Dujemuítko, vyle angledýr berno péskire jakhatyr, tedy dykhésa, syr te vyles phusinka léskire jakhatyr.

⁴³Nane lačhó kašt (drévo), sob (kaj) te del nalačhé barjakirdé (plódy); i nane nálačho kašt, sob (kaj) te del lačhé barjakirdé.

⁴⁴Pal-dová so kažno kašt udžinena pir léskire barjakirdé, tumé na skedéna inžyro xrustostyr suv'jenca, i vinagrado xrustostyr.

⁴⁵Lačhó manúš vylydžala lačhipén léskire — iléskire kučipnastyr, nálačho manúš vylydžala fuipén léskire-iléskire fuipnastyr; pal-dová, so isyn dro iló, dová uštá rakiréna.

⁴⁶So tumé kharén Man, ‘Rajo Dévla! Rajo Dévla,’ a tumé kokoré na keréna dová, so Me rakiráva?

⁴⁷Kažno, kon javéla ke Me i šunéla Miré lavá, i keréla ke kónco/iagóro (spolninela) len, isyn sýrby:

⁴⁸kodová manúš, savó ĥazdéla kher; i jov ĥanadia xor te čhuvél fundámiento pe bar. I kiéli jaciá potopo, i paní pekadiá dro do kher, kher jaciápe te terdjol, pal-dová so léskiro fundámiento sys pe bar.

⁴⁹A odová, kon šunéla Miré lavá i na keréla pir lénde, isyn sýrby kodová manúš, savó ĥazdyjá kher bi fundamientoskiro; kiéli pekadiá paní dro léste, kher adáj že pyjá, i rospyjape sarésa.”