Read Biblija - Pe Baltitko Romani čib (Romanes) 2019 Baltic Romani Bible Javír Zakóno 6 Bible Online

Javír Zakóno 6 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 6

¹Akaná isyn priphenybená, uphenybená i zakóny, savé rakirdiá Raj Devél, Devél tumaró, te sykliakires tumen, sob (kaj) tumé te kerén adiáke pe doiá phuv, pe saví tumé džána, sob (kaj) te javén tumé xulaja pe láte;

²sob (kaj) tu te dares tyré Rástyr-Devléstyr, i saré Léskire uphenybnendyr i Léskire priphenybnendyr, savé rakiráva túke, sob (kaj) tu te rakhés, i tyré čhavé, i tyré čhavéngire-čhavé dre saré tyré džiibnáskire dyvesá, sob (kaj) te javén ĥaredyr (dlugedyr) tyré dyvesá.

³I paldavá šun, Izrailjo, i pričhúv zor te kerés davá, sob (kaj) túke te javél mištó, i sob (kaj) tumé te javén drieván (zbit) but, syr Raj Devél, tyré-dadéngiro Devél rakirdiá túke, so Jov déla túke phuv, thadéla thud i avgín (meda).

⁴Šun, Izrailjo: Raj Devél, tumaró Raj Devél isyn Jekh;

⁵i sykáv patýv tyré Ráske-Devléske, saré tyré ilésa, i saré tyresa diesa, i saré zor'jenca tyrenca.

⁶I mek te javén dalé lavá, savé Me phenáva túke adadyvés, dro tyró iló;

⁷i piriphen len tyré čhavénge i rákir pal lénde, bešyndoj dre tyró kher i gii dromésa, i pasii, i uštyi;

⁸i priphande len syr špéra (znako) pe tyró vast, i mek te javén jone syr phandluny (poviazka) pe tyré jakhá,

⁹i čhin len pe tyré-kheréskire kasiaki i pe tyré vudará (pórty).

¹⁰Kiéli zalydžala tut Raj Devél, tyró Devél, pe doiá phuv, saví Jov sovlahadiá te del tyré dadénge, Avraamóske, Isaakóske i Jakovóske, te del túke baré i lačhé for'jenca, savé tu na kerdián,

¹¹i kherenca, so sys čhudé pherdés kažnoné mištypnasa, savé tu na čhudián, i ĥanyngenca, vyčhingirde barestyr, savé tu na vyčingirdian, vinagradnikenca i maslinenca, savé tu na čhudián dre phuv, i, savé tu javésa te xas i te čaljos;

¹²tedy rakhpe, sob (kaj) tu te na bistres Ras-Devlés, Savó vylydžijá tut Jegiptóskire phuvjátyr, pisharibnaskire kheréstyr.

¹³Dar Rástyr-Devléstyr, tyré Devléstyr, i Léske Jekhéske dynarin, i Léskire lavésa sovlahá.

¹⁴Na mangénpe javire devlorénge, devlorénge odolé-manušéngire, savé javéna pašýl tuménde;

¹⁵pal-dová so Raj Devél, tyró Devél, Savó isyn maškír túte, isyn Devél zevlynypnaskiro; sob (kaj) te na zahačol Ráskire-Devléskiri, tyré Devléskiri xolý pe túte, i te na tradel krig Jov tut phuvjákire móstyr.

¹⁶Na propatiakiren Ras-Devlés, tumaré Devlés, syr tumé Les propatiakirde dre Masá.

¹⁷Rakhén zoralés tumaré Ráskire-Devléskire priphenybená, i Léskire uphenybená i zakóny, pir savé Jov priphendiá te kerés túke;

¹⁸ker čačipén i lačhipén angíl Ráskire-Devléskire jakhá, sob (kaj) šukár te javél túke, i sob (kaj) tu te zadžas i te xulaines lačhé phuvjása, saví Raj Devél sovlahadiá te del tyré dadénge,

¹⁹i, sob (kaj) Jov te tradel krig sarén tyrén vergén tyré móstyr, syr rakirdiá Raj Devél.

²⁰Kóli phučela tútyr tyró čhavó dro javír časo, rakirí: ‘So značynena dalé dosykaibena, zakóny, i uphenybená, savé rakirdiá tuménge Raj Devél, Devél tumaró.’

²¹to tu tedy phen tyré čhavéske: “Pishárja ame sámas faraonoste dro Jegípto, ne Raj Devél vylydžijá amen Jegiptóstyr zoralé vastésa;

²²i sykadiá Raj Devél znamiénii (ĥiertyká), i dívy baré i darakune pe Jegípto, pe faraonoste i pe saró léskiro kher, angíl amaré jakhá;

²³a amen Jov vylydžijá odothýr, sob (kaj) te janel amen i te del aménge phuv, saví Jov sovlahadiá amaré dadénge te del aménge.

²⁴I priphendiá aménge Raj Devél te kerás saró pir saré dalé uphenybená, sob (kaj) ame te daras Rástyr-Devléstyr, Devléstyr amarestyr, sob (kaj) šukár te javél aménge dre saré dyvesá, sob (kaj) te zrakhél amaró džiibén, syr i akaná;

²⁵i dro saró javéla amaró čačipén, kóli ame javása te pričhuvas zor te kerás pir saré dalé priphenybená angíl Raste-Devléste, Devléste amareste, syr Jov rakirdiá aménge.”