Read Biblija - Pe Baltitko Romani čib (Romanes) 2019 Baltic Romani Bible Javír Zakóno 18 Bible Online

Javír Zakóno 18 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 18

¹Lieviténgire rašange, saré Lievijoskire rodycóske, na javéla paš i mištypnáskiri miéra Izrailjosa: jone isyn bangé te čaliakirenpe sventoné janybnastyr Ráske-Devléske i Léskire pašésa;

²i mištypnáskiri miéra na javéla lénge maškír léskire pšalénde: Kokoró Raj Devél isyn léngiri mištypnáskiri miéra, syr rakirdiá Jov lénge.

³I, ake, so trej te javél čhudo rašange manušéndyr, savé janéna dre svénto dyibén Ráske-Devléske guruvén ci bakrén: jone isyn bangé te otdén rašáske psikó, žandy (paščonki) i kužum (želudko);

⁴adiáke-pac' i pérva barjakirdé (načatki) marestyr tyrestyr, moliátyr (vinostyr) tyrjatyr i jeliejostyr tyrestyr, i pérva balytka tyré bakréngire vylnátyr otdé léske, Lievitoske,

⁵pal-dová so les vykedyjá Raj Devél, Devél tyró, saré rodycóstyr tyrestyr, sob (kaj) jov te terdjol angíl Raste-Devléste, Devléste tyreste, te dynarinél Ráskire-Devléskire lavésa, kokoró i léskire čhavé dre saré dyvesá.

⁶I kóli Lievito javéla jekhe tyré štetóstyr, saré Izrailjoskire-čhavéngire phuvjátyr, jov dživdiá, i javéla pir péskire-dieskiro vykedyiben pe štéto, savó vykedéla Raj Devél,

⁷i jov javéla te dynarinél lavésa vaš Ráske-Devléske, péskire Devleskireske, syr i saré léskire pšála, Lievíty, savé isyn terdé odój angíl Raste Devléste,

⁸to tedy mek jone te len kadasavé pašá syr javír Lievíty, apríč dová, so jone doresné dadéskire barvalypnastyr, syr jone bikindle les.

⁹Kiéli tu zadžasa pe phuv, saví déla túke Raj Devél, Devél tyró, tedy na sykljov te kerés magiripén, savé kerdé odolé manušá:

¹⁰naštý, sob (kaj) te javél túte manúš, savó prolydžala péskire čhavés, ci peskirjá čha pirdál jag, zumakiribnaskiro, drabakiribnari, čovahano,

¹¹kalé-magitko (obajatieljo), kon vykharela dúhi, znaharjo, mulengiro čovahano;

¹²pal-dová so magirdó te javél angíl Raste-Devléste kažno (sváko), kon keréla davá, i pal dalé magiripena Raj Devél, Devél tyró, tradéla krig len tyré móstyr;

¹³iav bidošakiro angíl Raste-Devléste, Devléste tyreste;

¹⁴pal-dová so adalé manušá, savén tu tradesa krig, šunéna drabakiribnar'jen pir bolybén (čergeniá), zumakiribnaskiren, a túke na dová dyjá Raj Devél, Devél tyró.

¹⁵Prorokós maškír túte, tyré pšaléndyr, syr man, déla túke Raj-Devél, Devél tyró, Les šunén, —

¹⁶adiáke syr tu mangdian Rástyr-Devléstyr, tyré Devléstyr, pašýl Xorivo pe skedyibnaskiro dyvés, rakirí: “Me butýr na šunava Ráskire-Devléskire, miré Devléskiri zan (glos), i daja bari jag me butýr na dykháv, sob (kaj) mánge te na merav.”

¹⁷I phendiá mánge Raj Devél: “Mištó dová, so jone rakirdé.

¹⁸Me dáva lénge Prorokós léngire pšaléndyr, adasaves syr tu, i čhuváva lavá Miré dre Léskire uštá, i Jov javéla te rakirél lénge saró, so Me phenáva Léske;

¹⁹a kon na javéla te šunél Miré lavá, savé odová proróko javéla te rakirél Miré lavésa, odová otphenéla Mánge.

²⁰Ne, prorokós, savó javéla murškanó te rakirél Miré lavésa dová, so Me na phendjom léske te rakirél, i savó javéla te rakirél javire-devlorengire lavésa, adasaves prorokós otdén meribnáske.”

²¹I kóli phenésa dro iló tyró: “Syr ame udžinasa lav, savó na Raj Devél rakirdiá?”

²²Kóli proróko phenéla Ráskire-Devléskire lavésa, ne lav dová na javéla dro čačipén, i na kerélape, tedy na Raj Devél rakirdiá davá lav, ne rakirdiá davá proróko pir péskiri nahratyma, na dar léstyr.