Read Biblija - Pe Baltitko Romani čib (Romanes) 2019 Baltic Romani Bible Javír Zakóno 9 Bible Online

Javír Zakóno 9 - Biblija - Pe Baltitko Romani čib (Romanes) 2019 Baltic Romani Bible bible

Javír Zakóno 9

¹Šun, Izrailjo: tu akaná piridžasa Iordáno, sob (kaj) te džas te zauhtyles manušén, savé isyn butýr i zoraledýr tútyr, baré for'jenca i zoralé tynénca ke bolybén,

²i adalen manušén isyn but, jone isyn vučé, Jenakoskire čhavé, pal savénde tu džinésa i šundián: “Kon déla ráda te terdjol proti Jenakoskire čhavénde?”

³Džin akaná, so Raj Devél, Devél tyró, džála angíl túte, syr jag, saví saró xála; Jov javéla te tradel len i te tyliakirel len angíl túte, i tu tradesa krig len, i rozmaresa len syg, syr rakirdiá túke Raj Devél.

⁴Kiéli javéla te tradel len Raj Devél, Devél tyró, tyré móstyr, na rákir dro tyró iló, so pal “miro čačipén” jandiá man Raj Devél te zauhtylel daja phuv, i so pal adalé-manušéngiro načačipén Raj Devél tradéla len tyré móstyr.

⁵Na pal čačipén tyró, i na pal čačunó tyró iló tu džása te zauhtyles léngiri phuv, ne pal načačipén adalé-manušýtka nácyi Raj Devél, Devél tyró, tradéla len tyré móstyr, sob (kaj) te kerél saró pir lav, savésa sovlahadiá Raj Devél tyré dadénge Avraamóske, Isaakóske i Jakovóske;

⁶paldavá džin, so na pal tyró čačipén Raj Devél, Devél tyró, déla túke te zauhtyles daja lačhí phuv, pal-dová so tumé pharé-ilytka san manušá.

⁷Rípir, na bistyr, ci but tu xoliakirdian Ras-Devlés, Devlés tyrés, pe čhučí phuv: odolé dyveséstyr, syr vygijan tu Jegiptóskire phuvjátyr, i ke sámo tumaró javiben pe davá štéto, tumé na kandyné Ras-Devlés.

⁸I pašýl Xorivo tumé xoliakirde Ras-Devlés, i xoliásyja pe tuménde Raj Devél adiáke, so kamdiá te tradel krig (te vymarel sarésa) tumen,

⁹kiéli me gijom upré pe bérga, sob (kaj) te prilav baruné skrižáli, zavietoskire skrižáli, savé čhudiá Raj Devél tuménca, i sómas me pe bérga štardešá dyvesá i štardešá ratia, maró nahai, i paní napii,

¹⁰i dyjá mánge Raj Devél duj baruné skrižáli, savé čhindiá Devléskiro angúšt (pal'co), pe lénde saré lavá, savé rakirdiá Raj Devél tuménge pe bérga maškirál jag pe skedyibnaskiro dyvés.

¹¹Syr proginé štardešá dyvesá i štardešá ratia, dyjá mánge Raj Devél duj baruné skrižáli, zavietoskire skrižáli,

¹²i phendiá mánge Raj Devél: “Uštý, i džá sygnedyr adathýr, pal-dová so rozmeknepe tyré manušá, savén tu vylydžijan Jegiptóstyr; syg jone giné krig droméstyr, savó Me phendjom lénge; jone kerdé péske vyčhudo muj (idolo).’”

¹³I phendiá mánge Raj Devél: “Dykháva Me adalé manušén, ĥáda, jone isyn pharé-ilytka.

¹⁴Na obrikir man, i Me tradava krig len, i Me (khosava krig) zlava léngiro lav bolybnástyr; a tútyr Me sozdáva manušén, savé javéna zoraledýr i butýr léndyr.’”

¹⁵Me risijom i gijom bergátyr, bérga xačija jagása; duj skrižáli zavietoskire sys dre miré duj vastá;

¹⁶i dykhcjom me, so tumé kerdé grého angíl Raste-Devléste, tumaré Devléste, kerdé péske guruvóres sastyrestyr, syg giné krig droméstyr, savéske te rikirespe, rakirdiá tuménge Raj Devél;

¹⁷i lyjom me duj skrižáli, i čhurdyjom len péskire duje vasténdyr, i rozmardjom len angíl tumaré jakhá.

¹⁸I pyjom mósa me angíl Raste-Devléste, mangdjompe me, syr ĥaredyr, štardešá dyvesá i štardešá ratia, na xajom maró, i paní na pijom, pal saré tumaré gréhi, savé tumé kerdé, i dalésa tumé kerdé čoripén dre jakhá Ráskire-Devléskire i xoliakirde Les;

¹⁹paldavá so me darandyjom xoliátyr i mižehipnastyr, savénca Raj Devél xoliásyja pe tuménde i kamdiá te muliakirél tumen. I kandyjá man Raj Devél i davá mólo.

²⁰I pe Aaronoste drieván (zbit) xoliásyja Raj Devél i kamdiá te muliakirél les; ne me mangdjompe i pal Aaronoste dro dová časo.

²¹Grého tumaró, savó tumé kerdé, — guruvóres me lyjom, xačkirdjom sarésa les dre jag, rozmardjom les i sares skhostjom ke dová, so jov jaciá tyknin'ko, syr práho, i me čhurdyjom davá práho dro sýgno rékica (lenorí), saví thadyja bergátyr.

²²I dre Taviera, dre Masá i dre Kibrot-Gataava tumé xoliakirde Ras-Devlés.

²³I kiéli tumen bičhadiá Raj Devél Kadies-Varniatyr i rakirdiá: ‘Džán, zalen phuv, saví Me dáva tuménge, to tedy tumé na kandyné Ráskire-Devléskiro, tumaré Devléskiro phenybén, i na patiandyné Léske, i tumé na šundlé Léskiri zan’.

²⁴Tumé na kandyné Ras-Devlés dolé-pac' dyveséstyr, syr me jacjom te džináv tumen.

²⁵I terdindoj pe čangá angíl Raste-Devléste, mangdjompe me štardešá dyvesá i štardešá ratia, dre savé me mangdjompe, pal-dová so Raj Devél kamdiá te muliakirél tumen;

²⁶i mangdjompe me Ráske-Devléske i phendjom: “Rajo Baró, Rajo Dévla, na muliakir Tyré manušén i Tyrí mištypnáskiri miéra, savjása Tu zrakhcián baré Tyré zorjása, savjása Tu vylydžijan Jegiptóstyr zoralé vastésa;

²⁷priripir Tyré pishar'jén Avraamos, Isaakos i Jakovós; na dykh pe adalé-manušéngiri xolý i pe léngiro načačipén i pe léskire gréhi,

²⁸so vari-kon dživéla pe doiá phuv, katýr Tu vylydžijan amen, te na phenél: “Raj Devél na mogindiá te zalydžal (te lydžál ke kónco/iagóro) len pe phuv, pal saví Jov dyjá lav lénge, i, nakami len, Jov vylydžijá len, sob (kaj) te muliakirél len pe čhučí phuv.”

²⁹‘A jone isyn Tyré manušá i Tyrí mištypnáskiri miéra, savjása Tu vylydžijan len Jegiptóskire phuvjátyr Tyré baré zorjása i Tyré vučé psikesa.’