Read Biblija - Pe Baltitko Romani čib (Romanes) 2019 Baltic Romani Bible Javír Zakóno 34 Bible Online

Javír Zakóno 34 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 34

¹I gijá upré Mójza Moavitoskire loščynendyr pe bérga Nievo, pe Fasgakiro vučipén, so isyn proti Jerihóno, i sykadiá léske Raj Devél sarí phuv Galaadoskiri ke Dano,

²i sarí Niefalimoskiri phuv, i sarí Jefriemóskiri phuv i Manasijaskiri, i sarí Judaskiri phuv, až ke západno (pal-panitko) mórjo (derjáv),

³i paš-dyvesýtko (južno) rig, i loščýna pe dólo Jerihóno, Pal'mengiro fóro, ke Sigoro.

⁴I phendiá léske Raj Devél: “Ĥáda, isyn phuv, pal saví me sovlahadjom Avraamóske, Isaakóske i Jakovóske, rakirí: ‘Rodoske tyréske Me dáva la’; Me dyjom túke te dykhés la jakhénca tyrenca, ne pe láte tu na zadžasa.”

⁵I myjá odój Mójza, pishári Ráskire-Devléskiro, pe Moavitoskiri phuv, pir Ráskire-Devléskiro lav;

⁶i ĥaradé les pe dólo pe Moavitoskiri phuv proti Bief-Fiegoro, i nikón na džinéla štéto ĥaraibnytko léskiro až ke davá dyvés.

⁷Mojzáske sys šel te biš berš, kiéli jov myjá; ne jakhá léskire na korine, i zor dre léste jaciápe.

⁸I rondlé pal Mojzaste Izrailjoskire čhavé pe Moavitoskire loščyny trijánda dyvesá. I proginé roibnytka dyvesá i piridživipen pal Mojzaste.

⁹I Isúso (Johošuá), Navinoskiro čhavó, pherdija godiakire duhósa, pal-dová so Mójza čhudiá pe léste vastá péskire, i kandyné les Izrailjoskire čhavé, i kerdé adiáke, syr rakirdiá Raj Devél Mojzáske.

¹⁰I na sys butýr Izrailjoste prorokós adasaves, syr Mójza, savés Raj Devél džindiá muj ke muj,

¹¹pir, saré znamiénii (ĥiertyká) i dívy, savé bičhadiá les Raj Devél te kerél pe Jegiptóskiri phuv pe faraonoste, i pe saré léskire pishar'jende, i pe sarí léskiri phuv,

¹²i pir zoraló vast, i pir baré dívy, savé Mójza kerdiá angíl saré Izrailjoskire jakhá.