Read Biblija - Pe Baltitko Romani čib (Romanes) 2019 Baltic Romani Bible Luka 8 Bible Online

Luka 8 - Biblija - Pe Baltitko Romani čib (Romanes) 2019 Baltic Romani Bible bible

Luka 8

¹Paló (poslie) davá Isúso psirdiá foróstyr dro javír fóro, gavestyr dro javír gav; Jov phenelas lav i mištophenelas manušénge pal Kralipén dro Devléskiro Rajo; sys Lésa dešudúj sykliaibnýtka;

²i sys Lésa džuvlý, konés Jov vysastiakirdiá nalačhé duhéndyr i nasvalypnendyr: Maríia, savjá khardé Magdalina, savjátyr eftá (bitrinéngiro deš) nalačhé dúhi vyginé;

³Iana, Xuzaskiri romný, savó sys Irodoskire-kheréskiro barydyró; i Susanna, i but javír džuvliá, savé pomoginenas Isusóske péskire mištypnástyr.

⁴Kiéli but manušá skedynépe pašýl Isusóste, pal-dová so javné manušá saré for'jéndyr, Jov lyjá te rakirél sykliaibnytkone primierosa (sykaibnasa):

⁵“Sieinybnaskiro vygijá te počhuvel péskiri ziárka, i, kiéli jov rosčhurdelas ziárki, vari-savé ziárki pyné pašé drom i len zaštakirde ĥerénca, i bolybnýtka čirikliá pohane len;

⁶iavír ziárki pyné pe baruno štéto, i kiéli jone ŭzgine, to zašutine, pal-dová so na sys paní dro phuv;

⁷iavír ziárki pyné maškír dylyny čar, i dylyny čar vybarija i zamardiá len.

⁸A javír ziárki pyné pe lačhí phuv, i ŭzgine i dyné pribaripen dre šel móly.” I kiéli Isúso phendiá dalé lavá, Jov vyphendia zoralé zaniása: “Konéste isyn kaná, mek te šunél.”

⁹Isusóskire sykliaibnýtka phučné Léstyr, so davá primiéro (sykaibén) značynéla?

¹⁰Jov phendiá: “Tuménge isyn dynó te džinén čorahanyben (garadó čačipén) pal Devléskiro Kralipén dro Bolybnáskiro Rajo, ne vaš javire manušénge rakirlape primierenca (sykaibnenca); jone dykhéna jakhénca, i na dykhéna, jone šunéna kanenca, i na ĥaljona.”

¹¹Ĥáda, so davá sykaibén značynéla: Ziárka isyn Devléskiro lav.

¹²Ziárki, savé pyné pašýl drom, isyn sýrby manušá, savé šunéna, i ke savé korigedýr (pozže) javéla nálačho i léla krig davá lav léngire ilendyr, sob (kaj) jone te na upatian i te na zrakhenpe;

¹³a ziárki, savé pyné pe baruno štéto, isyn sýrby manušá, savé šunéna lav i priléna les radymása; ne lénde lav na zadžála xor dro iló, jone patiána naĥara (dlúges), kiéli javéla propatiakiriben pal lav, jone mekéna te patián;

¹⁴a ziárki, savé pyné maškír dylyny čar, isyn sýrby manušá, savé šunéna lav, ne džiibnáskiri sujéta, barvalypén i džiibnytko lačhipén zamarena davá lav dro léngiro iló, a barjakirdó nikieli na dodžála ke spialyma;

¹⁵a ziárki, savé pyné pe lačhí phuv, isyn sýrby manušá, savé šunéna lav i rikiréna les dro lačhó i kanduno iló i jone vyrikirena, paka davá lav déla barjakirdó (plódo).” Syr phendiá Jov davá, to rakirdiá: “Konéste isyn kaná, mek jov te šunél!”

¹⁶“Nikón, kon zahačkirela momoly, na čhuvéla la tel pirí ci tel čhuibén, a čhuvéla la dro šandalo (podsviečniko), sob (kaj) manušá te dykhén jag, kon javéla javriestyr,

¹⁷pal-dová so nisó nane čorahano, sob (kaj) te na javél šundlo; ni čhakirdo, sob (kaj) te na javél džindló i sarénge te na vydžál pe jakhá.

¹⁸Dykhén ža, syr tumé šunéna, pal-dová so kodoléske, savéste isyn, javéla dynó, a konéste nane, léstyr lélape krig dová nábut, so isyn léste.”

¹⁹I javné ke Isúso daj Léskiri i pšála Léskire i jone na mogindlé te poddžan ke Jov, pal-dová so but manušá sys pašýl Léste.

²⁰I Léske phendlé: “Tyrí daj i Tyré pšála isyn terdé javrí, i jone kaména te dykhén Tut.”

²¹Ne Jov otphendiá lénge: “Mirí daj i Miré pšála isyn odolé, kon šunéla Devléskiro lav i spolninela les.”

²²Jekh dyvés, Isúso zagijá dre bárka Péskire sykliaibnytkonénca i phendiá Lénge: “Piriplyvinasa (dása plíma) pe javír zieroskiri rig.” I jone lyné te piriplyvinen.

²³Kiéli jone piriplyvinenas, Isúso zasutia. Bari balvál pyjá pe ziero i valny začhuvenas len paniésa, jone sýrby uže tasadjonas;

²⁴i sykliaibnýtka podginé ke Isúso, džangade Les i phendlé: “Sykliakiribnáskiro! Sykliakiribnáskiro! Ame xasjovasa” Ne Jov uštyjá, priphendiá balvaliake te na phurdel i panieske te na kuninelpe; jone pirijačne i jaciá štylypen.

²⁵Tedy Isúso phendiá lénge: “Kaj isyn tumaró patiaibén?” Jone sys dre dar i dívo i rakirdé jekh jekhéske: “Ne Kon Jov isyn adasavó, so Jov priphenela balvaliake i valnenge, i odolé kandenas Les.”

²⁶Isúso i Léskire sykliaibnýtka priplyvindle pe javír zieroskiri rig pe phuv Gadarino, so isyn pe javír rig Galilejatyr.

²⁷Kiéli Isúso vygijá pe brégo, pirilyja Les jekh manúš foróstyr, savéste ĥará sys nalačhé dúhi (fany); jov psirdiá bi idiengiro, dživdiá na dro kher, a dre maĥilytka koplicy.

²⁸Kiéli jov dykhciá Isusós, zadyja gódla, pyjá angíl Léste i phendiá zoralé zaniása: “So Tu kamésa mándyr, Isúsie, Naj Vučedyreskire-Devléskiro Čhavó! Mangáva drieván Tut, na menčyn man.”

²⁹Pal-dová so Isúso priphendiá nalačhé duhoske (fanoske) te vydžál dalé manušéstyr; nálačho dúho (fáno) ĥará menčyndia les adiáke, so les phandenas cepénca (zandir'jénca) i sastyrenca pe ĥerá; i nálačho dúho (fáno) tradelas les pe čhučí phuv.”

³⁰Isúso phuciá léstyr: “Syr tut kharéna?” Jov phendiá: “Liegiono”, — paldová so but nalačhé dúhi (fany) zaginé dre léste.

³¹Nalačhé dúhi lyné te mangén Isusós, sob (kaj) Jov te na priphenel lénge te džán dro liúno (ado).

³²Adáj že pe bérga čaradepe but balyče i nalačhé dúhi mangné Isusós, sob (kaj) Jov te del vólia lénge te zadžán dre balyčende. Jov mekciá len.

³³Nalačhé dúhi vyginé manušéstyr, zaginé dre balyčende; i balyčengiro gurto čhurdyjape bregoskire krutymatyr dro ziero i tasadyja.

³⁴Balyčengire čhupnárja dykhné dová, našné i rosphendlé pir fóro i pir gavá.

³⁵Manušá vyginé te dykhén, so kerdiápe i javné ke Isúso, jone lathné manušés, savéste sys nalačhé dúhi (fany), i savó sys beštó ke Isusóskire ĥerá uridó i dre lačhí godý; manušá strahádyne.

³⁶Kodolé, savé dykhné davá, rosphendlé kadalé manušénge, syr adavá manúš vysastiakirdiape.

³⁷I saré manušá Gadarinoskire phuvjátyr lyné te mangén Isusós te durjol léndyr, pal-dová so jone sys piristrahade. Isúso zagijá dre bárka i risijá pale.

³⁸A manúš, savéstyr vyginé nalačhé dúhi (fany), mangdiá Isusós te javél Lésa. Ne Isúso bičhadiá les i phendiá:

³⁹“Risjov pale dro péskiro kher i rosphen, so Túsa kerdiá Devél.” Adavá manúš gijá i rosphendiá pir fóro, so Isúso kerdiá Léske.

⁴⁰Kiéli Isúso risijá pale, manušá prilyné Les radymása, pal-dová so saré užakirde Les.

⁴¹I, ĥáda, javdiá manúš, savés khardé Iairo, jov sys sinagogakiro barydyró. I pyjá jov ke Isusóskire ĥerá, mangdiá Les te zadžál ke jov dro kher;

⁴²pal-dová so léste sys jekh čhaj, dešudúj berš, saví sys nasvaly ke meribén. Kiéli Isusós džálas, manušá tasadynepe ke Jov.

⁴³I sys džuvlý, saví dešudúj berš sys nasvaly thadune ratvalypnasa i, saví rozmekcia saró mištypén pe sastypnar'jende, ne ni jekh sastypnari (doktoro) na vysastiakirdiá la.

⁴⁴Joj podgíia ke Isúso palalestyr maškír manušénde i čiladiá Léskiro uribén, i adáj že ratvalypen pirijaciá.

⁴⁵Isúso phendiá: “Kon čiladiá Man?” Kiéli saré otphenenaspe, Pétri i léskire manušá phendlé: “Sykliakiribnáskiro! Manušá isyn trusciál (krugom) Túte, i jone tasavenaspe ke Tu, a Tu phučesa: ‘Kon čiladiá Man?’”

⁴⁶Ne Isúso phendiá: “Vari-kon čiladiá Man; pal-dová so Me čuindjom, syr zor gija krig Mándyr.”

⁴⁷Džuvlý ž, syr ĥalyjá, so joj na garadiape, so kerdiá, lyjá te izdral i pyjá ke Isusóskire ĥerá i rosphendiá angíl saré manušénde, sóske joj čiladiá Les i syr joj vysastija adáj že.

⁴⁸Isúso phendiá láke: “Mirí Čháie! Patiaibén tyró zrakhciá tut! Džá bahtiasa!”

⁴⁹Kiéli Isúso rakirdiá davá, javdiá bičhadó manúš sinagogakire-barydyreskire kheréstyr: “Čhaj tyrí myjá, palsó iščo (inké) te pharjakires Sykliakiribnaskires?”

⁵⁰Ne Isúso šundiá davá i phendiá Iairoske: “Na andyrša, féni patia, i joj iavely zrakhny.”

⁵¹Kiéli Jov javdiá dro kher, tedy jov na domekcia nikonés te džal Lésa apríč Petriste, Ianoste i Jakovoste, patyvalé-terné džuvliakire dadéste i date.

⁵²Saré rovenas i dénas gódla jasvénca. Ne Isúso phendiá: “Na rovén; joj na myjá, joj isyn suty.”

⁵³I jone sandlepe Léstyr, pal-dová so džindlé, so terný patyvalý džuvlý myjá.

⁵⁴Ne Isúso ž phendiá sarénge te džán javrí, lyjá ternia patyvalia džuvliá pal vast i phendiá zoralé zaniása: “Patyvalý-Terný-Džuvlíje! Uštý!”

⁵⁵Lákiro džiibnytko dúho (fáno) risijá pale dre láte; joj iekhátyr (srázu) uštyjá; Isúso priphendiá te den láke te xal.

⁵⁶Lákire dadá zdivindlepe, ne Isúso priphendiá lénge ni konéske te na rakirén pal dová, so sys.