Read Biblija - Pe Baltitko Romani čib (Romanes) 2019 Baltic Romani Bible Javír Zakóno 29 Bible Online

Javír Zakóno 29 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 29

¹Ake, isyn zavietoskire lavá, savó Raj Devél rakirdiá Mojzáske te čhuvél Izrailjoskire čhavénca pe phuv Moavoskiri, apríč zavieto, savó Raj Devél čhudiá lénca pe Xorivo.

²I skedyjá Mójza sarén Izrailjoskire čhavén, i phendiá lénge: “Tumé dykhné saró, so kerdiá Raj Devél angíl tumaré jakhá pe Jegiptóskiri phuv faraonosa i saré léskire slugénca (dynar'jénca) i saré léskire phuvjása;

³dolé baré zlydžaibena, savé dykhné tyré jakhá, i dolé baré znamiénii (ĥiertyká) i dívy;

⁴ne ke/žýko davá dyvés na dyjá tuménge Raj Devél iló, sob (kaj) tumé te ĥaljon, jakhá, sob (kaj) te dykhén, i kaná, sob (kaj) te šunén.

⁵Štardešá berš lydžijá tumen Raj Devél pir čhučí phuv, i tumaré ídi pe tuménde na roskušnepe i ĥeritka (obuv) tyré na roskušnepe pe tumarí ĥerój;

⁶maró tumé na xané, i mol (vino) i sikiera na piné, sob (kaj) tumé te džinén, so Me som Raj Devél, som Devél tumaró.

⁷I kiéli javné tumé pe štéto davá, vygijá pe aménde o Sigono, Jesievonoskiro králi, i Ogo, Vasanoskiri králi, sob (kaj) te marénpe aménca, i ame rozmardiam len;

⁸i lyjam léngiri phuv, i otdyjam la dre mištypnáskiri miéra Ruvimóskire i Gadóskire rodycóske i pašake Manasijáskire rodycóstyr.

⁹Rakhén lavá dalé zavietoskire, i kerén ke kónco (ke jagóro) len, sob (kaj) tuménge te javél baht dro saró, so tumé javéna te kerén.

¹⁰Saré tumé adadyvés san terdé angíl muj Ráskire-Devléskiro, tumaré Devléskiro, tumaré šeralé pe ródycy, phurydyrá tumaré, barydyrá tumaré, saré Izrail'tiáni,

¹¹tumaré čhavé, tumaré romniá i tumaré manušá, savé javné javire rigátyr, i dživéna dro tyró stáno, manušéstyr, savó čingirela kaštá tyré ke manúš, savó léla paní tyró,

¹²sob (kaj) te zadžas túke dro zavieto Ráskire-Devleskiresa, tyré Devleskiresa, i dre dorakiribnaskiri sovláh Lésa, savó Raj Devél, Devél tyró, adadyvés čhuvéla túsa,

¹³sob (kaj) Jov te kerél tut adadyvés Léskire manušénca, i Léske te javél túke Devlésa, syr Jov rakirdiá túke i, syr Jov sovlahadiá tyré dadénge Avraamóske, Isaakóske i Jakovóske.

¹⁴Na jekhe tuménca me čhuváva davá zaviéto i davá sovlahado dorakiribén,

¹⁵ne i odolenca, savé adadyvés adáj aménca isyn terdé angíl amaré Ráskire-Devléskiro, Devléskiro muj, adiáke i kodolenca, savé nane adáj aménca adadyvés.

¹⁶Pal-dová so tumé džinéna, syr ame dživdiam pe Jegiptóskiri phuv, i syr ame gijam maškír manušénde, pirdál savé tumé giné,

¹⁷i dykhciam magiripén léngiro i ídoly léngire, kaštune i baruné, rupuvé i suvnakuné, savé sys lénde.

¹⁸Mek te na javél maškír tuménde muršés, ci džuvliá, ci ródo, ci ródyco (čang), savengiro iló te otdžal by (xaj) akaná Rástyr-Devléstyr, Devléstyr amarestyr, sob (kaj) jov te psirél te dynarinél odolé-manušéngire devlorénge; mek te na javél maškír tuménde rukh (kornjo), savó barjakiréla truta (jado) i palyno,

¹⁹i, sob (kaj) te na javél adadyvés manušés, syr adasavó, savó šundiá dalé prokošybnytka lavá, sob (kaj) te šarelpe dre péskiro iló, rakirí: “Me javáva bahtaló, na dykhí pe dová, so Me javáva te psirav pir vykedyiben miré iléskiro”; i adiáke xasjola khetané čalo bokhalesa;

²⁰na otmekéla Raj Devél adasavé manušéske, ne dová-pac' časo zahačola xolý Ráskire-Devléskiri i mižehipen Léskiro pe odolé manušéste, i peréna pe léste saré dalé zavietoskire prokošybena, savé isyn čhindlé dre daja lylvarí, i léla krig (khosela krig) Raj Devél léskiro lav tel bolybnástyr;

²¹i čhuvéla dro rig les adasavé manušés Raj Devél pe xasibén saré Izrailjoskire rodycendyr, khetané saré zavietoskire prokošybnenca, savé isyn čhindlé dre daja lylvarí Zakonoskiri.

²²I phenéla ródo, savó javéla pal tuménde i tumaré čhavé, savé javéna pale tuménde, i manúš javire phuvjátyr, savó javéla duratuné phuvjátyr, dykhí pe dalé-phuvjákiro xasibén i nasvalypen, savénca zamenčynela la Raj Devél:

²³‘Siera (dzevelia) i lond, shačkiribén pir sarí phuv; joj na sieinelape i na barjakiréla, i na vydžála pe láte ni saví čar, syr paló (poslie) dová, kiéli sys xasiakirdé Sodómo, Gomóra, Adma i Sievoimo, savé xasiakirdiá Raj Devél dre xolý Péskiri, i dre Péskiro mižehipen’.

²⁴I phenéna saré manušá: “Palsó Raj Devél adiáke kerdiá lása phuvjása? Savó baró mižehipen Léskire xoliátyr!”

²⁵I phenéna: “Pal-dová so jone mekné zavieto Ráskire-Devléskiro, péskire-dadéngiro Devléskiro, savó Jov čhudiá lénca, kiéli vylydžijá len Jegiptóskire phuvjátyr,

²⁶i giné, i lyné te dynarinén javire devlorénge, i te mangénpe lénge, devlorénge, savé jone na džindlé, i pal savénde Jov na rakirdiá lénge:

²⁷paldavá ĥazdyjápe Ráskire-Devléskiri xolý pe daja phuv, i jandiá Jov pe láte saré zavietoskire prokošybena, savé sys čhindlé dre daja lylvarí;

²⁸i vytradyjá len Raj Devél phuvjátyr dre xolý, dro mižehipen i dre bari xolý i vytradyjá len pe javír phuv, syr akaná dykhasa.”

²⁹But isyn Raste-Devléste, amaré Devléste čorahanybena (siekriety), savé Jov zaučhakirela (garavela) manušéndyr, so isyn otčhakirdo aménge i amaré čhavénge ke viéko, sob (kaj) ame te kerás saró pir dalé-Zakonóskire lavá.