Read Biblija - Pe Baltitko Romani čib (Romanes) 2019 Baltic Romani Bible Javír Zakóno 31 Bible Online

Javír Zakóno 31 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 31

¹I gijá Mójza, i rakirdiá dalé lavá saré Izrailjoskire čhavénge,

²i phendiá lénge: “Akaná mánge šel te biš berš, me na davá ráda (na mogináva) te vydžav i te zadžav, i Raj Devél phendiá mánge: ‘Tu na piridžasa Iordáno’;

³O Raj Devél, Devél tyró, Kokoró džála angíl túte, Jov tradéla adalé manušén tyré móstyr, i tu javésa te les len; Isúso (Johošuá)[1] džála angíl túte, syr rakirdiá Raj Devél;

⁴i keréla Raj Devél lénca adiáke-pac', syr Jov kerdiá Sigonosa i Ogosa, Amoriejéngire kral'jenca, i léskire phuvjása, savén Jov tradyjá krig;

⁵i otdéla len Raj Devél tuménge, i tumé keréna lénca pir saré priphenybená, savé rakirdjom me tuménge;

⁶iavén zoralé-voliakire, i javén murškané, na darén, i na strahadjon léndyr, pal-dová so Raj Devél, Devél tyró, Kokoró džála túsa, i Jov na otdžala tútyr, i na jačkiréla tut.”

⁷I khardiá Mójza Isusós (Johošuas) i angíl saré Izrail'tianengire jakhá phendiá léske: “Jav zoralé-voliakiro i murškanó, pal-dová so tu zadžasa adalé manušénca pe phuv, saví Raj Devél sovlahadiá dadénge leskirenge te del léske, i tu roskeresa la pe mištypnáskiri miéra léske;

⁸Raj Devél Kokoró džála angíl túte, Kokoró javéla túsa, Jov na otdžala tútyr i na jačkiréla tut, na dar i na strahadjov.”

⁹I čhindiá Mójza davá Zakóno, i otdyjá les rašange, Lievijoskire čhavénge, savé lydžánas Ráskire-Devléskiro Zavietoskiro kovčego, i saré Izrailjoskire-čhavéngire phurydyrenge.

¹⁰I dyjá lav lénge Mójza, i phendiá: “Syr prodžána eftá (bitrinéngiro deš) berš, dro otmekibnaskiro berš, pe svénko kuščengiro (budengiro),

¹¹kiéli saró Izrailjo javéla angíl [Raste-Devléste-ju.o.] Ráskire-Devléskiro, [tyré Devléskiro muj-r.s.], pe štéto, savó vykedéla Raj Devél, de upré (gin zoralés) davá Zakóno angíl saró Izrailjo dro saró šunybén;

¹²skéde manušén, muršén i džuvlién, i čhavorén, i tyré manušén, savé javné javire rigátyr, savé javéna dre tyré šátry/budy [pórta-ju.o.], sob (kaj) jone te šunén i te sykljon, i, sob (kaj) jone te darén Rástyr-Devléstyr, tumaré Devléstyr, i te kerén ke kónco/iagóro te pričhuvén zor i te kerén ke kónco/ke jagóro (te spolninen) saré dalé Zakonóskire lavá;

¹³i sob (kaj) léngire čhavé, savé na džinéna davá, te šunén i te vysykljon te darén Rástyr-Devléstyr, dre saré dyvesá, paka tumé javéna te dživén pe phuv, pe saví tumé piridžana pal Iordáno, sob (kaj) te les la.”

¹⁴I phendiá Raj Devél Mojzáske: “Ĥáda, dyvesá tyré podginé ke meribén; khar Isusós i terdjon pašýl skedyibnáskiri šátra (skínija), i Me dáva léske uphenybén.” I javné Mójza i Isúso, i terdiné jone pašýl skedyibnáskiri šátra.

¹⁵I javdiá Raj Devél dre šátra, dro oblokoskiro stýlbo, i terdijá oblokoskiro stýlbo pašýl šatrakiro zagiibén.

¹⁶I phendiá Raj Devél Mojzáske: “Ĥáda, tu pasjosa tyré dadénca, i adalé manušá léna te blendynen i te psirén pal javire devlorende dolé-phuvjákire, pe saví jone zadžána, i jačkirena Man, i phagirena Miro zavieto, savó Me čhudjom lénca;

¹⁷i zahačola Mirí xolý pe lénde dro dová dyvés, i Me jačkirava len, i Me garavava Miro muj léndyr, i jone javéna tradyne krig, i lathéna len baré bidy i piridživipena, i phenéna jone dro dová dyvés: “Ci na paldavá lathné amen dalé bidy, so nane Devlés (nane Devél) maškír aménde?”

¹⁸i Me, čačes, garavava Miro muj léndyr dro dová dyvés pal saré léskire fuj réndy, savé jone keréna, gii ke javír devloré.

¹⁹I paldavá čhinen (pisynen) péske dalé-giliakire lavá, i sykliákir láke Izrailjoskire čhavén; i začhuv len te bagán, sob (kaj) daja gilý te javél syr jakhitkima (svidietiel'stvo) pe čhavénde Izrailjoskirende,

²⁰pal-dová so Me zalydžava len pe phuv, syr Me sovlahadjom léngire dadénge, kaj thadéla thud i avgín, i jone javéna te xan i te čaljon, i javéna thule, i jone džána ke javír devloré, i javéna te dynarinén lénge, a Man mekéna i phagirena Miro zavieto.

²¹I kiéli lathéna len baré bidy i piridživipena, tedy daja gilý javéla pe lénde syr dophenybén, pal-dová so joj na vydžála léngire-rodoskire uštendyr. Me džinóm léngiri godý, saví isyn lénde akaná, angledýr syr Me jandjom len pe phuv, pal saví Me sovlahadjom te dav lénge.”

²²I čhindiá o Mójza daja gilý dro dová dyvés, i vysykliakirdia láke Izrailjoskire čhavén.

²³I priphendiá Raj Devél Isusóske (Johošuaske), Navinoskire čhavéske, i phendiá léske: “Jav zoralé-voliakiro i murškanó; pal-dová so tu zalydžasa Izrailjoskire čhavén pe phuv, pal saví Me sovlahadjom lénge, i Me javáva túsa.”

²⁴Kiéli Mójza dočhindia dre lylvarí saré lavá dalé Zakonóskire ke kónco (ke jagóro),

²⁵to tedy Mójza phendiá Lieviténge, savé lydžánas Ráskire-Devléskiro zavietóskiro kovčego (mohtó), phení:

²⁶“Len daja Zakonoskiri lylvarí, i čhuvén la pe čačí (pravo) rig Ráskire-Devléskiri, tumaré Devléskiro kovčego zavietosa, i joj odój javéla dophenybnasa pe túte;

²⁷pal-dová so me džinóm, so tumé san buntuítka i pharé-ilytka: Ĥáda i akaná, kiéli me dživáva akaná tuménca, tumé san narta (upriama) angíl Raste-Devléste, i iščo (inké) butýr javéna, syr me meráva?

²⁸Skedén ke me sarén phurydyren pe tumaré ródycy i dykhiibnaskiren (nadziratielien) tumaren, i me phenáva lénge dro saró šunybén dalé lavá, i kharáva dro dophenybén pe lénde bolybén i phuv.

²⁹Pal-dová so me džinóm, so syr me meráva, to tumé rozmekenape i otdžana droméstyr, savó me dyjom tuménge, i syr prodžála časo (cýro), to lathéna tumen bidy pal dová, so tumé javéna te kerén čoripén angíl Ráskire-Devléskire jakhá, xoliakiri Les péskire vastengire rendénca.”

³⁰I phendiá Mójza dro saró šunybén angíl Izrail'tianengiro skedyibén dalé-giliakire lavá ke kónco (ke jagóro):