Read Biblija - Pe Baltitko Romani čib (Romanes) 2019 Baltic Romani Bible Iáno 1 Bible Online

Iáno 1 - Biblija - Pe Baltitko Romani čib (Romanes) 2019 Baltic Romani Bible bible

Iáno 1

¹Angledýr saréstyr sys Lav[1], i Lav Kokoró sys Devlésa, i Lav sys Devél.

²Jov (Lav) angledýr saréstyr sys Devlésa.

³Saró, so isyn, jaciá pir Léste, i bi Léskiro saró so isyn, na javélas.

⁴Dre Léste sys džiibén i davá džiibén sys Dud (Svéto) vaš manušénge.

⁵Dud svencynela dro kalypén (ciemnyma/ciamlypén), i kalypén na murdiakirdia les.

⁶Devél bičhadiá manušés, léskiro lav sys Iáno.

⁷Jov javdiá vaš dová, sob (kaj) te dophenel pal Xristosóste syr pal Dud (Svéto), sob (kaj) pir Léste saré te patián.

⁸Kokoró Iáno na sys Dud, a sys bičhadó Devléstyr, sob (kaj) te dophenel pal Xristosóste syr pal Dud.

⁹Davá sys čačunó Dud, Savó déla džinybén kažnoné manušéske, savó javéla pe svéto (lot).

¹⁰Jov sys dro svéto, savó pir Léste sys sozdynó, a svéto na priĥalyja Les.

¹¹Jov javdiá ke Léskire, i Léskire na prilyné Les.

¹²Ne sarénge, kon prilyjá Les, savé patiandyné dre Léskiro lav, Jov dyjá pravo te javén Devléskire čhavénca.

¹³Davá sys kadalé čhavé, savé bijándyne na ratestyr i na pir ločakiro kamiben na pir manušeskiri vólia, a Devléstyr sys bijandle.

¹⁴I Lav jaciá manušésa dre loč (plot') i dživdiá aménca; i ame dykhciam Léskiro jarko šukaripén i zor, saví sys Léste syr Jekhebijanypnytkone Čhavéste, Savó isyn Dadéste, i Savó isyn pherdó bahtalypnasa i čačipnása.

¹⁵Iáno dophenéla pal Léste i rakiréla radymása: “Jov isyn Odová, pal Savéste me phendjom: ‘Savó džála pal Mánde, isyn baredýr Mándyr, pal-dová so jov sys angledýr Mándyr’”

¹⁶Léste saró sys pherdó i pir Léskiro pherdypen ame saré doresciam jekh bahtalypén pal jekh.

¹⁷Pal-dová so Devél dyjá Zakóno pir Mojzaste (Moisiejoste), a bahtalypén i čačipén javné pir Isusóste Xristosóste.

¹⁸Nikón nikieli na dykhciá Devlés: Jekh Jekhebijanypnytko Čhavó, Savó isyn usady/sak (vsiegda) khetané Dadésa, Jov sykadiá Les aménge.

¹⁹Ĥáda, isyn Ianoskiro dophenybén, kiéli Judy Jerusalimóstyr pribičhade rašán i Lievitén te phučén Léstyr: “Kon tu san?”

²⁰Jov phendiá mamúj dro jakhá angíl sarénde: “Me na som Xristóso.”

²¹Jone phučné léstyr: “So ž? Tu so san Ilíia?” Iáno otphendiá: “Nad.” “Ci na Proróko?” I Jov phendiá: “Nad.”

²²Tedy phendlé léske: “Kon tu dasavo san? Sob (kaj) ame te rosphenas manušénge, savé bičhadé amen, konesa tu kokoró pes ginesa?”

²³Iáno phendiá lénge: “Me som zan, saví déla gódla pe čhučí phuv: ‘Čhuvén mamúj (priámo) drom Ráske-Devléske’ syr phendiá proróko Isajo.’”

²⁴Manušá, savé sys bičhadé phučibnasa ke Iáno, sys Farisiejendyr.

²⁵Jone phučné léstyr: “So (kóli) tu na san Xristóso, na san Ilíia, na san Proróko, tedy sóske tu bolesa manušén?”

²⁶Iáno otphendiá lénge lavénca: “Me bolava paniésa; ne maškirál tuménde isyn terdó Vari-Kon, Saves tumé na džinéna.

²⁷Davá isyn Jov, Savó džála pal mánde, Savó jaciá angíl mánde, Savéske me na som mol te rosphandav simiri pe Léskire ĥeritka (obuv).”

²⁸Davá saró sys dre Vifanija pe dová Iordanoskiro brégo, odój, kaj Iáno boldia.

²⁹Pe javír dyvés Iáno dykhéla Isusós, Savó džála ke jov i rakiréla: “Ĥáda, isyn Devléskiro Svénto Bakroró, Savó léla pe Péste svetoskiro grého.

³⁰Ĥáda, isyn Jov, pal Konéste me rakirdjom: “Pal mánde džála Murš, Savó jaciá angíl mánde, pal-dová, so Jov sys ĥaredyr Mándyr.”

³¹Me Les na džindjom, a me javdjom vaš dová te bolav dre paní, sob (kaj) Izrailjo te udžinel pal Léste.”

³²Iáno dophenelas, rakirí: “Me dykhcjom Dúho (Fáno), savó zdžalas bolybnástyr syr golumbo, i Jov jaciápe pe Léste.

³³Me na džindjom Les: ne Odová, Kon bičhadiá man te bolav dro paní, phendiá mánge: “Pe Konéste dykhésa Dúho (Fáno), Savó javéla te džal telé bolybnástyr i jačélape pe Léste, Jov isyn Kodová, Kon javéla te bolel Sventoné Duhósa.”

³⁴Me dykhcjom davá i dophenava, so Jov isyn Devléskiro Čhavó”

³⁵Pe javír dyvés Iáno nevéstyr (nevés) sys terdó duje Péskire sykliaibnytkonénca.

³⁶Dykhí Isusós, Savó džálas pašýl, jov phendiá: “Ĥáda, isyn Svénto Bakroró Devléskiro.”

³⁷Duj Ianoskire sykliaibnýtka šundlé dalé lavá i giné pal Isusóste.

³⁸Jov obrisija i dykhciá, so jone džána pal Léste, i rakiréla lénge: “So tumé kaména?” Jone phendlé Léske: “Ravvi! (so značynéla Sykliakiribnáskiro), kaj Tu dživesa?”

³⁹Jov rakírla lénge: “Džán i dykhén.” Jone giné Lésa i dykhné, kaj Jov dživéla, i jone sys ke Jov dová dyvés. Sys pašé deš mardé (štundy).

⁴⁰Jekh léndyr, savó šundiá Ianóstyr pal Isusóste i savó gijá pal Léste sys o Jendri, Simonoskire-Petriskiro pšal.

⁴¹Angledýr jov lathiá Simonos, péskire pšalés i phendiá léske: “Ame lathiam Miesijas” /so značynéla Xristosós/.

⁴²Jov jandiá les ke Isúso. Isúso, podykhi pe léste, phendiá: “Tu san Símono, Ianoskiro Čhavó; tut javéna te kharén “Kifa” — davá značynéla: bar (Pétri).

⁴³Pe javír dyvés Isúso kedyjape te džal ke Galiliéia. Odój Jov strenindia (pirilyja) Filipos i rakiréla léske “Džá pal Mánde.”

⁴⁴Filipo sys Vifsaidatyr, jekhe foróstyr Jendrisa i Petrisa.

⁴⁵Filipo lathiá Nafanailos i phendiá léske: “Ame lathiam Odolés, pal Konéste Mójza čhindiá dro Zakóno i proróki — Isusós, Jozáskire čhavés Nazarietostyr.”

⁴⁶Nafanailo phendiá léske: “Nazarietostyr? Ci saštý (moginéla) te javél vari-so lačhó Nazarietostyr? Jav i dykh kokoró”, — rakiréla léske Filipo.

⁴⁷Isúso dykhciá, so Nafanailo džála ke Jov, i phendiá pal léste: “Ĥáda, isyn čačunó Izrail'tianino, savó isyn bi xohaibnaskiro.”

⁴⁸Nafanailo rakiréla Léske: “Tu katýr džinésa man?” “Angíl davá, syr Filipo khardiá tut, Me dykhcjom tut tel inžyritko kašt (drévo)”, — otphendiá léske Isúso.

⁴⁹Tedy Nafanailo otphendiá Léske: “Ravvi! Tu san Devléskiro Čhavó, Tu san Králi Izrailjoskiro!”

⁵⁰Isúso phendiá léske: “Pal-dová so Me túke phendjom: ‘Me dykhcjom tut tel inžyritko kašt’, tu patiása? Tu javésa te dykhés butýr daléstyr.”

⁵¹I Jov phendiá léske: “Čačes, čačes, Me rakiráva tuménge: tumé dykhéna otčhakirdo (psirado) bolybén i Devléskire Jangolen, savé javéna te ĥazdénpe ke Manušéskiro Čhavó i te džán telé ke Jov!”