Read Biblija - Pe Baltitko Romani čib (Romanes) 2019 Baltic Romani Bible Javír Zakóno 7 Bible Online

Javír Zakóno 7 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 7

¹Kiéli zalydžala tut Raj Devél, Devél tyró, pe phuv, pe saví tu džása, sob (kaj) te xulaines lása, i jov tradéla krig tyré móstyr butedýr-manušéngiri nácyi, Xietiejen, Giergiesiejen, Amoriejen, Xananiejen, Fierieziejen, Jeviejen i Jevusiejen, eftá manušýtka nácyi, savé isyn butýr i zoraledýr tútyr,

²i otdéla len túke Raj Devél, Devél tyró, i tu domaresa len, to tedy otdé len prokošybnaske, i na džá lénca dro khetaniakiriben i na tangine len;

³i tu na semencynpe (na džá lénca dre seménca): na otdé čha tyrja pal léskire čhavéste i na le lengirja čha pal tyré čhavéste;

⁴pal-dová so jone otriskirena tyré čhavén Mándyr, sob (kaj) te dynarinén javire devlorénge, i tedy zahačola pe tuménde Ráskire-Devléskiri xolý, i Jov syg xasiakiréla tut.

⁵Ne adiáke kerén lénca: altári (žertvieniki) léngire rosphagiren, stýlby léngire phagiren, i vešore léngire vyčingiren i léngire kaštune devloré xačkirén jagása;

⁶pal-dová so Raste-Devléste, tumaré Devléste, tumé san svénta manušá: tumen vykedyjá Raj Devél, Devél tumaró, sob (kaj) tumé te javén jekhe Léskire manušá (manušénca) saré manušéndyr, savé isyn pe phuv.

⁷Na pal-dová, so tumé sánas butýr saré manušéndyr, risijá ke tumé Raj Devél i vykedyjá tumen, — pal-dová so tumé san tyknedýr saré manušéngire nacyiéndyr,

⁸ne paldavá, so tumé san dróga Ráske-Devléske, i vaš dová, sob (kaj) Jov te zrakhél sovláh, savjása Jov sovlahadiá tumaré dadénge, paldavá vylydžijá tumen Raj Devél zoralé vastésa, i vyrakhcia tut pisharibnaskire kheréstyr, faraonóskire vastéstyr, Jegiptóskire kralístyr.

⁹I adiáke džin, so Raj Devél, Devél tyró, isyn Raj Devél čačunó, Savó rakhéla Péskiro zavieto (dorakiribén) i tangipén ke odolé manušá, savénge isyn drógo Jov, kon rakhéla Léskire priphenybená ke tysjoncy ródy,

¹⁰i Jov otdéla (riskiréla) pale pe léngiro šeró odolénge, kon Les drieván bidykhela, dro léngiro muj, xasiakiri len; Jov na javéla te otčhuvel fuipén pe léskiro šeró, kon Les drieván bidykhela, kokoreske odolé manušéske Jov otdéla pale.

¹¹I paldavá rakh priphenybená, i uphenybená, i zakóny, savé adadyvés me priphenava tuménge te kerén saró pir lénde.

¹²I kóli tumé javéna te šunén dalé zakóny, i te rakhén len, i te kerén saró pir lénde, tedy Raj Devél, Devél tyró, javéla te rakhél zavieto i tangipén (žalima) ke tu, syr Jov sovlahadiá tyré dadénge,

¹³i javésa tu drógo Léske, i Jov bahtiakiréla tut, i Jov keréla adiáke, so javéla but tumen, i bahtiakiréla tre-maséngiro barjakirdó, i tyré-phuvjákiro barjakirdó, i maró tyró, i mol (vino) tyrí, i aliejo (dzet) tyró i dová, kon javéla bijandlo baré tyré kheritkoné murdaléndyr (skotóstyr) i tyré stadakire bakréndyr pe doiá phuv, saví Jov sovlahadiá tyré dadénge te del túke;

¹⁴bahtiakirdó tu javésa butýr saré manušéndyr; na javéla ni nabijanypnytkones-(naplodorodnones) ni túte, ni dre kheritkoné murdalénde;

¹⁵i otlydžala tútyr Raj Devél kažno nasvalypen, i nisavó zoraló Jegiptóskiro nasvalypen, savó tu džinésa, na lydžála pe túte, ne Jov janéla len pe sarénde, kon drieván bidykhela tut;

¹⁶i tu xasiakiresa saré manušýtka nácyi, savé Raj Devél, Devél tyró, déla túke: mek te na tanginél len tyrí jakh; i te na mangespe léngire devlorénge; pal-dová so davá isyn felý vaš túke.

¹⁷Kóli tu phenésa dre tyró iló: ‘Adalé manušá isyn butýr mándyr; syr me dáva ráda (mogináva) te vytradav len?’

¹⁸Na dar léndyr, priripir dová, so kerdiá Raj Devél, Devél tyró, faraonosa i saré Jegiptosa,

¹⁹dová sys baró sprobinyben, savó dykhné tyré jakhá, znamiénii (ĥiertyká), dívy, i vast zoraló i psikó vučó, savénca vylydžijá tut Raj Devél, Devél tyró; dová-pac' keréla Raj Devél, Devél tyró, saré manušénca, savéndyr tu daresa;

²⁰i bičhavéla Raj Devél, Devél tyró, voslen (šeršnien) pe lénde, paka jone xasjona, savé jačnépe i ĥaradjona tyré móstyr;

²¹na dar léndyr, pal-dová so Raj Devél, Devél tyró, isyn maškír túte, Devél baró i darano.

²²I javéla Raj Devél, Devél tyró te tradel angíl túte nábut pe nábut dalé manušýtka nácyi; i tu désa ráda te xasiakires len syg, sob (kaj) te na skedénpe but pe túte feldýtka murdalá;

²³ne otdéla len túke Raj Devél, Devél tyró, i janéla len dro bari túga (konfuzo), adiáke so jone xasjona;

²⁴i otdéla léngire kral'jén dre tyré vastá, i tu xasiakiresa léngiro lav tel bolybnástyr: i nikón na terdjola proti túte, paka tu rozmaresa len pe koterá (kuski).

²⁵Léngire devlorengire vyčhindlé muiá xačkirén sarésa jagása; na trej túke te les péske rup ci suvnakái, savó isyn pe lénde, sob (kaj) davá te na javél vaš túke syr felý (sietka), pal-dová so davá isyn magiripén vaš Ráske-Devléske, tyré Devléske;

²⁶i na lýdža magiripén dro tyró kher, sob (kaj) te na peres sovlahake, syr jov; otrisjov saréstyr i gin syr džungalypén saró (gidinpe saréstyr); pal-dová so davá isyn sovlahado.