Read Biblija - Pe Baltitko Romani čib (Romanes) 2019 Baltic Romani Bible Javír Zakóno 27 Bible Online

Javír Zakóno 27 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 27

¹I rakirdiá Mójza i phurydyrá Izrailjoskire-čhavéngire manušénge: “Kerén ke kónco (ke jagóro) saré priphenybená, savé me rakiráva tuménge akaná.

²I kiéli tumé piridžana pal Iordáno, pe phuv, saví Raj Devél, Devél tyró, déla túke, tedy čhuv péske baré bará i obmakh len zvjoskasa;

³i čhin pe dalé bará saré lavá dalé Zakonóskire, kiéli tu piridžasa Iordáno, sob (kaj) te terdjos (te zadžas) pe phuv, saví Raj Devél, Devél tyró, déla túke, phuv, pir saví thadéla thud i avgín, syr rakirdiá túke Raj Devél, Devél tyré-dadéngiro.

⁴Kiéli tumé piridžana Iordáno, čhuvén dolé bará, syr me priphenava tuménge adadyvés, pe bérga Gieval [Eval-ju.o.], i obmakhen len zvjoskasa;

⁵i ker odój altárjo Ráske-Devléske, Devléske tyréske, altárjo barendyr, na čhuvi pe lénde sastýr;

⁶celoné barendyr ker altárjo Ráske-Devléske, Devléske tyréske, i jan pe léste célo shačkiribén Ráske-Devléske, Devléske tyréske,

⁷i jan svénto dyibén ramanjono (mírno) Ráske-Devléske, i xa odój, i rádynpe angíl Raste-Devléste, Devléste tyreste;

⁸i čhin pe bará saré lavá saré Zakonóskire drieván biciales (jasnes).”

⁹I phendiá Mójza i rašaja Lievíty saré Izrailjoske: “Šun i zaripir, Izrailjo: dro davá dyvés tu jacián tyré Ráskire-Devléskire, Devléskire manušytkoné nacyjása (narodosa);

¹⁰i adiáke šun Ráskire-Devléskiri, Devléskire-tyreskiri zan, i ker ke kónco (ke jagóro) Léskire priphenybená i uphenybená Léskire, savé priphendjom Me túke adadyvés.”

¹¹I rakirdiá Mójza manušénge dro dová dyvés, rakirí:

¹²“Adalé manušá isyn bangé te terdjon pe bérga Garizim, sob (kaj) jone te bahtiakiren manušén, kiéli jone piridžana Iordáno: Simieono (Siemjono), Lievijo, Juda, Isaharo, Iosifo (Joza) i Vieniamino;

¹³a adalé manušá isyn bangé te terdjon pe bérga Gieval, sob (kaj) te rakirén prokošybén: Ruvimo, Gado, Asiro, Zavulono, Dano i Niefalimo.

¹⁴Lievíty javéna te rakirén zoralés i phenéna zoralé zaniása saré Izrail'tianenge:

¹⁵“Prokošnó javéla odová, kon keréla vyčhindlo ci vyčhudo óbrazo, magiripén angíl Raste-Devléste dová, so kerdé manušéskire vastá, i jov čhuvéla les dro garadó štéto! Saré manušá otphenena zoralés i phenéna: amín'.

¹⁶Prokošnó javéla manúš, savó košela péskire dadés ci peskirjá da! I saré manušá phenéna: amín'.

¹⁷Prokošnó javéla manúš, savó piridžala rigá (miéžy) péskire pašatuneskire! I saré manušá phenéna: amín'.

¹⁸Prokošnó javéla manúš, savó korores zmarela droméstyr! I saré manušá phenéna: amín'.

¹⁹Prokošnó javéla manúš, savó xohanés sendinela manušés, kon javdiá javire rigátyr, pirotos (sirotas) i pivlia (udova)! I saré manušá phenéna: amín'.

²⁰Prokošnó javéla manúš, savó pasjola péskire-dadéskire romniása, pal-dová so jov otčhakirdiá péskire dadéskire-idiakiro jagóro (krajo)! I saré manušá phenéna: amín'.

²¹Prokošnó javéla manúš, savó pasjola vari-savé kheritkoné murdalesa/skotosa [riskiribnaskiresa murdalesa/zvierjosa-ju.o.]! I saré manušá phenéna: amín'.

²²Prokošnó javéla manúš, savó pasjola péskire pheniasa, péskire-dadéskire čhasa ci péskire-dákire čhasa! I saré manušá phenéna: amín'.

²³Prokošnó javéla manúš, savó pasjola sasiasa peskirjasa! I saré manušá phenéna: amín'.

²⁴Prokošnó javéla manúš, savó čorahanés zamarela (muliakiréla) péskire pašatunes! I saré manušá phenéna: amín'.

²⁵Prokošnó javéla manúš, savó léla lové, sob (kaj) te zamarél di i te pročhuvel rat, savó isyn nabango! I saré manušá phenéna: amín'.

²⁶Prokošnó javéla manúš, savó na keréla ke kónco/ke jagóro (na spolninela) lavá saré Zakonóskire, i na javéla te kerél pir lénde! I saré manušá phenéna: amín'.