Read Biblija - Pe Baltitko Romani čib (Romanes) 2019 Baltic Romani Bible Luka 9 Bible Online

Luka 9 - Biblija - Pe Baltitko Romani čib (Romanes) 2019 Baltic Romani Bible bible

Luka 9

¹Isúso khardiá khetané dešudujen Apostolen i dyjá lénge zoralypén i zor pe saré nalačhé dúhi i te sastiakiren manušén nasvalypnendyr,

²i bičhadiá len te phenén lav pal Devléskiro Kralipén dro Bolybnáskiro Rajo;

³i phendiá lénge: “Na len pésa nisó pe drom: ni destó, ni sakva, ni maró, ni rup i na len duj gada;

⁴i dro vari-savó kher tumé zadžanas, jačénpe odój i odothýr tumé javéna te džán péske;

⁵a kóli vari-kaj tumen na priléna, to tedy vydžán javrí, trinskiren bláta tumaré ĥerendyr, syr dophenybén pe lénde.”

⁶Sykliaibnýtka giné pir saré gavá, jone mištophenenas bahtalý zan (zvies'), vysastiakirenas usiendie (viezdie).

⁷Kiéli Irodo, savó sys xuláj pe štárto paš (tietrarho) Judéngire Kralipnastyr, šundiá pal saró, so Isúso kerdiá, jov na džindiá, so te duminel: pal-dová so jekh rakirdé, so davá sys Iáno, savó otdžidyjá muléndyr;

⁸a javír rakirdé, so davá Ilíia javdiá; a trita rakirdé, so davá sys jekh ĥaratuné prorokendyr otdžidyjá.

⁹I Irodo phendiá: “Me otčingirdjom šeró Ianoske; a kon isyn ža Adavá, pal Konéste me šunava dasavo?” I jov rodyja te dykhél Isusós.

¹⁰Apóstoly javné pale i rosphendlé Isusóske pal saró, so jone kerdé. Jov lyjá Pésa len i jone durine pe čhučó štéto, pašýl fóro, savó khardiape Vifsaida.

¹¹Kiéli manušá šundlé pal davá, jone giné pal Léste, i Isúso prilyjá len i rakirdiá lénca pal Devléskiro Kralipén dro Bolybnáskiro Rajo i vysastiakirelas kodolén, savénge sastiakiriben treindiá.

¹²Ne dyvés gijá ke bel'vél', i dešudúj sykliaibnýtka javné i phendlé Isusóske: “Otmek manušén, mek jone te džán dre pašatuné gavá i gavore te rat'kiren i te lathén te xan; pal-dová so ame sam adáj pe čhučó štéto.”

¹³Ne Isúso phendiá lénge: “Den tumé te xan lénge.” I jone phendlé: “Aménde butýr nane, syr pandž maré i duj mačhé, ci aménge te džas te kinas xabén vaš saré adalé manušénde?”

¹⁴Pal-dová so sys len pašé pandž tysjoncy manušá. Ne Isúso phendiá Péskire sykliaibnytkonénge: “Bešliakiren len riadenca pir pandždešá manušá.”

¹⁵I jone kerdé adiáke, i bešliakirde sarén.

¹⁶A Isúso ž lyjá pandž maré i duj mačhé, ĥazdyjá jakhá pe bolybén, bahtiakirdiá len, phagirdiá i dyjá sykliaibnytkonénge, sob (kaj) jone te rozden manušénge.

¹⁷I xané i saré čalyne; i jačnépe dešudúj korzíny (khudé) koterenca, dre savé jone skedyné.

¹⁸Jekhvar, kiéli Isúso sys jekhdžinó i mangdiápe Devléske, a Léskire sykliaibnýtka sys Lésa, Jov phuciá léndyr: “Pal konéste manušá ginéna Man?”

¹⁹Jone otphendlé: “Pal Ianoste Boldeipnariste, javír-pal Ilijaste; javír rakiréna, so jekh ĥaratuné prorokendyr otdžidyjá.”

²⁰Jov phuciá léndyr: “Ne tumé pal konéste Man ginéna?” Pétri otphendiá: “Pal Devléskire Xristosóste.”

²¹Ne Isúso priphendiá šylales ni konéske te na rakirén pal davá.

²²I Jov adiáke-pac' phendiá, so Manušéskire Čhavéske trej te piridživel but mén'ki, so Les na priĥaljona godephuré i rašángire barydyrá i lylvarítka, so Jov javéla zamardo, i so pal trin dyvesá Jov otdžidjola.

²³I Jov phendiá lénge sarénge: “Kóli vari-kon kaméla te džal pal Mánde, mek te na duminel butýr pal péste, mek te lel trušúl péskiro i te džal pal Mánde;

²⁴pal-dová so, kon kaméla péskiro džiibén te zrakhél, odová xasiakiréla les, i kon otdéla péskiro džiibén pal Mánde, odová zrakhéla les,

²⁵ne savó lačhipén manušéske, kóli léste javéla saró, so Jov kaméla dalé svetóstyr, a kokoró pes jov xasiakiréla, ci keréla péske čoripén?

²⁶Pal-dová so kon ladžala Mándyr i Miré lavéndyr, odoléstyr i Čhavó Manušéskiro javéla te ladžal, kiéli javéla dre Péskire-Dadéskiri jarko sláva sventoné Jangolenca,

²⁷Čačes, Me rakiráva tuménge: adáj isyn vari-savé manušá, savé na meréna, kóli jone na dykhéna Devléskiro Kralipén dro Bolybnáskiro Rajo.”

²⁸Proginé vari-savé ohtó (bidujéngiro deš) dyvesá, syr Isúso phendiá dalé lavá, i Jov lyjá Pésa Petris, Ianos i Jakovós i ĥazdyjápe pe bérga te mangélpe Devléske.

²⁹Paka Jov mangdiápe Devléske, Léskiro muj i mina parudyne, Léskiro muj jaciá te ziainel i parnjol.

³⁰I, ĥáda, duj muršá rakirdé Lésa, savé sys Mójza (Moisiejo) i Ilíia;

³¹i savé sykadyne bolybnáskire ziainybnasa; jone rakirdé Isusósa pal Léskiro meribén, pir savó Léske treindiá te prodžal dro Jerusalimo.

³²Ne Pétri i léskire malá sys pharés suté; ne kiéli jone džangadyne, tedy dykhné jone Isusós dro ziainyben i duje muršén, savé sys Lésa.

³³Kiéli adalé muršá otdžanas Isusóstyr, Pétri phendiá Isusóske: “Sykliakiribnáskiro! Syr šukár aménge te javas adái; kerása trin šátry; jekh Túke, jekh Mojzáske, jekh Ilijaske — jov na džindiá, so rakirdiá.

³⁴Paka jov iščo (inké) rakirdiá davá, sykadyjá óbloko i učhakirdiá len; i jone strahádyne, kiéli óbloko garadia Mojzás i Ilijas.

³⁵I sys šundly zan oblokostyr, saví rakirdiá: “Kadavá isyn Miro drógo Čhavó, Les šunén.”

³⁶Kiéli zan pirijaciá, Isúso jaciápe jekhdžinó. Sykliaibnýtka sys štyl i na rakirdé ni konéske dre dolé dyvesá, so jone dykhné.

³⁷Pe javír dyvés, kiéli Isúso sykliaibnytkonénca giné telé bergátyr, but manušá pirilyne Isusós.

³⁸I, gada, vari-kon manušéndyr, dyjá gódla: “Sykliakiribnariskiro! Me drieván mangáva Tut te dykhén miré čhavéste, jov isyn jekh mánde;

³⁹nálačho dúho (fáno) uhtyléla les, i jov adáj že déla gódla i dúho (fáno) menčynela les ke piena móstyr; i dúho (fáno) pe nábut otmekéla les, kiéli zmenčynela zoralés les;

⁴⁰me mangdjom Tyré sykliaibnytkonén te vytradel dúho (fáno), ne jone na mogindlé te dyn ráda.”

⁴¹Isúso otphendiá: “O, tumé san napatiaibnaskiro i pharé-manušéngiro ródo! Kicý Me javáva tuménca i kicý Me javáva te vyrikirav tumen? Jan péskire čhavés adarík!”

⁴²Kiéli terné-beršentiro džálas, nálačho dúho (fáno) radia les i lyjá te izdraliakirel les; ne Isúso priphendiá nálačho duhoske; Jov vysastiakirdiá terné-beršengires i otdyjá pale les dadéske.

⁴³I saré manušá divindlépe pe Devléskiro rajkano baripén. Kiéli saré denaspe divoske, so kerdiá Isúso, Jov phendiá Péskire sykliaibnytkonénge:

⁴⁴“Ripiren lačhés dalé lavá: ‘Čhavó Manušéskiro javéla otdynó dre manušéngire vastá.’”

⁴⁵Ne sykliaibnýtka na ĥalyné dalé lavá; léngiro smyslo sys ĥarado léndyr adiáke, so jone na džindlé, pal so Isúso rakirdiá, a te phučén Léstyr pal davá lav jone darándyne.

⁴⁶Dasavo phučiben sys pe iló sykliaibnytkonende: “Kon isyn baredýr maškír aménde?”

⁴⁷Isúso džindiá, so jone dumindle, lyjá bijatós, čhudiá les angíl Péste,

⁴⁸i phendiá lénge: “Kon priléla ke pe jekhés adasavé bijatós vaš Miro lav, odová i Man priléla, a kon priléla Man, odová priléla Odolés, Kon bičhadiá Man, kon isyn tyknedýr maškír tuménde, mek te javél jov sámo baredýr.”

⁴⁹Iáno tedy phendiá: “Sykliakiribnáskiro! Ame dykhciam manušés, savó Tyré lavésa vytradela nalačhé dúhi (fany) i ame priphendiam Léske te pirijačel, pal-dová so jov na psiréla aménca.”

⁵⁰Isúso phendiá léske: “Na priphenen léske; pal-dová so kon isyn na proti tuménde, odová isyn pal tuménde.”

⁵¹Kiéli javné pašyledýr dyvesá, dre savé Isusóske treindiá te ĥazdelpe pe bolybén dalé svetóstyr, jov zakamdiá te džal dro Jerusalimo,

⁵²i Jov bičhadiá vykedyné manušén angíl Péste; i jone giné i zaginé dro jekh Samarijakiro gav, sob (kaj) te keden vaš Léske štéto te otkhinjol,

⁵³ne manušá odój na prilyné Les, pal-dová so Jov vydykhcia, syr o manúš, savó džálas pir drom dro Jerusalimo.

⁵⁴Kiéli Léskire sykliaibnýtka Jakovo i Iáno dykhné davá, jone phendlé: “Rajo Dévla! Kóli Tu kamésa, ame phenása, sob (kaj) te javél jag bolybnástyr i te xačkirel len?”

⁵⁵Ne Isúso porisija i vyrakirdia lénge, phení: “Tumé na džinéna, savó dúho (fáno) isyn tuménde.

⁵⁶Pal-dová so Čhavó Manušéskiro javdiá te na xasiakirél manušéngiro džiibén, a te zrakhél.” I jone giné dro javír gav.

⁵⁷I sys adiáke: kiéli jone džánas dromésa, vari-kon phendiá Isusóske: “Rajo Dévla! Me džáva Túsa, karik i Tu džása.”

⁵⁸Isúso phendiá Léske: “Lokhniénde (lisendy) isyn nory, bolybnáskire čirikliende gniázdy (kúfy), a Manušéskire Čhavéske nane, kaj šeró te čhuvél.”

⁵⁹Jov phendiá javire manušéske: “Jav Mánca!” Odová ž phendiá: “Rajo Dévla! Mek man angíl te garavav Miré dadés.”

⁶⁰Ne Isúso phendiá Léske: “Mek mulé te garaven péskire mulen; a tu, jav, rosphen bahtalý zan (zvies') pal Devléskiro Kralipén dro Bolybnáskiro Rajo.”

⁶¹I iščo (inké) javír manúš phendiá: “Me džáva pal Túte, Rajo Dévla! Ne mek man angíl te roziačavpe miré semencasa.”

⁶²Ne Isúso phendiá Léske: “Nijékh, kon čhuvéla péskiro vast pe plugo (pharady) i obdykhelape pale, isyn na lačhó vaš Devléskiro Kralipén dro Bolybnáskiro Rajo.”