Read Biblija - Pe Baltitko Romani čib (Romanes) 2019 Baltic Romani Bible Javír Zakóno 12 Bible Online

Javír Zakóno 12 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 12

¹Ake, isyn uphenybená i zakóny, savé tuménge trej te pričhuvén zor te kerén ke kónco/iagóro (te spolninen pe phuv), saví Raj Devél tyré-dadéngiro Devél déla túke dro xulaiben, pe saré dyvesá, savé tumé javéna te dživén pe doiá phuv.

²Rozmaren sarésa (pe koterá) saré štéty, kaj isyn manušýtka nácyi (narody), pe savénde tumé léna lofo (vlast'), i savé dynarindlé péskire devlorénge, pe vučé bérgi, i pe bérgicy, i tel kažno kašt (drévo) randienca;

³i rosphagiren léngire altári, i phagiren léngire stýlby, i xačkirén jagása léngire veladinia (roščy), i rozmaren léngire-devlorengire istukany, i protraden léngiro lav dolé štetóstyr.

⁴Tuménge naštý te kerén dová vaš Ráske-Devléske, Devléske tumareske.

⁵Ne pe štéto, savó vykedéla Raj Devél, Devél tumaró, saré tumaré rodycendyr, sob (kaj) te javél Léskiro Lav odój, rodén Les odój i javén odorík,

⁶i odorík janén tumaré céla shačkiribena, i tumaré svénta dyibená Ráske-Devléske, i tumaré dešengirja (diesiatiny), i tumaré vastengiro ĥazdypen, i tumaré sovela, i tumaró janybén pir péskiro iló, i anglatunen (pervoné bijandlen) tumaré baré i tykné tumaré kheritkoné murdaléndyr (skotóstyr);

⁷i tumé xan odój angíl Raste-Devléste, Devléste tumareste, i radynénpe tumé i čékarja (siemieistvy) tumaré, pal saró, so kerdé tumaré vastá, sósa bahtiakirdiá tumen Raj Devél, Devél tyró.

⁸Odój tuménge naštý te kerén saró, syr adáj ame akaná kerása, kažno, pir péskiri godý, so léske zdelape čačipnása;

⁹pal-dová so tumé akaná iščo (inké) na zaginé pe štéto te otkhinjon i pe phuv dre mištypnáskiri miéra te prilén, saví Raj Devél, Devél tyró, déla túke.

¹⁰Ne kiéli tumé piridžana Iordáno i léna te dživén pe phuv, saví Raj Devél, Devél tumaró, déla tuménge dre mištypnáskiri miéra te prilén, i kiéli Jov štyliakirela tumen saré tumaré vergéndyr, savé javéna pašýl tuménde, i tumé javéna te dživén bi trašakiro (bi darákiro),

¹¹to tedy, savó štéto vykedéla Raj Devél, Devél tumaró, sob (kaj) te javél lav Léskiro odój, odorík janén saró, so me phenáva tuménge: tumaré céla shačkiribena i tumaré svénta dyibená Ráske-Devléske, tumaré dešengirja (diesiatiny) i tumaré vastengiro ĥazdypen, i saró, so isyn vykedymo fedýr pir tumaré sovela, pal so tumé dyné lav Ráske-Devléske;

¹²i radynénpe angíl Raste-Devléste, Devléste tumareste, tumé i tumaré čhavé, i tumaré čhaja, i tumaré pishárja, i tumaré pisharicy, i Lievito, savó isyn maškirál tumaré kherá, pal-dová so nane léske paš i mištypnáskiri miéra tuménca.

¹³Rakhpe te janes tyró célo shačkiribén pe kažno štéto, savó tu dykhésa;

¹⁴ne pe jekh pe dová štéto, savó vykedéla Raj Devél dre jekh tyré rodycóstyr, jan tyró célo shačkiribén, i ker saró, so Me rakiráva túke.

¹⁵Ne kóli zakaméla di tyró, túke saštý (možna) te začhines i te xas, pir Ráskire-Devléskiro, tyré Devléskiro bahtiakiribén, mas, savó Jov dyjá túke, dre saré tyré kherá: nažužo i žužó saštý (možna) te xan davá, syr sierna i syr olienjos;

¹⁶iekh rat na xan: pe phuv vyčhuven les, syr paní.

¹⁷Naštý túke te xas dre tyré kherá dešengirja tyré marestyr, i mol (vino) tyrí i jeliejo tyró, i tyré baré murdalengiren (skotoskire) anglatunen i tyré tykné murdalengiren, i saréstyr, pe so isyn tyré sovela, savé tu sovlahadian i janybén pir péskiro iló, i tyré vastengire ĥazdypnastyr;

¹⁸ne xa davá angíl Raste-Devléste, tyré Devléste, pe dová štéto, savó vykedéla Raj Devél, tyró Devél, — tu i tyró čhavó, i tyrí čhaj, i tyró pishári, i tyrí pisharica, i Lievito, i manúš, savó javdiá te dživél dre tyré kherá, i rádynpe angíl Raste-Devléste, tyré Devléste, pal saró, so kerdé tyré vastá.

¹⁹Dykh, na jačkir Lievitos dre saré dyvesá, savé javésa te dživés pe tyrí phuv.

²⁰Kiéli Raj Devél, Devél tyró, rozbuĥliakirela tyré miéžy, syr Jov rakirdiá túke, i tu phenésa: “Hava me mas”, pal-dová so di tyró zakaméla te xal mas, — to tedy, pir tyré-dieskiri rádyma, xa mas.

²¹Kóli dur javéla tútyr dová štéto, savó vykedéla Raj Devél, tyró Devél, sob (kaj) te javél Léskiro lav odój, tedy začhin baré i tykné tyré kheritkoné murdaléndyr, savó dyjá túke Raj Devél, syr me priphendjom túke, i xa dre tyré kherá, pir tyré-dieskiri rádyma;

²²ne xa len adiáke, syr xána sierna i olienjos; adiáke nažužo, syr i žužó saštý (možna) te xan.

²³iekh šylales dykh, sob (kaj) te na xas rat, pal-dová so rat isyn di, i džiibén isyn dro rat, na xa di khetané masesa.

²⁴Na xa les; vyčhuv les pe phuv, syr paní.

²⁵Na xa les, sob (kaj) šukár te javél túke i tyré čhavénge paló (poslie) túte, kóli tu javésa te kerés čačipén angíl Ráskire-Devléskire jakhá.

²⁶Jekh sventymi tyré, savé isyn túte, i tyré sovela jan, i jav pe dová štéto, savó vykedéla Raj Devél.

²⁷I jan célo shačkiribén tyró, mas i rat, pe Ráskire-Devléskiro, tyró Devléskiro altárjo; ne rat javire tyré sventoné janybnastyr Ráske-Devléske trej, sob (kaj) te javél pročhudo pašýl Ráskire-Devléskiro, tyré Devléskiro altárjo, a mas xa.

²⁸Šun i ker saró pir saré dalé lavá, savé me priphenava túke, sob (kaj) šukár te javél túke i tyré čhavénge paló (poslie) túte dro viéko, kóli javésa te kerés, so isyn lačhó i čačunó angíl Ráskire-Devléskire, tyré Devléskire jakhá.

²⁹Kiéli Raj Devél, Devél tyró tradéla krig manušén tyré móstyr, ke savé tu džása, sob (kaj) te les lofo péske pe lénde, i tu, lyi len, lésa te dživés pe léngiri phuv;

³⁰to rakhpe, sob (kaj) tu te na poperes dre felý (sietka), adiáke-pac' syr jone, kiéli tu tradesa krig len tyré móstyr, i, sob (kaj) tu na rodyjan léngire devloré, rakirí: “Syr dynarindlé dalé manušýtka nácyi péskire devlorénge, adiáke javáva i me te keráv.”

³¹Na ker adiáke Ráske-Devléske, Devléske tyréske dová, pal-dová so saró, sóstyr ginéla syr džungalypén (gidinelape) Raj Devél, so na kaméla Jov, dová jone keréna devlorénge peskirenge: jone i péskire čhavén, i péskire čhajén xačkirena pe jag devlorénge peskirenge.

³²Saró, so me rakiráva tuménge, pričhuvén zor te kerén; tu na pričhúv ke dová i na otle doléstyr.