Read Biblija - Pe Baltitko Romani čib (Romanes) 2019 Baltic Romani Bible Javír Zakóno 15 Bible Online

Javír Zakóno 15 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 15

¹Pe eftáto (bitrinéngiro déšto) berš zmek (darin) vužlypén (dlugo).

²Te zmekes vužlypén isyn dre dová, sob (kaj) kažno (sváko) manúš, savó déla dro dlugo péskire pašatuneske, te zmekel (te darinel) vužlypén i te na phučelpe péskire pašatunestyr ci péskire pšalestyr, pal-dová so dynó te zmekel vužlypén vaš Ráske-Devléske;

³manušéstyr javire rigátyr phučpe, a so javéla tyré pšaléste tyreste, zmek léske.

⁴Ne nijékh te na javél túte bógo: pal-dová so bahtiakiréla tut Raj Devél pe doiá phuv, saví Raj Devél, Devél tyró, déla túke dre mištypnáskiri miéra, so tu lyjan la syr meknó mištypén,

⁵kóli tu javésa te šunés Ráskire-Devléskiri, tyré-Devléskiri zan, i te pričhuves zor te spolnines saré dalé priphenybená, savé me adadyvés rakiráva túke;

⁶pal-dová so Raj Devél, tyró Devél, bahtiakiréla tut, syr Jov rakirdiá túke, i tu javésa te des dro vužlypén butenge manušénge, a tu kokoró na javésa te les dro dlugo; i xuláj tu javésa pe buté manušénde, a jone pe túte na javéna xulaja.

⁷Kóli javéla túte čororó vari-kon tyré pšaléndyr, pe tyrí phuv, saví Raj Devél, Devél tyró, déla túke, tedy na xoliakir tyró iló i na [na garav-ju.o.] tasav tyró vast angíl tyré čororé pšaléste,

⁸ne otčhakir léske tyró vast i de léske dro vužlypén, dykhí pir léskiri trébima, so léske na uhtyléla (nádosi);

⁹rakhpe, sob (kaj) te na zadžál dre tyró iló nalačhi duma: “Javéla (poddžála syg) eftáto berš, berš te zmekav vužlypén”, i, sob (kaj) doléstyr tyrí jakh te na kerélpe xoliami ke čororó tyró pšal, i tu te na otphenes léske; pal-dová so jov javéla te del gódla túte ke Raj Devél, i javéla pe túte grého;

¹⁰de léske dro vužlypén, i, kiéli javésa te des léske, naštý, sob (kaj) te tanginél (te žalinel) tyró iló, pal-dová so pal dová bahtiakiréla tut Raj Devél, tyró Devél, dre saré réndy tyré i dro saró, so javéna te kerén tyré vastá;

¹¹pal-dová so čororé ŭsády (sak) javéna maškír tyrí phuv, paldavá me i rakiráva túke: “Otčhakir vast tyró tyré pšaléske, čororeske tyréske i bogoske tyréske pe tyrí phuv.”

¹²Kóli biknelape túke tyró pšal, Judos, ci Judyca, tedy šov berš bangó isyn jov te javél syr dynári túke, a pe eftáto berš otmek les péstyr pe vólia;

¹³kiéli javésa te otmekes les péstyr pe vólia, na mek les čhučé (pustone) vasténca,

¹⁴ne de léske tyré stadatyr, tyré gumnostyr i tyré priesostyr: de léske, sósa bahtiakirdiá tut Raj Devél, Devél tyró:

¹⁵rípir, so i tu sánas pisharisa pe Jegiptóskiri phuv, i zrakhciá tut Raj Devél, tyró Devél, paldavá me adadyvés i rakiráva davá túke.

¹⁶Kóli jov phenéla túke: “Na džáva me tútyr, paldavá so tu mánge san drógo i tyró kher”, pal-dová so mištó isyn léske túte,

¹⁷tedy le jar' (šylo), i prophusav léskiro kan ke vudár; i javéla jov tyró pishári pe viéko. Adiáke ker i tyré dynaricasa.

¹⁸Na gin davá vaš péske pharipnasa, so tu san bangó (musinesa) te otmekes les péstyr pe vólia, pal-dová so jov pal šov berš zakerdia túke dre duj móly butýr syr pleskiriben butiarneske, savó túte sys nalyno; i bahtiakiréla tut Raj Devél, Devél tyró, dre saró, so tu javésa te kerés.

¹⁹Saró anglatunó bijanypnaskiro muršytko, so bijandjola baré tyré baré murdaléndyr i tykné kheritkoné tyré murdaléndyr, otdé Ráske-Devléske, Devléske tyréske: na ker butý pe anglatuné (pervoné) bijanypnaskire guruveste tyreste, i na občhin anglatuné bijanypnaskires tyré tykné kheritkoné murdaléndyr;

²⁰kažno berš xa davá, tu i tyrí čékar' (siemieistvo) angíl Raste-Devléste, Devléste tyreste, pe štéto, savó vykedéla Raj Devél.

²¹Kóli javéla pe léste doš, langalo, ci kororó, ci javír vari-saví doš, tedy na lýdža les dre svénto janybén Ráske-Devléske, tyréske Devléske,

²²ne túke saštý (možna) te xas davá dro kher tyró, žužó i nažužo saštý te xal les, syr sierna (mirga), adiáke-pac' i olienjos.

²³iekh léskiro rat na xa; vyčhuv les pe phuv, syr paní.