Read Biblija - Pe Baltitko Romani čib (Romanes) 2019 Baltic Romani Bible Javír Zakóno 4 Bible Online

Javír Zakóno 4 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 4

¹I akaná, Izrailjo, šun uphenybená i zakóny, savé me sykliakirava tumen te kerén, sob (kaj) tumé te javén džidé, i te džán i te doresen doiá phuv, saví Raj Devél, tumaré dadéngiro Devél, déla tuménge;

²te na pričhuvén ke dová, so me rakirdjom tuménge, i te na otlen doléstyr; rakhén Ráskire-Devléskire, tumaré Devléskire priphenybená, savé me dáva tuménge.

³Jakhá tumaré dykhné saró, so kerdiá Raj Devél Vaal-Fiegorosa: kažnoné manušés, savó kerdiá syr Vaal-Fiegoro, tradyjá krig Raj Devél, Devél tyró, tyré manušéndyr;

⁴a tumé, savé rikirdepe zoralés ke Raj Devél, Devél tumaró, san džidé saré akaná.

⁵Dykhén, me sykliakirdjom tumen uphenybnenge i zakonenge, syr rakirdiá mánge Raj Devél, Devél miro, sob (kaj) tumé adiáke te kerén pe doiá phuv, dre saví tumé zadžána, sob (kaj) te xulainen lása;

⁶i, sob (kaj) tumé te rakhén i te kerén pir lénde: pal-dová so dre davá isyn godypén tumaró i godý tumarí angíl jakhá manušéngire, savé šunéna pal saré dalé uphenybená, i phenéna: ‘Jekh adalé baré manušá isyn manušá godé i baré-godiakire.’

⁷Pal-dová so, ci isyn savé baré manušá, ke savé develá léskire te javén by adiáke pašýl, syr pašýl ke ame Raj Devél, amaró Devél, kiéli ame kharasa Les?

⁸I ci isyn, savé baré manušá, savénde te javén by dasavé čačuné uphenybená i zakóny, syr saró davá Zakóno isyn, pal savó me čhurdava lav adadyvés?

⁹Féni (tóka), rakhpe, i garav rakhunes tyró di, sob (kaj) túke te na bistres dolé réndy, savé dykhné tyré jakhá, sob (kaj) jone te na vydžán tyré iléstyr dre saré tyré džiibnáskire dyvesá; i rosphen pal lénde tyré čhavénge i tyré-čhavéngire čhavénge,

¹⁰pal dová dyvés, kiéli tu sánas terdó angíl Raste-Devléste, tyreste Devléste, pašýl Xorivo, i kiéli phendiá Raj Devél mánge: ‘Skéde ke Me manušén, i Me phenáva lénge Miré lavá, savéndyr jone vysykljona te darén Mándyr dre saré péskire džiibnáskire dyvesá pe phuv i vysykliakirena péskire čhavén.’

¹¹Tumé podginé i terdiné tel bérga, a bérga xačija jagása ke bolybén, i sys ciamlo (tjomno), óbloko i kalypén.

¹²I rakirdiá Raj Devél ke tumé maškirál jag; Léskire-lavengiri zan (glos) tumé šundlé, ne muj na dykhné, a jekh zan;

¹³i dyjá te džinél Jov tuménge zavieto Péskiro, savó phendiá tuménge te kerés saró, pir deš lavá (deštune) i čhindiá les pe duj baruné skrižáli (tablicy);

¹⁴i phendiá mánge Raj Devél dre dolé dyvesá te sykliakirav tumen uphenybnenge i zakonenge, sob (kaj) tumé te kerén pir lénde pe doiá phuv, dre saví tumé zadžána, sob (kaj) te xulainen lása.

¹⁵Rakhén i rikirén zoralés tumaré dijá, so tumé na dykhné ni savó moskiro óbrazo (stac') dro dová dyvés, kiéli rakirdiá ke tumé Raj Devél pe Xorivo jagatyr,

¹⁶sob (kaj) tumé te na perén dro bléndo i te na vyčhinen péske muiá, ci forma vari-saví moskiri, muršés ci džuvliá,

¹⁷ci kopija vari-savé kheritkoné-murdaleskiri, savó isyn pe phuv, ci vari-savjá čirikliá phakenca (krylenca), saví vurniala tel bolybén,

¹⁸ci kopija vari-savés gados, savó polzynela pir phuv, kopija vari-savé mačheskiri, savó isyn dro paní teledýr phuvjátyr;

¹⁹i sob (kaj) tu, dykhí pe bolybén, i kiéli dykhcián kham, čhon i čergeniá i saró, so isyn pe bolybén, sob (kaj) davá te na zlydžal tut, i te na mangespe lénge, i te na dynarines lénge, adiáke syr Raj Devél, Devél tyró, dyjá len saré manušénge tel saró bolybén syr meknó mištypén (nasliedstvo).

²⁰A tumen lyjá Raj Devél i vylydžijá tumen sastruné bovestyr, Jegiptóstyr, sob (kaj) tumé te javén Léskire manušá Léskire mekné mištypnástyr, syr davá akaná bicialó.

²¹I Raj Devél xoliásyja pe mánde pal tuménde, i sovlahadiá, so me na piridžava pal Iordáno i na zadžava pe doiá lačhí phuv, saví Raj Devél, Devél tyró, déla túke dre mištypnáskiri miéra;

²²me meráva pe daja phuv, na pirigii pal Iordáno, a tumé piridžana, i javéna tumé xulaja pe doiá lačhí phuv.

²³Rakhénpe, sob (kaj) te na bistren tuménge dynó zavieto (lav) Ráskire-Devléskiro, savó Jov čhudiá tuménca, i sob (kaj) te na kerén péske vari-savó muj dre vari-saví forma, syr priphendiá túke Raj Devél, Devél tyró;

²⁴pal-dová so Raj Devél, Devél tyró, isyn jag, saví xála, isyn Devél zevlynypnaskiro.

²⁵Kóli bijandjona túte čhavé i tyré čhavénde čhavé, i ĥará (dlúges) dživi pe phuv, a tumé džána dro bléndo, i keréna kopii, savé sykavéna ídoly, i keréna daja xolý angíl Ráskire-Devléskire, tumaré Devléskire jakhá, i rosholiakirena Les,

²⁶to tedy me dophenava tuménge adadyvés bolybnasa i phuvjása, so tumé syg xasiakirena phuv, vaš péske, pir saví tumé piridžana pal Iordáno; tumé na javéna but dyvesá pe láte, ne xasjona;

²⁷i rosčhurdela tumen Raj Devél pir saré manušénde te dživén, i jačénape pe nábut maškirál manušénde, ke savé zalydžala tumen Raj Devél.

²⁸I tumé javéna odój te dynarinén devlorénge, savé kerdé manušéngire vastá kaštéstyr i barestyr, savé na dykhéna i na šunéna, i na xána, i na sungavena.

²⁹Ne kiéli tu javésa te rodes odój Ras-Devlés, tyré Devlés, tedy lathesa Les, kóli javésa te rodes Les saré tyré ilésa i saré tyré diesa.

³⁰Kiéli tu javésa dre bída, i kiéli saró davá lathéla tut dre saré dyvesá, so iščo (inké) javéna, tedy tu risjosa ilésa ke Raj Devél, Devél tyró, i šunesa Léskiri zan (glos).

³¹Pal-dová so Raj Devél, tyró Devél, isyn Raj Devél tangipnaskiro; Jov na jačkiréla tut i na xasiakiréla tut, i na zabistrela zavieto tyré dadénca, savó Jov sovlahasa dyjá lénge.

³²Pal-dová so phuč anglatunendyr, savé sys angledýr tútyr, dolé dyveséstyr, dre savó Devél sozdyjá manušés pe phuv, i jekhe bolybnáskire jagoróstyr (koncostyr) ke javír jagóro bolybnáskiro: ci sys vari-so dasavo, syr davá baró réndo, ci šundlo, ci so poddžalas pe davá (daleske)?

³³Ci šundlé vari-savé manušá Devléskiri zan, saví rakirdiá jagatyr, i jačnépe džidé, syr šundián tu?

³⁴Ci skedelaspe vari-savó Devél te džal, te lel péske manušén maškír javire manušénde thagar'jenca, znamienijénca (ĥiertykénca) i divenca, i maribnása, i zoralé vastésa, i vučé vastésa, i baré strahasa, syr kerdiá vaš tuménge Raj Devél, tumaró Devél, dro Jegípto angíl tyré jakhá?

³⁵Túke sys dynó te dykhés davá, sob (kaj) tu te džinés, so jekh Raj Devél isyn Devél, i nane butýr apríč (kromie) Léste;

³⁶bolybnástyr Jov dyjá túke te šunés Péskiri zan, sob (kaj) te sykliakires tut, i pe phuv sykadiá túke Péskiri bari jag, i tu šundián Léskire lavá maškír jag;

³⁷i adiáke syr Léske jačné dróga tyré dadá, i Jov vykedyjá tumen, léngiro ródo paló (poslie) lénde, tedy i vylydžijá Jov tut Kokoró baré Péskire zorjása Jegiptóstyr,

³⁸sob (kaj) te trades krig tyré móstyr manušén, savé sys baredýr i zoraledýr tútyr, i te zalydžas tut, i te des léngiri phuv dre mištypnáskiri miéra, syr davá akaná bicialó.

³⁹I tu akaná džin i čhuv pe tyró iló, so Raj Devél isyn Devél uprál pe bolybén i pe phuv telál, i nane butýr apríč Léste;

⁴⁰i rakh Léskire uphenybená i Léskire priphenybená, savé me rakiráva akaná túke, sob (kaj) šukár te javél túke i tyré čhavénge paló (poslie) túte, i, sob (kaj) tu but časo (cýro) te javes pe doiá phuv, saví Raj Devél, tyró Devél, déla túke pe saró džiibén.”

⁴¹Tedy Mójza otčhudia trin fórja pir daja Iordanoskiri rig pe vastóko khamestyr,

⁴²sob (kaj) te našél odorík zamaribnari (umaribnari), savó muliakiréla péskire pašatunes, nakami, savó na sys vérgo (vrogo) léske ni tasiá, ni pe tríto dyvés, i sob (kaj) te našél dre jekh dalé for'jéndyr, te jačélpe džidó:

⁴³Biecero pe čhučí phuv, pe loščýna (ravnina) dro Ruvimoskiro ródyco, i Ramófo dro Galaádo dro Gadoskiro ródyco, i Golano dro Vasáno dre Manasijáskiro ródyco.

⁴⁴Ĥáda, isyn Zakóno, savó čhudiá angíl (proponindia) Mójza Izrailjoskire čhavénge.

⁴⁵Ĥáda, isyn priphenybená, uphenybená i zakóny, savé dyjá Mójza Izrailjoskire čhavénge, syr jone vyginé Jegiptóstyr,

⁴⁶pal Iordáno pe loščýna proti Bief-Fiegoro [Bet Pieor-ju.o.], pe Sigonoskiri phuv, Amoriejéngire-kralískiri, savó dživdiá ke Jesievóno, savés zamardiá (umardia) Mójza Izrailjoskire čhavénca, pir léngiro vygiiben Jegiptóstyr.

⁴⁷I zalyne jone léskiri phuv i Vasanoskire-kralískire, Ogoskiri phuv, duje Amoriejéngire kral'jengire, savé pal Iordáno ke vastóko khameskiro,

⁴⁸lyi Aroierostyr, savó isyn paštó pe brégo Arnonoskiro, sygnone rekicatyr (lenorjatyr), ke bérga Sióno, joj isyn Jermono,

⁴⁹i lyné sarí loščýna pir daja Iordanoskiri rig ke vastóko, ke mórjo (derjáv), isyn loščyny pašýl Fasgakiro sklono.”