Read Biblija - Pe Baltitko Romani čib (Romanes) 2019 Baltic Romani Bible Javír Zakóno 14 Bible Online

Javír Zakóno 14 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 14

¹Tumé san Ráskire-Devléskire, tumaré Devléskire čhavé; na kerén čhinybena pe tumaré masá, i na občhinen pe čikat balá maškír tumaré jakhá, pal mulénde;

²pal-dová so tumé san svénta manušá Raste-Devléste, Devléste tumareste, i tumen vykedyjá Raj Devél, sob (kaj) tumé te javén jekh Léskire manušá saré manušéndyr, savé isyn pe phuv.

³Na xa nisavó magiripén.

⁴Ake, isyn kherítka murdalá/skoto [žyvotna-ju.o.], savén tuménge saštý (možna) te xan: guruva, bakré, buznia,

⁵olienjo i sierna, i guruv, i lan' (mirga), i zubro, i orikso (bergitko buzno), i kamielopardo (bergitko bakro).

⁶Kažno kherítko murdál (skoto), savéste pe kopyto isyn duj kokalki i pe kažna duj kopyty isyn xor rosčhinyben, i savó kherítko murdál žuinela žvačka, dolen xan;

⁷iekhe dolen na xan, savé žuinena žvačka i savénde duj kopyty isyn xor rosčhinybnasa: vierbliudos, šušujos i tuškančykos, pal-dová so usajékh so jone žuinena žvačka, pe kopyto lénde nane duj kokalki: nažužé jone isyn vaš tuménge;

⁸i balyčen, pal-dová so mek kopyty lénde isyn rosčhinybnasa, ne jone na žuinena žvačka: nažužé jone isyn vaš tuménge; na xan léngiro mas, i pal léngire trúpy na lenpe.

⁹I sarén murdalén, savé isyn dro paní, xan sarén, savénde isyn pora i češuia;

¹⁰a sarén dolen, savénde nane pora i češui, na xan: nažužo davá isyn vaš tuménge.

¹¹Han kažnona žuža čirikliá;

¹²ne kadalen léndyr naštý tuménge te xan: orlós (kidós), grifos i morjoskire (derjavéskire) orlós,

¹³i koršunos, i sokolos, i kriečetos léskire rodosa,

¹⁴i kažnoné korakos (voronos) léskire rodosa,

¹⁵i strausos, i sova, i čajka, i kaĥnialos (jastriebos) léskire rodosa,

¹⁶i filinos, i ibisos, i liebiedjos,

¹⁷i pielikanos, i sipos, i rybolovos,

¹⁸i caplia, i zujos léskire rodosa, i udodos, i nietopyrjos (vurniaibnytkone karmusos).

¹⁹Saré murdalá, savé vurniana, isyn nažužé isyn vaš tuménge, na xan len.

²⁰Han kažnona žuža čirikliá.

²¹Na xan ni savó muló mas; manušéske javire rigátyr, savó javéla dro tyró kher, otdé léske, jov mek te xal les, ci bikin léske, pal-dová so tumé san manušá svénta Raste-Devléste, tyré Devléste. Na keráv buznores dro thud léskire dakiresa.

²²Otle dešengiri (déšto paš) saré tyré pribaripnastyr dre siemi (ziárki), savé javéna tyré feldatyr kažno berš,

²³i xa angíl Raste-Devléste, tyré Devléste, pe dová štéto, savó Jov vykedéla, sob (kaj) te javél lav Léskiro odój, dešengiri (déšto paš) tyré marestyr, tyré moliátyr (vinostyr) i tyré jeliejostyr, i tyré baré murdaléndyr anglatunen (pervonen) i tyré tykné murdaléndyr, sob (kaj) tu te vysykljos te dares Rástyr-Devléstyr, tyré Devléstyr, pe saré dyvesá.

²⁴Kóli dlengo javéla vaš túke drom adiáke, so tu na désa ráda te lydžas saró, pal-dová so dur tútyr dová štéto, savó vykedéla Raj Devél tyró, sob (kaj) te čhuvél odój lav Péskiro, i Raj Devél, Devél tyró, bahtiakirdiá tut,

²⁵tedy paruv davá pe rup, i le rup dro tyró vast, i jav pe štéto, savó vykedéla Raj Devél, Devél tyró;

²⁶i kin pe davá rup saró, so zakaméla tyró di: guruvén, bakrén, mol, sikiera i saró, so zakaméla tútyr tyró di; i xa odój angíl Raste-Devléste, Devléste tyreste, i rádynpe tu, i tyrí čékar' (siemieistvo).

²⁷I Lievitos, savó isyn dre tyré kherá, na jačkir, pal-dová so nane léske paš i mištypnáskiri miéra túsa.

²⁸Syr prodžána trin berš, otle saré dešengirja tyré pribaripnastyr dro dová berš, i čhuv davá dre tyré kherá;

²⁹i mek javéla Lievito, pal-dová so nane léske paš i mištypnáskiri miéra túsa, i manúš, savó javdiá ke tu, i piroto (sirota), i pivly (udova), savé dživéna dre tyré kherá, i mek te xan i te čaljon, sob (kaj) te bahtiakirél tut Raj Devél, Devél tyró, dro kažno tyré-vastengiri butý, saví tu javésa te kerés.