Read Biblija - Pe Baltitko Romani čib (Romanes) 2019 Baltic Romani Bible Iáno 10 Bible Online

Iáno 10 - Biblija - Pe Baltitko Romani čib (Romanes) 2019 Baltic Romani Bible bible

Iáno 10

¹“Čačes, čačes, Me rakiráva tuménge: odová, kon zadžála dre bakrany gréda (dvóro) na pir vudár, a zadžála javire dromésa, kodová isyn čor i rozmaribnari;

²a odová, savó zadžála dro vudár, isyn čhupnári bakrenge;

³Rakhibnari otčhakirela vudará léske, i bakré šunéna léskiri zan, jov kharéla piró lav péskire bakrén i lydžála len javrí.

⁴I kiéli jov vylydžala sarén péskire bakrén, jov džála angíl lénde; bakré pal léste džána, pal-dová so bakré džinéna léskiri zan.

⁵Pal čužoneste jone na džána, našéna léstyr, pal-dová so jone na džinéna javír zan.”

⁶Isúso rosphendiá lénge dasavo primiéro (sykaibén), ne jone na ĥalyné, so dasavo Jov rakirdiá lénge.

⁷I Isúso nevéstyr phendiá lénge: “Čačes, čačes Me rakiráva tuménge, so Me som vudár vaš bakrenge.

⁸Saré, ci but len sys angíl Mánde, isyn čora i rozmaribnarja, i bakré na kandyné len.

⁹Me som dasavo vudár: kon zadžála pir Mánde, odová javéla zrakhno, jov zadžála pir vudár i vydžála, i lathéla lačhó čaraiben.

¹⁰Čor javéla vaš jekh, sob (kaj) te čorel, te zamarél i te rosphagirel: Me javdjom vaš davá, sob (kaj) te dav lénge džiibén pherdés dro saró.

¹¹Me som lačhó čhupnári: lačhó čhupnári otdéla péskiro džiibén pal bakrende:

¹²a manúš, savó isyn dorakirdo pe butý pal lové, jov isyn na čhupnári, pal-dová so dalé bakré isyn na léskire, jov dykhéla, syr ruv poddžála i mekéla bakrén i kokoró našela, i ruv čorela bakrén i rostradela len.

¹³Jov isyn na čhupnári, ne jov isyn dorakirdo pe butý pal lové, i jov našela, i jov na duminéla pal bakrende

¹⁴Me som lačhó Čhupnári, i Me džinóm Miré bakrén, i Miré bakré džinéna Man.

¹⁵I syr Man Dad džinéla, adiáke i Me džinóm (džináv) Dadés, i Me otdáva péskiro džiibén pal bakrende.

¹⁶Isyn Mánde i javír bakré, savé na dalé gredatyr, i odolén trej Mánge te janav: i jone javéna te šunén Mirí zan, i javéla jekh skedyibén i jekh Čhupnári.

¹⁷Paldavá Me som drógo Dadéske, so Me otdáva Miro džiibén, sob (kaj) nevéstyr te prilav les.

¹⁸Nikón Miro džiibén na otlela, ne Me Kokoró otdáva les: Mánde isyn zor te otdav džiibén i pale te prilav; pal-dová so davá priphenybén Me dorescjom Miré Dadéstyr.”

¹⁹Dalé lavéndyr nevéstyr vygijá maškír Judénde košybén.

²⁰But léndyr rakirdé: “Jov zgija godiatyr i aby-so rakiréla; so tumé Les šunéna?”

²¹Javír rakirdé: “Ĥáda, lavá isyn na nalačheskire; ci nálačho dúho (fáno) moginéla te otčhakurel jakhá kororenge?”

²²Davá sys ivante/ivende (zimakiro), kiéli javdiá dro Jerusalimo žužakiribnaskiro svénko (Xanukka) vaš Khangirí.

²³I psirdiá Isúso dre Khangirí, pir Solomonóskiro trémo.

²⁴Judy terdiné trusciál Léste i lyné te rakirén Léske: “Ci ĥará (dlúges) Tu javésa te rikires amen dro nadžinyben? Kóli Tu san Xristóso, phen aménge mamúj (priames)!”

²⁵Isúso otphendiá lénge: “Me phendjom tuménge, ne tumé Mánge na patiána; réndy, savé Me keráva vaš Miré-Dadéskiro lav, — jone dophenena pal Mánde;

²⁶Ne tumé na patiána Mánge, pal-dová so tumé na san Miré bakréndyr, syr Me phendjom tuménge.

²⁷Miré bakré šunéna zan Mirí, i Me džinóm (džináv) len, i jone džána pal Mánde;

²⁸i Me dáva lénge viéčno džiibén, jone na xasjona nijékhvar, i nikón na čorela len Miré vastéstyr.

²⁹Dad Miro, Savó Mánge dyjá len, isyn naj baredýr saréndyr, i nikón na moginéla te otlel len Miré-Dadéskire vastéstyr:

³⁰Me i Dad sam Jekh.”

³¹Nevéstyr Judy uhtyldé bará, sob (kaj) te marén Les.

³²Isúso otphendiá lénge: “But lačhé réndy sykadjom Me tuménge Miré Dadéstyr; pal savó ž réndo léndyr tumé kaména te marén Man barénca?”

³³Judy phendlé Léske: “Na pal lačhó réndo ame kamasa te maras Tut barénca, ne pal dová, so Tu teliakiresa Devlés i pal dová, so Tu san manúš, a kerésa Pes Devlésa.”

³⁴Isúso otphendiá lénge: “Ci nane čhindló dre tumaró Zakóno: “Me phendjom: ‘Tumé san develá?’”

³⁵Kóli Jov khardiá devlenca odolén, ke savé sys Devléskiro lav, a Svénto Čhinybén na moginéla te parudjol,

³⁶to ci rakiréna tumé Odoléske, Saves Dad svencyndia i bičhadiá pir svéto: ‘Tu teliakiresa Devlés,’ pal-dová so Me phendjom: ‘Me som Devléskiro Čhavó?’

³⁷Kóli Me na keráva Miré Dadéskire réndy, tedy na patián Mánge;

³⁸ne kóli Me keráva len, tumé moginéna Mánge te na patián, a patián tedy dre Miré réndy, sob (kaj) tumé te džinén i te ĥaljon, so Miro Dad isyn dre Mánde, i Me som dre Léste.”

³⁹Jone nevéstyr rodyne te uhtylén Les, ne Jov vyrisija léngire vasténdyr,

⁴⁰i Jov nevéstyr gijá pal Iordáno, pe dová štéto, kaj ĥaredyr Iáno boldia, i jaciápe odój.

⁴¹Ke Jov javénas but manušá i rakirdé, so Iáno na kerdiá nisavó dívo; ne saró, so phendiá Iáno pal Léste, sys čačipén.

⁴²I but manušá upatiándyne dre Léste odój.