Read Biblija - Pe Baltitko Romani čib (Romanes) 2019 Baltic Romani Bible Javír Zakóno 23 Bible Online

Javír Zakóno 23 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 23

¹Konéste rostasade jatry (murškané masá), ci otčhindlo kova, odová naštý (na moginéla) te zadžál pe Ráskire-Devléskire skedyibén.

²Khelbo (nadadeskiro čhavó) naštý te zadžál pe Ráskire-Devléskiro skedyibén, i déšto ródo léskiro naštý te zadžál pe Ráskire-Devléskiro skedyibén.

³Amonitianino i Moavitianino naštý (na moginéna) te zadžán pe Ráskire-Devléskiro skedyibén, i léngiro déšto ródo naštý te zadžál pe Ráskire-Devléskiro skedyibén dre viéki,

⁴paldavá so jone na strenindle tumen marésa i paniésa pe drom, kiéli tumé giné Jegiptóstyr, i paldavá so jone lyné proti tuménde Valaamos, Vieoroskire čhavés, Pieforostyr Miesopotamijakirestyr, sob (kaj) jov te prokošel tut;

⁵ne Raj Devél, Devél tyró, na zakamdiá te šunél Valaamos, i obriskirdia Raj Devél, Devél tyró léskiro prokošybén dro bahtiakiribén túke, pal-dová so tu san drógo Ráske Devléske, tyré Devléske.

⁶Na mang lénge ramánjo (miro), i na bahtaliakir len dre saré tyré dyvesá, dro viéko.

⁷Na dykh vučipnása (na brydinpe) pe Idumejaninoste, pal-dová so jov isyn tyró pšal; na dykh vučipnása pe Jegiptianinoste, pal-dová so tu sánas javi pe léngiri phuv;

⁸a čhavoré, savé lénde bijandjona dro tríto ródo, saštý (moginéna) te zadžán pe Ráskire-Devléskiro skedyibén.

⁹Kiéli tu džása dro drom pe tyré vergénde (vrogende), to rakhpe saré čoripnástyr.

¹⁰Kóli túte javéla vari-kon nažužo, so kerdiápe lésa ratý, to mek jov te vydžál javrí stanostyr i te na zadžál dro stáno,

¹¹a kiéli jačéla bel'vél', to trej léske te obmorel péskire masá paniésa, i syr zadžála kham, to jov moginéla te zadžál pale dro stáno.

¹²Štéto isyn bangó te javél túte pal stáno, karik by túke trej te vydžas;

¹³apríč tyrí kurtála, trej, sob (kaj) te javél túte rydljovkica; i kiéli javésa te bešes pal stáno, vy'ganav lása ĥanbinori, i nevés zaganav lása tyró nažužypen.

¹⁴Pal-dová so Raj Devél, Devél tyró, psiréla maškír stáno tyró, sob (kaj) te zrakhél tut i te otdél vergén tyrén dre vastá tyré, a paldavá stáno tyró bangó te javél svénto, sob (kaj) Jov te na dykhél túte vari-so nažužo, i te na otdžal tútyr.

¹⁵Na vyde pisharís léskire xuláske, kiéli jov prastala sarésa ke tu péskire xulastyr;

¹⁶mek jov te dživél túte, maškír tuménde pe štéto, savó jov vykedéla dro vari-savó tyré for'jéndyr, léske javéla pir iló; na pritasav les.

¹⁷I, sob (kaj) te na javél biladžakuny džuvlý Izrailjoskire čhajendyr, i naštý, sob (kaj) te javél biladžakuno murš Izrailjoskire čhavéndyr.

¹⁸Na jan lové biladžakuné-džuvliakire i timín džukleskiri dre Ráskire-Devléskiro, tyré Devléskiro Kher, ni pir saví sovél, pal-dová so adalé dujdžiné isyn magiripén angíl Raste-Devléste, tyré Devléste.

¹⁹Na de dro kófo (tel procento) pšaléske tyréske ni rup, ni maró, ni vari-so javír, so saštý te otdes dro kófo,

²⁰iavire rigátyr manušéske de dro kófo, a tyré pšaléske na de dro kófo, sob (kaj) Raj Devél, Devél tyró, te bahtiakirél tut dre saró, so kerélape tyré vasténca, pe phuv, pe saví tu džása, sob (kaj) te les la péske.

²¹Kóli tu désa sovél Ráske-Devléske, Devléske tyréske, sýges ker ke kónco (ke jagóro) les, pal-dová so Raj Devél, Devél tyró, phučela pal léste tútyr, i pe túte javéla grého;

²²kóli tu na dyján sovél, tedy na javéla pe túte grého.

²³So vygijá tyré uštendyr, rakh i ker ke kónco (ke jagóro) adiáke, syr tu dyján lav Ráske-Devléske, Devléske tyréske, pir péskiri vólia, savó phendián tu péskire ušténca.

²⁴Kiéli zadžasa tu dro vinagrádniko tyré pašatuneskiro, tu saštý (moginésa) te xas múri čalés, ci but kaméla tyró di, a dro khoró (sasudo) tyró na čhuv.

²⁵Kiéli tu javésa pe žatva (sčhinyben) tyré pašatuneskiri, kuš kolosy vasténca tyrenca, ne sierpo (čhindló) na jan pe žatva tyré pašatuneskiri.