Read Biblija - Pe Baltitko Romani čib (Romanes) 2019 Baltic Romani Bible Javír Zakóno 17 Bible Online

Javír Zakóno 17 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 17

¹Na jan dre svénto dyibén Ráske-Devléske, Devléske tyréske, guruvés, ci bakrés, pe savénde javéla doš, ci vari-savó fuipén, pal-dová so davá isyn magiripén vaš Ráske-Devléske, Devléske tyreste.

²Kóli lathelape vari-kon maškír túte dre vari-savó tyré kherendyr, savé Raj Devél, Devél tyró, déla túke, murš ci džuvlý, kon keréla čoripén angíl Ráskire-Devléskire, tyré Devléskire jakhá, i phagiréla Léskiro zavieto,

³i džála, i léla te dynarinél javire devlorénge, i léla te mangélpe lénge, ci khameske, ci čhoneske, ci saré-bolybnáskire čergeniake, so me priphendjom te na kerés,

⁴i túke phendló javéla, i tu šunesa, to tedy tu šukár rozrode, i, kóli davá isyn čačipén, kóli kerdó davá magiripén dro Izrailjo,

⁵to vylydža odolés muršés, ci odolja džuvliá, savé kerdé davá fuipén, ke tyré vudará (pórty) i mar len barénca ke meribén.

⁶Pir duje-jakhitkonengire (svidietieliengiro) lavá, ci triné-jakhitkonengire, bangó isyn te merél manúš, savó isyn sendindlo pe meribén. Ne naštý te otdes les meribnáske pir lavá jekhe jakhitkoneskire (svidietieljoskiro).

⁷O jakhitkonengiro vast isyn bangó pérvo te javél pe léste te čhurdel bar angledýr saréndyr, sob (kaj) te domaren les, pal lénde vast saré-manušéngiro; i adiáke trade krig fuipén maškír péste.

⁸Kóli pir savó réndo (diélo) vaš túke javéla pharó te rossendiakires maškír rat i rat, maškír séndo i séndo, maškír maribén i maribén, i javéna manušá, savé na javéna dre jekh godý dre tyrí pórta, to tedy uštý i džá pe štéto, savó vykedéla Raj Devél, Devél tyró,

⁹i jav ke rašaja, Lievíty, i ke sendári, savó javéla dre dolé dyvesá, i phučpe léndyr, i jone phenéna túke, syr te rossendiakires;

¹⁰i ker pir lav, savó jone phenéna túke, pe dová štéto, savó vykedéla Raj Devél, i pričhúv zor te kerés saró, so jone sykliakiréna tut;

¹¹pir Zakóno, savéske sykliakiréna jone tut, i pir sendoskiro prirakiriben, savó jone phenéna túke, ker, i na otdža ni pe čačó (pravo), ni pe zérvo (liévo) doléstyr, so jone phenéna túke.

¹²A kon keréla adiáke xoliamé muršypnasa, so na kandéla rašás, savó javéla terdó odój pe mangipén angíl Raste-Devléste, Devléste tyreste, ci sendariste, odová manúš isyn bangó te merél, i adiáke trade krig xolý Izrailjostyr;

¹³i saré manušá javéna te šunén, i strahadjona, i na javéna butýr te kerén xoliamé muršypnasa.

¹⁴Kiéli tu javésa pe phuv, saví Raj Devél, Devél tyró, déla túke i tu javésa te xulaines lása, i tu lésa te dživés pe láte, i phenésa: “Čhuváva me pe péste kralís, syr javire manušénde, savé isyn pašýl mánde”,

¹⁵to tedy čhuv pe péste kralís, savés vykedéla Raj Devél, Devél tyró; tyré pšaléndyr čhuv pe péste kralís; naštý, sob (kaj) te čhuvés pe péste kralísa manušés javire rigátyr, savó isyn na pšal túke.

¹⁶Jekh, sob (kaj) jov te na ubarjakirel (te na rozlydžal) péske but gren, i te na riskirél manušén dro Jegípto vaš dová, sob (kaj) te ubarjakirel péske butýr gren, pal-dová so Raj Devél phendiá tuménge: “Na risjon butýr dalé dromésa”;

¹⁷i sob (kaj) jov te na skedel péske but romnien, sob (kaj) te na rozmekelpe léskiro iló, i, sob (kaj) rup i suvnakáj jov te na skedel drieván but péske.

¹⁸Ne kiéli jov bešéla pe péskire-kralipnaskiro priestolo, isyn bangó te sčhuvel vaš péske spisko dalé Zakonóskire lylvarjatyr, saví isyn Lieviténgire rašande,

¹⁹i mek davá spisko te javél léste, i mek jov te ginel les dre saré péskire džiibnáskire dyvesá, sob (kaj) te vysykljol te darel Rástyr-Devléstyr, péskire Devléstyr, i te pričhuvel zor te spolninel saré dalé Zakonóskire lavá i dalé uphenybená;

²⁰sob (kaj) te na phutjol léskiro iló angíl léskire pšalénde, i sob (kaj) jov te na otdžal Zakonóstyr ni pe čačó (pravo), ni pe zérvo (liévo), sob (kaj) jov te javél dluga dyvesá jov pe péskiro kralipén i te javén čhavé léskire maškír Izrailjo.