Read Biblija - Pe Baltitko Romani čib (Romanes) 2019 Baltic Romani Bible Javír Zakóno 11 Bible Online

Javír Zakóno 11 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 11

¹I paldavá sykáv patýv Ráske-Devléske, Devléske tyréske, i rakh, so Jov phendiá te rakhés, i uphenybená Léskire i zakóny Léskire i priphenybená Léskire dre saré dyvesá.

²I akaná priripiren, — pal-dová so me rakiráva na tumaré čhavénca, savé na džinéna i na dykhné kára Ráskire-Devléskiri, tumaré Devléskiri; Léskiri sláva, Léskiro zoraló vast i Léskiro vučó psikó,

³znamiénii (ĥiertyká) Léskire i Léskire réndy (diély), savé Jov kerdiá maškirál Jegípto faraonenca, Jegiptóskire kralísa, i saré léskire phuvjása,

⁴i so Jov kerdiá Jegiptóskire xaladybnasa, léskire grenca i léskire maribnytkoné vurdenenca, savén Jov tasadia dre Lolé-morjoskire (derjavéskire) paniá, kiéli jone tradynepe pal tuménde, — i muliakirdiá len Raj Devél až ke/žýko davá dyvés;

⁵i so Jov kerdiá vaš tuménge pe čhučí phuv, paka tumé doginé ke davá štéto,

⁶i so Jov kerdiá Dafanosa i Avironosa, Jeliavoskire čhavénca, Ruvimóskire čhavésa, kiéli phuv roskerdiá péskire uštá maškír saró Izrailjo i nakhadia (proglynindia) len, i léngire čékarja (siemieistvy), i léngire šátry, i saró barvalypén léngiro, savó sys lénde.

⁷Pal-dová so jakhá tumaré dykhné saré baré Ráskire-Devléskire réndy, savé Jov kerdiá.

⁸I paldavá rakhén saré Léskire priphenybená, savé me rakiráva tuménge adadyvés, sob (kaj) tumé te zoraljon, i te džán i te len phuv, pe saví tumé piridžana, sob (kaj) te len la;

⁹i, sob (kaj) tumé te dživén but časo pe doiá phuv, saví sovlahadiá Raj Devél tumaré dadénge te del lénge i léngire rodóske pe phuv, pe saví thadéla thud i avgín (meda).

¹⁰Pal-dová so phuv, pe saví tu džása, sob (kaj) te les la, na dasaví, syr Jegiptóskiri phuv, savjátyr vyginé tumé, tu počhudian siemjo tyró, paniakirdian la tyré ĥerengire podrikiribnasa (pomoššasa), syr maslinitko únta (sado),

¹¹ne phuv, pe saví tumé piridžana, sob (kaj) te zalen la, isyn phuv bergenca i loščynenca, i saví bolybnáskire bryšyndestyr paniakirelape,

¹²phuv, pal saví Raj Devél, Devél tyró, pekelape, jakhá Ráskire-Devléskire, Devléskire tyreskire, saró časo isyn pe láte, beršeskire anglypnástyr i ke beršeskiro kónco (ke jagóro).

¹³Kóli tumé javéna te šunén Miré priphenybená, savé Me rakiráva tuménge adadyvés, te rikirén syr Drógima dro tumaró iló Ras-Devlés, Devlés tumares, i te dynarinén Léske saré tumaré iléstyr i saré tumaré diestyr,

¹⁴to Me dáva tumaré phuvjake bryšýnd dre péskiro časo, tasiarluno/pervotuno (rannjo) i koriguno (pozdnjo); i tu skedesa tyró maró i tyrí mol (vino), i jeliejo tyró;

¹⁵i Me dáva čar pe félda tyrí vaš tyré kheritkoné murdalénge (skoto) i, tu javésa te xas i te čaljos.

¹⁶Rakhénpe, sob (kaj) te na xohavelpe iló tumaró, i tumé te na otdžan dre rig, i te na len te dynarinén javire devlorénge, i te na mangénpe lénge;

¹⁷i tedy, zahačola xolý Ráskire-Devléskiri pe tuménde, i Jov začhakirela bolybén; so na javéla bryšýnd, i phuv na janéla péskiro umaloto (urožajo), i tumé syg xasjona lačhé phuvjátyr, saví Raj Devél déla tuménge.

¹⁸I paldavá čhuvén (prilén) dalé Miré lavá dro tumaró iló i dro tumaró di, i phanden len pe ripiribén pe péskiro vast, i mek te javén jone phandypnasa maškír tumaré jakhá;

¹⁹i sykliakirén lénge péskire čhavén, rakirí pal lénde, kiéli tu san beštó dro tyró kher, i kiéli tu džása dromésa, i kiéli tu pasjosa, i kiéli uštesa;

²⁰i čhin len pe tyré-kheréskire kosiaki i pe tyré vudará,

²¹sob (kaj) adákicy but te javén tumaré dyvesá i tumaré-čhavéngire dyvesá pe doiá phuv, saví Raj Devél sovlahadiá te del tumaré dadénge, ci but dyvesá bolybén javéla pe phuv.

²²Kóli tumé javéna te rakhén saré dalé priphenybená, savé Me rakiráva tuménge te kerén saró pir lénde, i tumé javéna te rikirén syr Drógima dro péskiro iló Ras-Devlés, Devlés tumares, te psirén saré Léskire droménca i te pričhuvenpe ke Jov,

²³to tedy vytradela Raj Devél saré adalé manušén tumaré móstyr, i tumé léna lofo (vlast') pe manušénde, savé isyn butýr i zoraledýr tuméndyr;

²⁴kažno štéto, pe savó terdjola tumarí ĥerój, javéla tumaró; čhučé phuvjátyr i Livanostyr, rekátyr (leniátyr) Jefratostyr, adiáke-pac' ke západno (pal-panitko) mórjo (derjáv) javéna štéty tumaré.

²⁵Nikón na vyterdjola proti tuménde: Raj Devél, Devél tumaró, janéla dar angíl tuménde pe kažno phuv, pe saví tumé terdjona, syr Jov rakirdiá tuménge.

²⁶Ake, me vyphenava tuménge adadyvés bahtiakiribén i prokošybén:

²⁷bahtiakiribén, kóli tumé šunéna priphenybená Ráskire-Devléskire, tumaré Devléskire, savé me rakiráva tuménge adadyvés,

²⁸a prokošybén, kóli tumé na javéna te šunén priphenybená Ráskire-Devléskire, tumaré Devléskire i džána dre rig droméstyr, pal savó rakiráva tuménge adadyvés, i džána palál pal javire devlorende, savén tumé na džinéna.

²⁹Kiéli janéla tut Raj Devél, Devél tyró, pe doiá phuv, pe saví tu džása, sob (kaj) te les lofo pe láte, tedy phenén bahtiakiribén pe bérga Garizimo, a prokošybén (arman) pe bérga Gievalo.

³⁰Ĥáda, jone isyn pal Iordáno, pir drom ke khameskiro zagiibén, pe phuv Xananiejengiri, savé dživéna pe loščýna (ravnina), proti Galgálo, nádur dembitkone vešorestyr Morie.

³¹Pal-dová so tumé piridžana Iordáno, sob (kaj) te džán te les phuv, saví Raj Devél, tumaró Devél, déla tuménge i tumé léna la, i javéna te dživén pe láte.

³²I paldavá kerén saró pir saré uphenybená i Léskire zakóny, savé Me vyphenava tuménge adadyvés.