Read Biblija - Pe Baltitko Romani čib (Romanes) 2019 Baltic Romani Bible Javír Zakóno 33 Bible Online

Javír Zakóno 33 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 33

¹Davá isyn bahtiakiribén, savésa Mójza, manúš Devléskiro, bahtiakirdiá Izrailjoskire čhavén angíl léskiro meribén.

²Jov phendiá: “O Raj Devél javdiá Sinajostyr, sykadyjá lénge Sieirostyr, Faranoskire bergátyr, i gijá drieván buté sventonenca; jandiá Léskiri jag Zakonóstyr Léskire čačé vastésa.

³Čačunés Léske isyn dróga Léskire manušá, saré Léskire svénta isyn dro Léskiro [Tyró-r.s.] vast, i jone bešné telál paš Léskire piré (stópy), sob (kaj) te šunén Léskire lavá.

⁴Zakóno dyjá aménge Mójza, syr meknó mištypén, Jakovóskire skedyibnaske.

⁵I jov sys Izrailjoskiro králi, kiéli skedenaspe manušéngire barydyrá khetané Izrailjoskire rodycenca.

⁶Mek te dživél Ruvimo, i mek jov te na merél, i mek te na javél lénde nábut manušá!”

⁷Ne pal Judaste phendiá adiáke: “Šun, Rajo Dévla, zan Judaskiri, i jan les ke léskire manušá; péskire vasténca mek jov te zaterdjol pal péste (te broninel pes), i Tu, Rajo Dévla, jav te pomogines proti léskire vergénde.”

⁸I pal Lievijoste phendiá: “Te javél tumimo Tyró i urimo Tyró pe sventoné muršeste Tyreste, savés Tu sprobindian dre Masá [Massa-ju.o.], savésa Tu lydžijan čingárd pašýl Mierivakire paniá,

⁹savó rakiréla pal péskire dadéste i péskire date: “Me na dykháva pe lénde”, i, savó péskire pšalén na priĥaljola, i péskire čhavén na džinéla; pal-dová so jone, Lievíty, Tyré lavá rakhena, i ke zavieto Tyró rikirenape zoralés,

¹⁰savé sykliakiréna Tyré zakonenge [Zakonoske-ju.o.] Jakovós i Tyré priphenybnenge Izrailjo, jone čhuvéna aromatytka čarjá te thuvliakiren angíl muj Tyró i célo shačkiribén pe altárjo Tyró.

¹¹Bahtiakir, Rajo Dévla, léskiri zor, i réndo léskire vastengiro, zanasvaliakir trušula (dumitko) odolengire, savé ĥazdénape pe léste i konéske jov isyn na pir iló, sob (kaj) jone te na moginen te terdjon pe ĥerá.”

¹²Pal Vieniaminoste phendiá: “Ráskire-Devléskiro drógo čhavó dživéla Léste bidarakiro, Raj Devél déla vast (pomoginela) léske kažno dyvés, i jov otkinjola maškír Léskire miéžy.”

¹³Pal Iosifoste (Jozaste) phendiá: “Phuv léskiri isyn bahtiakirdy Rástyr-Devléstyr bolybnáskire pahlyniasa (rosasa) i biezdnakire darenca, savé isyn pašté telál,

¹⁴vykedyné barjakirdesa (plodosa) khamestyr i vykedyné ubarjakiribnasa čhonestyr,

¹⁵samone fededyršone pervoné barjakirdenca phurané bergendyr i vykedyné darenca viečnone bergicendyr,

¹⁶i vykedyné phuvjákire darenca i doléstyr, so pherdiakirela la. Bahtiakiribén Devléskiro, Savó javdiá dro tiernytko xrústo, mek te javél pe šeró Iosifoskiro i pe tiemjo naj fedyršone péskire pšaléndyr.

¹⁷Léskiri zor isyn syr anglatuné-bijanypnaskire guruvoreste, i šyngá (rógi) léskire, syr šyngá guruveskire; lénca zaphusavela jov saré manušýtka nácyi ke phuvjákiro jagóro (ke krajo): davá isyn šelá tysjoncy (t'my) Jefriemóskire, davá isyn tysjoncy Manasijáskire.”

¹⁸Pal Zavulonoste jov phendiá: “Rádynpe, Zavulono, dre tyré dromá, i Isaharo, dre tyré šátry;

¹⁹kharéna jone manušén pe bérga, odój jone čhinena čačuné svénta dyibená Ráske-Devléske, pal-dová so jone čaliakirenape (čaravenape) morjoskire (derjavéskire) barvalypnasa i kučipnenca, savé isyn garadé dro práho.”

²⁰Pal Gadoste jov phendiá: “Bahtiakirdó isyn odová, kon rozbuĥliakirela Gadoske phuv; jov isyn paštó syr ščer (liévo), i phagiréla i vast, i šeró;

²¹jov vykedyjá péske pérvo barjakirdó (načatko) phuvjákiro, odój jov doresciá mištypnáskiri miéra Zakonóskire dyibnaristyr, i javdiá jov manušéngire šeralenca, i kerdiá saró pir čačipén Ráskire-Devléskiro i sendy Izrailjoskire.”

²²Pal Danoste jov phendiá: “Dano isyn ternó ščer (liévo), savó prastala Vasanostyr.”

²³Pal Niefalimoste jov phendiá: “Niefalimo isyn pherdiakirdo radymása i isyn pherdó pe léste bahtiakiribén Rástyr-Devléstyr; mórjo (derjáv) i pašdyves (jugo) isyn léskire.”

²⁴Pal Asiroste jov phendiá: “Bahtiakirdó te javél maškír čhavénde Asiro, léske javéna te sykavén patýv léskire pšála i obmakninela dre jeliejo léskiri ĥerój;

²⁵sastýr i xarkóma (mied') — zaphandypena (šybiery) isyn tyré; syr dyvesá tyré, javéla te barjol tyró barvalypén [mištypén-ju.o.].

²⁶Nane javire Devlés (nane javír Devél) dro Izrailjo, Savó isyn pir bolybén, Savó javdiá te del vast (te pomoginel) túke, i Savó isyn dre Léskiri sláva pe óbloki;

²⁷Tyró Raj Devél isyn ĥaratuno štéto te garadjos, i tu san tel viečna vastá; Jov tradéla krig vergén (vrogen) tyré móstyr i phenéla: “Hasiakir len!”

²⁸Izrailjo dživéla bi darákiro, jekhdžinó; jakh Jakovoskiri dykhéla angíl péste phuv barvaly marésa i moliasa (vinosa), i bolybén léskiro čhuvéla kaplienca (čholynenca)[2] pahlyniatyr (rosatyr).

²⁹Bahtaló tu san, Izrailjo! Kon isyn adasavó, syr tu san, savés Raj Devél rakhéla, Jov isyn ščýto tyró i kurtála slavake tyrjake. Vérgi tyré poddenape túke, i tu štavesa léngire vučé štéty.”