Read Biblija - Pe Baltitko Romani čib (Romanes) 2019 Baltic Romani Bible Javír Zakóno 21 Bible Online

Javír Zakóno 21 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 21

¹Kóli pe phuv, saví Raj Devél, tyró Devél, déla túke, javéla lathno zamardo (umardo) manúš, savó javéla paštó pe félda, i isyn na džindló, kon zamardiá (umardia) les,

²tedy mek te vydžán phurydyrá tyré i sendárja tyré, i vymierinena štéto for'jéndyr, savé isyn pašýl zamardeste;

³i phurydyrá dolé foróskire, savó javéla pašyledýr ke zamardo, mek te len reca (ternia gurumnia), pe savjate na kerdé butý, i saví na lydžijá gamo,

⁴i mek dolé-foróskire phurydyrá te lydžán dalia reca dre buso (diko) loščýna, saví na sys rospašyndly i na zasieindly, i začhinena odój reca dre loščýna;

⁵i javéna rašaja, Lievijoskire čhavé;

⁶i saré dolé-foróskire phurydyrá, savé sys pašyledýr ke zamardo, mek te obmoren péskire vastá pe recakiro (terné-gurumniakiro) šeró, saví sys začhindly dre loščýna,

⁷i déna te džinén i phenéna: “Vastá amaré na pročhude davá rat, i jakhá amaré na dykhné;

⁸vyžužakir (vyčystin) Tyré manušén, Izrailjoskiren, savén Tu, Rajo Dévla, vyrakhcian, i na gin manušénge Tyrenge, Izrailjoske, bang pal pročhudo rat.” I jone vyžužakirenape ratestyr.

⁹Adiáke túke trej te otmores péstyr rat manušéskiro, savó na sys bangó, kóli túte isyn pe iló te kerés lačhipén i čačipén angíl Ráskire-Devléskire jakhá.

¹⁰Kiéli tu vydžasa pe maribén proti tyré vergénde (vrogende), i Raj Devél, Devél tyró, otdéla len dre tyré vastá, i lésa len dro pliéno,

¹¹i tu dykhésa maškír plienonende džuvliá, gožona, i javéla joj pir iló túke la, i zakamesa te les la paloróm,

¹²tedy jan la dro péskiro kher, i mek joj te občhinel péskiro šeró i te občhinel péskire naja (nogti),

¹³i adáia zlela džuvlý péstyr plienoskiro péskiro uribén, i joj dživéla dro tyró kher, i obrovela péskire dadés i péskire da saró čhon; i paló (poslie) dová tu saštý (moginésa) te zadžas ke joj i te javes láke romesa, i joj iavéla túke romniása;

¹⁴kóli joj korigedýr (pozžedýr) na pokamelape túke, tedy otmek la, karik joj zakaméla, ne na bikin la pal rup i na rískir la dro dynaribén, pal-dová so tu otlyjan patýv i baripén látyr.

¹⁵Kóli vari-konéste javéna duj romniá, jekh kamly, a javír nad, i syr kamly, adiáke i nakamly bijanena léske čhavén, i anglatunó javéla nakamliakiro čhavó,

¹⁶tedy javéla adiáke: syr jov javéla te rozdel péskire čhavénge péskiro mištypén, léske naštý (na moginel) kamliakire-romniakire čhavéske te del pravo pal pervoneste angíl anglatuné-bijanybnaskire čhavéste nakamle romniatyr;

¹⁷ne jov isyn bangó te priĥaljol anglatunesa čhavés nakamle romniatyr, i te del léske duj pašá saréstyr, so léste lathelape, pal-dová so jov isyn anglatunó léskire zorjátyr, léske isyn pravo te javél anglatuné-rodoskiresa.

¹⁸Kóli vari-konéste javéla čhavó nakanduno i buntiaritko, savó na šunéla, so rakiréla léskiro dad i daj léske, i jone sykliakirdé ke dukhá les, ne jov na šunéla len,

¹⁹to tedy léskiro dad i daj mek te len i te janén les ke péskire-foróskire phurydyrá i ke vudará péskire, štetoskire, kaj jone dživéna,

²⁰i phenéna péskire foróskire phurydyrenge: “Davá amaró čhavó isyn nakanduno i isyn buntiaritko, na šunéla amaré lavá, jov isyn obhaiačo (xála, syr na dre péste) i matiaro”;

²¹tedy saré manušá léskire foróskire mek te marén les barénca ke meribén; i adiáke vytrade fuipén péstyr, i saré Izrail'tiáni javéna te šunén, i strahadjona.

²²Kóli vari-konéste lathelape bang, saví mol meribnáske, i jov javéla muliakirdo, i tu ublavesa les pe kašt,

²³to léskiro trúpo naštý, sob (kaj) te rat'kirel pe kašt (drévo), ne ĥarav les dre dová-pac' dyvés, pal-dová so javéla prokošnó angíl Raste Devléste kažno (sváko) manúš, kon isyn ublado pe kašt, i na magir tyrí phuv, saví Raj Devél, Devél tyró, déla túke syr meknó mištypén.