Read Biblija - Pe Baltitko Romani čib (Romanes) 2019 Baltic Romani Bible Javír Zakóno 24 Bible Online

Javír Zakóno 24 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 24

¹Kóli vari-kon léla romniá i jačéla lákire romesa, i joj na lathéla láska dre jakhá léskire, pal-dová so jov lathéla dre láte vari-so džungaló (brytko), i čhinela láke rozgiibnytko lyl, i déla láke dre vastá, i otmekéla la péskire kheréstyr,

²i joj vydžála léskire kheréstyr, džála, i džála pal javiréste paloróm,

³ne i adavá palatunó (posliednjo) rom roskamela la, i čhinela láke rozgiibnytko lyl, i déla láke dre vastá, i otmekéla la péskire kheréstyr, ci meréla adavá palatunó rom lákiro, savó lyjá la paloróm,

⁴to tedy naštý, sob (kaj) anglatunó (pérvo) lákiro rom, savó otmekciá la, nevéstyr te lel la péske syr romniá, pal-dová, syr joj iaciá magirdy, pal-dová so davá isyn magiripén angíl Raste-Devléste, i na magir phuv, saví Raj Devél, Devél tyró, déla túke dre mištypnáskiri miéra.

⁵Kóli vari-kon lyjá romniá naĥara, tedy jov mek te na džal pe maribén, i nisavó bangipen naštý te čhuvén pe léste; mek jov te jačélpe vól'no dro kher péskiro jekh berš i te radynélpe péskire romniása, savjá lyjá.

⁶Nikón naštý te lel dre symadý (zalogo) upratuno i telatuno žernovo (beledin), pal-dová so adasavó manúš léla dre symadý manušýtko di.

⁷Kóli vari-konés lathéna, so jov čordia vari-konéstyr péskire pšaléndyr, Izrailjoskire čhavéndyr, i kerdiá pisharisa les, i bikindia les; tedy adasaves čores trej te otdén meribnáske; adiáke vytrade fuipén péstyr.

⁸Dykh dro fránso (jazva) prokazakiro, rakh mištés i ker saró pir Zakóno, savéske vysykliakirena tumen rašaja, Lievíty; mištés kerén, so me rakirdjom lénge;

⁹rípir, so Raj Devél, Devél tyró, kerdiá Mariamake pe drom, kiéli tumé giné Jegiptóstyr.

¹⁰Kóli tu désa tyré pašatuneske vari-so dro vužlypén (dlugo), tedy na psir ke jov dro kher, sob (kaj) te les vužlypén léstyr,

¹¹a terdjov pe vulíca (pe gása), a odová manúš, savéske tu dyján dro vužlypén, vylydžala túke péskiri symadý (zalogo) pe gása;

¹²kóli jov javéla manúš čororó, to tu na pasjov te soves, kóli túte isyn léskiri symadý:

¹³rískir léske symadý (zalogo) angíl khameskiro zagiibén, sob (kaj) jov te pasjol te sovél dre péskiri ídia i te bahtiakirél tut, i túke javéla davá dro čačipén angíl Raste-Devléste, Devléste tyreste.

¹⁴Na pritasav manušés, savó isyn túte syr andynarščyko (prilyno pe butý), čorores i bogos, tyré pšaléndyr, ci tyré manušéndyr, savé javné javire rigátyr, savé dživéna pe phuv tyrí, dre tyré kherá;

¹⁵dro dová-pac' dyvés otdé pleskiriben léske, sob (kaj) kham te na zadžál angíl davá, pal-dová so jov isyn čororó, i užakiréla léskiro di les; sob (kaj) jov te na del gódla pe túte ke Raj Devél, i te na javél pe túte grého.

¹⁶Pe dadende naštý te čhuvés kára meribnasa pal léngire čhavénde, i pe čhavénde naštý te čhuvés kára meribnasa pal dadende, kažno (sváko) isyn bangó te javél meribnáske pal péskiro grého.

¹⁷Na sendiakir xohanés manušés, savó javdiá javire rigátyr i pirotos (sirotas); i pivliatyr (udovatyr) na le ídi dre symadý;

¹⁸rípir, so i tu sánas pisharisa dro Jegípto, i Raj Devél vyrakhcia tut odothýr: paldavá me i rakiráva túke te kerés davá.

¹⁹Kiéli tu javésa te čhines telé giv pe félda tyrí i bistresa ĥarbo (snopo) pe félda, na risjov te les; mek jov te jačélpe manušéske, savó javdiá javire rigátyr, pirotoske (sirotaske) i pivliake (udovake), sob (kaj) Raj Devél, Devél tyró, te bahtiakirél tut dre saré tyré vastengire réndy.

²⁰Kiéli javésa te obmares maslina tyrí, tedy na piridykh pal péste randiá (vétki): mek te jačélpe manušéske, savó javdiá javire rigátyr, pirotoske i pivliake.

²¹Kiéli javésa te les péske múri dre tyró vinagrádniko, na skéde dová, so jačélape pal péste: mek te jačélpe manušéske: savó javéla javire rigátyr, pirotoske (sirotaske) i pivliake (udovake);

²²i rípir, so i tu sánas pisharisa pe Jegiptóskiri phuv: paldavá me i rakiráva túke te kerés adiáke.