Read Biblija - Pe Baltitko Romani čib (Romanes) 2019 Baltic Romani Bible Javír Zakóno 26 Bible Online

Javír Zakóno 26 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 26

¹Kiéli tu javésa pe phuv, saví Raj Devél, Devél tyró, déla túke dre mištypnáskiri miéra, i javésa te les la, i lésa te dživés pe láte;

²tedy le pérva saré barjakirdé (plódy) phuvjákire, savé tu doresesa tyré phuvjátyr, saví Raj Devél, Devél tyró, déla túke, i čhuv dro khudo (korzina), i džá pe dová štéto, savó Raj Devél, Devél tyró, vykedéla, sob (kaj) te javél odój lav Léskiro;

³i jav ke rašái, savó javéla dre dolé dyvesá, i phen léske: “Adadyvés me rosphenava angíl Raste-Devléste, Devléste tyreste, so me zagijom pe daja phuv, saví Raj Devél sovlahadiá amaré dadénge te del aménge.’”

⁴Rašáj léla khudo tyré vastéstyr, i čhuvéla les angíl Ráskire-Devléskiro, tyré Devléskiro altárjo.

⁵Tu otphen i phen angíl Raste-Devléste, Devléste tyreste: ‘Dad miro sys Aramejanino, savó lodyja, i gijá dro Jegípto i lyjá te dživél odój nabute manušénca, i vyginé odój léstyr baré manušá, zoralé i but;

⁶ne Jegiptiáni kerdé fuipén aménge, i pritasavenas amen, i čhuvénas pe aménde pharé butiá;

⁷i dyjam ame gódla ke Raj Devél, Devél amaré-dadéngiro, i šundiá Raj Devél amarí gódla, i dykhciá amarí bída, butý amarí i pritasaiben amaró;

⁸i vylydžijá amen Raj Devél Jegiptóstyr zoralé vastésa i protyrdyne psikesa, baré strahasa, znamienijénca (ĥiertykénca) i divenca,

⁹i jandiá amen pe davá štéto, i dyjá aménge daja phuv, phuv pe saví thadéla thud i avgín;

¹⁰i adiáke, me jandjom pérva barjakirdé (načatki plodengire) phuvjátyr, saví Tu, Rajo Dévla, dyján mánge.” I čhuv davá angíl Raste-Devléste, Devléste tyreste, i pokloninpe (ker šerésa) angíl Raste-Devléste, Devléste tyreste,

¹¹i rádynpe pal saró lačhipén, savó Raj Devél, Devél tyró, dyjá túke i kheréske tyréske, tu i Lievito, i manúš, savó javdiá javire rigátyr, savó javéla túte.

¹²Kiéli tu otlesa (končynesa te otčhuves dre rig) saré dešengirja (dešta pašá), so déla tyrí phuv pe tríto berš, dešengiro berš, i otdesa Lievitoske, manušéske, savó javdiá javire rigátyr, pirotoske (sirotaske) i pivliake (udovake), sob (kaj) jone te xan dre tyré kherá i te čaljon,

¹³to tén'či phen angíl Raste-Devléste, Devléste tyreste: “Me vykedyjom miré kheréstyr svénta dešengirja, i otdyjom len Lievitoske, manušéske, savó javdiá javire rigátyr, pirotoske i pivliake, pir saró Tyró uphenybén, savó Tu rakirdian mánge: me na pirigijom Tyré priphenybená i na bistyrdjom;

¹⁴me na xajom látyr dre túga mirí, i na otčhudjom dro rig la dro nažužakiriben, i me na dyjom látyr vaš muleske; me kandyjom Ráskire-Devléskiri, miré Devléskiri zan, kerdjom saró, so Tu priphendian mánge.

¹⁵Podykh Tyré sventoné štetóstyr, bolybnástyr, i bahtiakir Tyré manušén, Izrailjoskiren, i phuv, saví Tu dyján aménge, syr Tu sovlahadian dadénge amarenge te des aménge phuv, pe saví thadéla thud i avgín.”

¹⁶Dre davá dyvés Raj Devél, Devél tyró, priphenela túke te kerés saró pir dalé uphenybená i dalé zakóny: rakh i ker ke kónco (ke jagóro) len saré tyré iléstyr i saré tyré diestyr.

¹⁷Ráske-Devléske Tu phendián akaná, so Jov javéla tyré Devlésa, i so tu javésa te psirés Léskire droménca i te rakhés Léskire uphenybená, i priphenybená Léskire, i zakóny Léskire, i te kandes (te šunés) Léskiri zan (glos).

¹⁸I Raj Devél adadyvés čhudiá Léskiri zor pe davá, syr Jov dyjá lav túke, so tu javésa jekhe Léskire manušéndyr, kóli tu javésa te rakhés saré Léskire priphenybená,

¹⁹i so jov čhuvéla tut vučedýr saré manušéndyr, savén Jov sozdyjá, pir baripén, pir lav i pir patýv, i so tumé javéna svénta manušá Raste-Devléste, Devléste tyreste, syr Jov rakirdiá.”