Read Biblija - Pe Baltitko Romani čib (Romanes) 2019 Baltic Romani Bible Javír Zakóno 3 Bible Online

Javír Zakóno 3 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 3

¹I risijam ame odothýr, i gijam ke Vasáno, i vygijá proti aménde pe maribén Ogo, o Vasanoskiro králi, saré péskire manušénca, pašýl Jedreja.

²I phendiá mánge Raj Devél: “Na dar léstyr, pal-dová so Me otdáva les dro tyró vast, i sarén léskire manušén, i sarí léskiri phuv, i tu kerésa lésa adiáke, syr tu kerdián Sigonosa [Sihonosa-ju.o.], Amoriejéngire kralísa, savó dživdiá ke Jesievóno.”

³I otdyjá Raj Devél, Devél amaró, dre amaré vastá i Ogos, Vasanoskire kralís, i sarén léskire manušén; i ame domardiam les adiáke, so nikón na jaciápe léste džidó;

⁴i lyjam ame dre dová časo saré léskire fórja, na sys fóro, savó ame te na las léndyr; šovdešá fórja, sarí Argovoskiri okruga, Vasanoskire-Ogoskiro kralipnastyr.

⁵Saré dalé fórja, sys kerdé zoralé tynénca, vučé vantenca, vudarenca, i zaučhakiribnenca, apríč fórja, savé na sys oblydžine zoralé tynénca, sys drieván but.

⁶I otdyjam ame len prokošybnaske, syr kerdiám Sigonosa, Jesievonoskire kralísa, otdyjam prokošybnaske kažno fóro muršenca, džuvliénca i čhavorenca;

⁷ne saré kheritkoné murdalén (skoto) i saró zakedyno dre fórja lyjam ame péske dro doresybén (dobyča).

⁸I lyjam ame dre dová časo duje Amoriejéngire-kral'jengire vastéstyr daja phuv, saví sys pir daja Iordanoskiri rig, Arnonoskire sygnone rekátyr (leniátyr) ke bérga Jermono, —

⁹Sidoniani Jermono kharéna Siriono, a Amoriei kharéna les Sieniro, —

¹⁰saré fórja pe loščýna, saró Galaádo i saró Vasáno ke Salha i Jedreja, Vasanoskire-Ogoskire kralipnaskire fórja;

¹¹iekh Ogo, o Vasanoskiro králi, jaciápe Riefaimendyr. Ĥáda, léskiro čhuibén (odro), čhuibén sastruno, i akaná isyn dre Rava, Amonoskire čhavénde: dlengipén léskiro isyn jeniá (bijekhéskiro deš) kuniá (logci), a léskiro buĥlypén isyn štar kuniá, muršengire kuniá.

¹²Phuv daja ame lyjam dre dová časo, lyjam Aroierostyr, savó isyn pašýl Arnonoskiri sýgno rékica (lenorí); i pašýl bérga Galaadoskiri lákire for'jenca otdyjom me Ruvimóskire i Gadóskire rodycóske;

¹³a so jaciápe Galaadostyr i saró Vasáno, Ogoskiro kralipén, otdyjom me paš phuv Manasijáskire rodycóske, sarí okruga Argovoskiri saré Vasanosa.

¹⁴Iairo (Jairo), o Manasijáskiro čhavó, lyjá sarí Argengiri okruga ke Giesuroskire i Maahakire miéžy, i jov khardiá la Vasáno, pir péskiro lav, Jairoskire ĥavenca, so ke dalé dyvesá;

¹⁵I me dyjom Galaádo Mahiroske.

¹⁶I Ruvimóskire i Gadóskire rodycóske dyjom me phuv Galaadostyr ke Arnonoskiri sýgno rékica (lenorí), phuv maškirál sýgno rékica (lenorí) i miéža, ke sýgno rékica (lenorí) Iavokoskiri, Amonoskire-čhavéngire miéža,

¹⁷adiáke-pac' loščýna i Iordáno, savó i isyn miéža Kinieriefostyr ke loščýna morjoskiri, Londe-morjoskiri, pašýl Fasgakire-bergákiro sklono ke vastóko.

¹⁸I dyjom me tuménge dro dová časo uphenybén, rakirí: “Raj Devél, Devél tumaró, dyjá tuménge daja phuv; saré, kon moginéla te džal pe maribén, len maribnýtko (oružyjo), džán angíl tumaré pšalénde, Izrailjoskire čhavénde;

¹⁹iekh tumaré romniá i tumaré čhavé i tumaré kherítka murdalá (skoto) tumaré, mek te jačénpe dre tumaré fórja, savé me dyjom tuménge,

²⁰paka Raj Devél déla ramánjo (miro) tumaré pšalénge, syr tuménge, i paka i jone doreséna dro xulaiben phuv, saví Raj Devél, Devél tumaró, déla lénge pal Iordáno; tedy risjon kažno dro péskiro xulaiben, savó me dyjom tuménge.”

²¹I Isusóske (Johošuaske) rakirdjom me dro dolé dyvesá: “Tyré jakhá dykhné saró, so kerdiá Raj Devél, Devél tumaró, duje dalé kral'jenca; dová-pac' keréla Raj Devél saré kralipnenca, savé tu javésa te prodžas;

²²na darén léndyr, pal-dová so Raj Devél, Devél tumaró, Kokoró marelape pal tuménde.”

²³I mangdjompe me Ráske-Devléske dre dolé dyvesá dasavé lavénca:

²⁴“Baró Rajo, Rajo Dévla, Tu lyjan te sykaves Tyré pisharíske sláva Tyrí i zoraló vast Tyró; pal-dová so, savó devel isyn pe bolybén, ci pe phuv, savó mogindiá by te kerél dasavé réndy, syr Tyré, i zorjása dasavjasa, syr Tyrí isyn?

²⁵De mánge te piridžav i te dykháv doiá lačhí phuv, saví isyn pal Iordáno, i doiá šukár bérga i Liváno.”

²⁶Ne Raj Devél xoliasolas pe mánde pal tuménde, i na kandyjá man, i phendiá mánge Raj Devél: “Uhtýlla (dósi) túke, angíl na rákir Mánge butýr pal davá;

²⁷a džá upré pe Fasgakiro vučipén, i podykh tyré jakhénca ke mórjo (derjáv), i ke paš-rat (sieviero), i ke paš-dyvés (jugo), i ke vastóko, i podykh tyré jakhénca, pal-dová so tu na prodžasa pir davá Iordáno;

²⁸ne de uphenybén Isusóske (Johošuaske), i de zor léske i zoraliakir les dro dúho (fáno); pal-dová so jov javéla angíl adalé manušénde, i jov rozdela lénge pir mištypnáskiri miéra phuv, pe saví tu podykhesa.”

²⁹I terdijam ame pe dólo, proti Bief-Fiegoro.