Read Biblija - Pe Baltitko Romani čib (Romanes) 2019 Baltic Romani Bible Javír Zakóno 16 Bible Online

Javír Zakóno 16 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 16

¹Dykh patyvása pe čhon Avivo, i svenkin Patradí Ráskire-Devléskiri, Devléskiri tyreskiri, pal-dová so dro čhon Avivo vylydžijá tut Raj Devél, tyró Devél ratý Jegiptóstyr.

²I začhin Patradí (patraditkone bakrores) Ráske-Devléske, Devléske tyréske, tykné i baré kheritkoné murdalestyr pe štéto, savó vykedéla Raj Devél, sob (kaj) te javél odój lav Léskiro.

³Na xa lása šutlo (kvasno); eftá (bitrinéngiro deš) dyvesá xa lása opriesnoki, davá isyn maró bidakiro, pal-dová so tu sygnypnasa vygijan Jegiptóskire phuvjátyr, sob (kaj) tu te ripires péskiro vygiibnaskiro dyvés Jegiptóskire phuvjátyr dre saré tyré džiibnáskire dyvesá.

⁴Naštý, sob (kaj) te javél túte nisó šutlo dre sarí tyrí mištypnáskiri miéra dre saré eftá dyvesá, i mas, savó tu jandian dre svénto dyibén Ráske-Devléske bel'velié dro pérvo dyvés, nisó naštý te jačélpe ke ránko (ke zlóko).

⁵Naštý, sob (kaj) tu te začhines Patradí dro kher, savó Raj Devél, Devél tyró, déla túke;

⁶ne pe jekh dová štéto, savó vykedéla Raj Devél, Devél tyró, sob (kaj) te javél odój lav Léskiro, začhin Patradí bel'velié, angíl khameskiro zagiibén, dre dová-pac' časo (cýro), dro savó tu vygijan Jegiptóstyr;

⁷i pek i xa pe dová štéto, savó vykedéla Raj Devél, Devél tyró, a pe javír dyvés tu saštý (moginésa) te risjos i te zadžas dre tyré šátry.

⁸Šov dyvesá xa priesna maré, a pe eftáto dyvés svénto skedyibén Ráske-Devléske, tyré Devléske; na zalepe butiasa.

⁹Eftangirja (siedmicy) otgin péske; le te gines eftá eftangirja dolé dyveséndyr, syr javéla sierpo (čhindló) te ukedel;

¹⁰tedy svenkin svénko eftangir'jengiro Ráske-Devléske, Devléske tyréske, pir zor tyré vasteskiro, ci but tu désa, dykhí pir dová, sósa bahtiakiréla tut Raj Devél, Devél tyró;

¹¹i rádynpe angíl Raste-Devléste, Devléste tyreste, tu, i tyró čhavó, i tyrí čhaj, i tyró pishári, i tyrí pisharica, i Lievito, savó isyn dro tyró kher, i manúš, savó javdiá, i piroto (sirota), i pivly (udova), savé isyn maškír túte, pe štéto, savó vykedéla Raj Devél, Devél tyró, sob (kaj) te javél odój lav Léskiro;

¹²rípir, so i tu sánas pishári dro Jegípto, i rakh, i ker saró pir dalé uphenybená.

¹³Svénko kuščengiro ker péste eftá dyvesá, kiéli ukedesa saró tyré šurnatyr (gumnostyr), i tyré priesostyr;

¹⁴i rádynpe pe svénko tyró tu, i tyró čhavó, i tyrí čhaj, i dynári tyró, i dynárica tyrí, i Lievito, i manúš, savó javdiá, i piroto (sirota), i pivly (udova), savé isyn dre tyré kherá;

¹⁵eftá (bitrinéngiro deš) dyvesá svenkin Ráske-Devléske, Devléske tyréske, pe štéto, savó vykedéla Raj Devél, tyró Devél; pal-dová so bahtiakiréla tut Raj Devél, Devél tyró, dre saré tyré butiá, i dro kažno tyré-vastengiro réndo, i tu javésa jekh so te radynespe.

¹⁶Trin móly dro berš saré muršá isyn bangé te javén angíl Ráskire-Devléskiro, tyré Devléskiro muj, pe štéto, savó vykedéla Jov: pe svénko opriesnokengiro, pe svénko eftangir'jengiro i pe svénko kuščengiro; i nikonéske naštý, sob (kaj) te javél angíl muj Ráskire-Devléskiro čhučé vasténca,

¹⁷ne kažno (sváko) te javél dro péskiro vast darosa, dykhí pir Ráskire-Devléskiro, tyré-Devléskiro bahtiakiribén, savó Jov dyjá túke.

¹⁸Dre saré tyré kherá, savé Raj Devél, Devél tyró, déla túke, čhuv péske sendar'jen i rakhibnar'jen pir tyré ródycy, sob (kaj) jone te sendiakiren manušén čačuné sendosa;

¹⁹na pirikrencyn Zakóno, na dykh pe muiá, i na le počastunko (dáro), pal-dová so počastunko korjakirela god'varengire jakhá i pirikrencynela čačunengiro lavá;

²⁰čačipén, róde čačipén, sob (kaj) tu te javes džidó, i te javél túte phuv, saví Raj Devél, Devél tyró, déla túke.

²¹Na počhuv dre phuv vešore vari-savé kaštendyr (drevendyr) pašýl svénto janybnaskiro štéto tyré Ráske-Devléske, savó tu kerésa péske,

²²i na čhuv péske svénto stýlbo [veladín/rošča-r.s.], so drieván xoliakirela Ras-Devlés, Devlés tyrés.